Əgilye 37 - Bible en Guidar

Akoti na wənmiyna

¹ Besalel agəɗək akoti na wəlaŋga na duvurnohõ, zezek nan metər taka də mani, slosloprok nan tay ɓa siɗikke səddəv metər, əɓay nan tay ɓa siɗikke səddəv metər.

² Akkəɗ sənək meleŋge saksakə, gədəvən də gəɓan pakə, abay sənək genhe maŋgavan sulək na meleŋge.

³ Abay sənək ndemeɗ gugriɗe na meleŋge poɗo, aɗɗek aza tələn poɗegiti, ndemeɗ sula təkzlum dahã, sula dəka maɓɓani.

⁴ Agəɗək zleŋɗe na wəlaŋga na duvurnohõ, akkəɗ sitik meleŋge.

⁵ Agulik zleŋɗe vet addivit ndemeɗ naka təkzlum akoti sulagən nak kawslan dənditi.

⁶ Agəɗək man nampan na meleŋge saksakə, zezek nan metər taka də wəɗakə nani, slosloprok nan tay ɓa siɗikke səddəv metər.

⁷ Avotuk maslay kerubaɗe sula na meleŋge, avotik a metteɓ ma man nak dahãdahã.

⁸ Avotik maslay Kerubaɗe nek aza man dahãdahã; aɗɗek maslay kerubaɗe vet ɗoŋgor ɗoŋgor aka man naka, aza metteɓ ma man dahãdahã.

⁹ Maslay Kerubaɗe apparnənək persleket kəla disiŋ, vi kawzeŋ ara ma akoti də persleketi, assoŋguk heret aza zit sekseki, ulan dəza mani.

Tabəl na peŋ məpsən Maŋgəlva

¹⁰ Sissiŋ aɗɗak tabəl na wəlaŋga na duvurnohõ, zezek nan asanək metər taka, slosloprok nan wəɗak na metər taka, əɓay nan tay ɓa siɗikke səddəv metər.

¹¹ Akəɗ sənək meleŋge saksakə, abayək gawla sən man tərwəsl də meleŋge.

¹² Akkpa'ək təki nawbay gawla dit wəleŋɗe təkzlumun poɗo pakə, slosloprok net va ɗəf weɗi, abay gawla sən man də meleŋge tərwəsl kiyit wəleŋɗe neki.

¹³ Aɗɗek ndemeɗ gugriɗe na meleŋge poɗo, aɗɗek təkzlumən poɗe'egit na tələn pakə.

¹⁴ Ndemeɗ gugriɗe nek tahəŋ go'o dit wəleŋɗe naka təkzlumən neki, vi nawgul zleŋɗe nawslan tabəl vani.

¹⁵ Agəɗək zleŋɗe na duvurnohõ, akkəɗ sitik meleŋge, kawslan tabəl dinditi.

¹⁶ Agəɗ sənək ma wayɗe, hiŋgiɗ net iŋkile, hiŋgiɗ net iŋkile na təbza dit maɗaweɗ nawpesl dənɗaŋ. Də meleŋge saksak aɗɗe.

Zəga nawɗi lalam akan də ki van buhulu

¹⁷ Yaŋ aɗɗa zəga nawɗi lalam na meleŋge saksakə, avotuk zəga nawɗi lalam van dəvotu; gabbani, wəlaŋ zəni, kivani, kasliɗe nani gəm uffuyẽɗ nan sap azani.

¹⁸ Kivan agohoŋgək sləre a maŋgavani, hoku dahã, hoku dahã na zəga nawɗi lalam.

¹⁹ Aka kivan taka pak, kasliɗe hoku tahəŋ va tutukuluk uffuyo na teŋɗeke, gəm aka maɓɓan va aŋka'e: kivan sləre awɗakək səza zəga nawɗi lalam naka.

²⁰ Aka zəga nawɗi lalam zək nani, kasliɗe tahəŋ poɗo va kirtin teŋɗeke, dit tutukulukɗe gəm uffuyẽɗi.

²¹ Tutukuluk taka asanək ammba kivan sula dəgohoŋ səza mani, vas asan ammba kivan medembirgit poɗeŋki.

²² Tutukulukɗe də kivan assoŋgək sap azani, məvotit məstaka na meleŋge saksakə.

²³ Agəɗ sənək lalamɗe akan buhulu, mərmaɗe nan də met kasliɗe nan assoŋguk na meleŋge saksakə.

²⁴ Azaɓək zəga nawɗi lalamɗe dit zəgeɗ nan pak də meleŋge saksakə.

Matuya nawzla tursan

²⁵ Yaŋ azaɓ təki nawzaɓ-Maŋgəlva nawzla tursan də wəlaŋga na duvurnohõ, zezek nan va ɗəf du' taka, slosloprok nan va ɗəf du' taka, təkzlumun poɗo, əɓay nan metər taka. Mohõn sap azani.

²⁶ Akkəɗ sənək meleŋge saksakə, disiŋ kiyən, dəddəvən sulək gəm mohoni, abay sənək genhẽ na meleŋge aza man tərwəslə.

²⁷ Agəɗ sənək ndemeɗ na meleŋge sula ammba genhẽ, naza man kəlafuŋ aka təkzlumun sulagən nawgul zleŋɗe addəvit nawslani.

²⁸ Zleŋɗe na wəlaŋga na duvurnohõ agəɗə, akkəɗ sit meleŋge.

²⁹ Agəɗək mẽl nappay na mahenziŋ salala, gəm tursan nawzla saksakə, as wəza na mədə tursani.