Əgilye 36 - Bible en Guidar

¹ «Besalel, Oholiyab gəm ɗəf məs maɗɗula pak, məs Yawe apsən maɗɗula, hənhən, wəsən naɗɗa zəga temtem də wəza naddəv gəla na Maŋgəlva an Yawe aɗi wən nan pakə.»

² Moyis ayek may Besalel də Oholiyab, də ɗəf məs maɗɗula pak, məs Yawe apsən maɗɗula a makran pakə, məs dəppan makran nawzar aza wəza van kaɗɗani.

³ Agəmənək əvəl mə Israyelɗe akiyaŋ naɗɗa wəza naddəv gəla na Maŋgəlva nak pak səba Moyis, va təki addaŋ pakə, tahəŋ əkiyaŋ sənən əvəl də mekret taka əmpa.

⁴ Məsmaɗɗulet məɗɗaŋ wəza naddəv gəla na Maŋgəlva pak azzaraŋgək taka taka səka wəza net an adaɗɗaŋgə.

⁵ Anahaŋ sənən Moyis, aɓɗaŋ na: «Ɗiy tahəŋ əkiyaŋ zəga diyɗa naɗɗa wəza, adayək ki an Yawe aɗi wən nan naɗɗa.»

⁶ Moyis aɗiyək wən nan dətəlaŋgən ma a dibirgidik kawnəh na: Ɗəfa, gulku, adaɗɗaŋ wəza nawvəl nawzaɓ gəla na Maŋgəlva əmpa ɓa, ɗiy dəppanən dawkiyən.

⁷ Əvəl net agapək naɗɗa wəza pak, hã ndən mbəkə.

Gəla na Maŋgəlva

⁸ Məɗɗaŋ wəza sə weleŋgit məsmaɗɗulet pak, aɗɗanənək gəla dit gabagaɗe na ngərayã kukulfut məɗimit kəlawə, mənɗerit va əffuyo na muŋgus, pepreŋ witwiti, gəm hõlhõ hõlhõ dit maslay kerubaɗe azan məs məsənaŋ zəga ahoŋgu.

⁹ Zezek na gabaga məveren van tay metər kəlaw kiyən poɗo, slosloprok na gabaga məveren van tay metər sula, zezek də slosloprok net assoŋguk məstaka.

¹⁰ Aɗɗek gabagaɗe məveret vet armeh ama zit sle'i, meɓɓet əmpa ama zit sle'i.

¹¹ Agəɗək helegeɗ minɗerit va uffuyo na bəbərət mətuwək ama gabaga məveren maddaabəŋ ama əsap nani, vaski aɗɗa an masulane'e.

¹² Agəɗək helegeɗ kaklaw sle' ama an maddaabəŋ gəm kaklaw sle' ama an masulani, helegeɗ vet aslaŋgək dit en na masula'a.

¹³ Agəɗək məŋgba'aɗe na meleŋge kaklaw sle', asleretik gabagaɗe nek ama zit teptep dit məŋgba'aɗe neki, vi gizlirke dəsangən taka.

¹⁴ Agəɗək gabagaɗe də zeŋze na hawã, vi kaɗɗa gizlirke maɓɓan aka təki nassa, gabagaɗe kəlaw kiyit taka ahũ.

¹⁵ Zezek na gabaga taka pak tay metər kəlaw kiyən sle'i. Slosloprok nan metər sula. Gabagaɗe kəlaw kiyit taka pak əsla net məstakayi.

¹⁶ Aŋgbe'ik gabagaɗe sle' ka zit temme, sləre meɓɓet əmpa ka zit temme.

¹⁷ Agəɗək helegeɗ kaklaw sle' ama gabaga an na maŋgava, gəm helegeɗ kaklaw sle' əmpa ama gabaga masulan aka an məsapan bayma faɗə.

¹⁸ Agəɗək məŋgba'aɗe kaklaw sle' na təbəz pepreŋge, kawsapan gizlirke dəsangən taka.

¹⁹ Agəɗək zəga nawpak aka gizlirke van dit gəbeɗe net ndergeyẽɗ məhimti, gəm zəga nawpak maɓɓan də gəbeɗ zəgeɗ neret iŋkile adawyaŋ na dofeŋ.

²⁰ Agəɗək dədəkeɗ na gəla van dit wəleŋɗe na duvurnohõ mətukit dətuku.

²¹ Bəlaŋ pak zezek nan asanək metər sle'i, slosloprok nan asanək tay ɓa siɗikke səddəv metər.

²² Bəlaŋ pak asanək kiyən dahãdahã hurzluŋgo hurzluŋgo, heret seksek aza ziti, eɗɗek dədəkeɗ na gəla van vas pakə.

²³ Səzet bəlaŋɗe na gəleŋki, agəɗək kaklaw sula kəla dohoŋ də mbana.

²⁴ Sit bəlaŋɗe kaklaw sula neki, agəɗək tilit na təbəz babar kaklaw poɗo: Vasna ammba bəlaŋ pak tələn sula sula mugulit aza kiyən hurzluŋgo hurzluŋgo.

²⁵ Dəka təkzlum gəla də gazga, agəɗək bəlaŋɗe kaklaw sula.

²⁶ Tilit na təbəz babar kaklaw poɗo, ammba bəlaŋ taka pak tələn sula sula.

²⁷ Dərɓaga gəla kəla ma pehe na, agəɗək bəlaŋɗe sləre.

²⁸ Agəɗək bəlaŋɗe sula vi dəpsənəngən gbogboŋ sən kigəla, aɗɗek dəmmba təkiya.

²⁹ Aza gabban na assoŋguk ɓa'ɓa'ə, aza kiyən na asapaŋgək a təki taka addəv gokko maddaabəŋ hara, vas assoŋ sulegit pakə, assoŋguk napsən gbogboŋ sən kigəla vani.

³⁰ Bəlaŋɗe assoŋguk dodopoɗo də tilit na təbəz babara: tilit kəlaw kiyit sləre, sula sula ammba bəlaŋ taka pakə.

³¹ Agəɗək mərawaɗe net wəleŋɗe na duvurnohõ: əraw sle' aket bəlaŋɗe dəka maddaabəŋ na təkzlum gəla.

³² Əraw sle' aket bəlaŋɗe əmpa dəka masula təkzlum gəla, əraw sle' aket bəlaŋɗe əmpa dəka təkzlum gəla dəmmba təki kəla ma pehe.

³³ Agəɗək gokko naka dədeket bəlaŋɗe, tay tərwəslə.

³⁴ Akkəɗək meleŋge sit bəlaŋɗe, gokko nawgul kiyit məziyeɗ addəvən tay na meleŋge, akkəɗək meleŋge sit məziyeɗ pakə.

³⁵ Agəɗək zəga nawpak akan, iŋkile nan va əffuyo na muŋgus, pepreŋ va gozoy, ɗiwɗiwi, məɗəmən na helege na ngərayã; məveren zən dit maslay kerubaɗe muhẽt duhẽ.

³⁶ Agəɗ sənək marzeɗ dədəkeɗ na duvurnohõ poɗo, akkəɗ sit meleŋge dit məŋgba'aɗe net pakə, aziwgitik aka tilit na təbəz babar poɗo.

³⁷ Agəɗək məzlzlara na metive na gizlirke, iŋkile nan va əffuyo na muŋgus, pepreŋ va gozoy gəm ɗiwɗiwi, məɗəmən na helege na ngərayã: wəza net məhoŋ zəga yi.

³⁸ Sit zleŋɗe sle' dit məŋgba'aɗe naket məs dəlawən məzlzlara, akkəɗək metteɓ met də meleŋge, gəm tilit na təbəz pepreŋ sle'i.