Əgilye 35 - Bible en Guidar

Ərak na gəla na Maŋgəlva ( 35:1—40:38 ) Pay mobuhulon naffeti yi

¹ Moyis akkalanək wəsap net mə Israyelɗe pakə, aɓsit na: «Əpelɗe en Yawe aɗi wən neɗɗet yeŋki.

² Kəgəɗgən wəza addəv pay sləre, pay mabuhulon dəsan sukumgən salala, pay naffet na Yawe yi, ɗəf an dəgəɗ wəza pay nan na kawbayni yi.

³ Addivit gəleɗe nokum pak Kədasɗaŋ offo pay na naffet ɓa.»

Mə Israyelɗe tahəŋ əkiyaŋ əbbah neti

⁴ Moyis apel sənək əsap net mə Israyelɗe amna: Aŋki əpel an Yawe aɗi wən nan dawnəh na:

⁵ «Məgəɗ əbbah sən Yawe a walaŋkum; əbbah an məzuvəl makra papar adawki sən Yawe na: meleŋge, təbəz babara, təbəz pepreŋge,

⁶ gabaga məs iŋkile nan va əffiyo na muŋgus, an pepreŋ witwiti, an hõlhõ hõlhõ, ngərayã kukulfuto gəm deɓeke net gilewi.

⁷ Gəbeɗe net ndergeyẽɗ məhimti, gəbeɗe net zəgeɗ neret iŋkile adawyaŋ na dofeŋ gəm wəlaŋga na duvurnohõ.

⁸ Mẽl nasɗa offo kerkeri, gaŋgəlya naɗɗa ara mẽl nappaya gəm nawzla.

⁹ Gərmeŋɗe nzoloknzoloku, gərmeŋɗe nawbay gawla aza lukut na daya net məsdəlveŋge gəm taɓak na makra lukut nani.

¹⁰ Məsmaɗɗulet səret pak dəzzoŋgəni gəm dəɗɗanəngən an Yawe aɗi wən nan pakə.

¹¹ Gizlirke nassa nani, zəga nawpak akani, məŋgba'aɗe, bəlaŋɗe nani, məziyeɗ nani, bəlaŋɗe gəm təlti.

¹² Akoti dit zleŋɗe nani, man nampani, gəm məzlzlaraɗe na gabaga.

¹³ Tabəl dit zleŋɗe nani dit zəgeɗ nakan pakə, gəm peŋ nabani.

¹⁴ Lalam nawkekeɓe'e, zəgeɗ nani, gəm lalamɗe nan də mẽl nawkekeɓe' təkiya.

¹⁵ Təki nawzaɓ-Maŋgəlva na tursan, dit zleŋɗe nani, mẽl nappay na mahenziŋ gəm tursan neneke nawzla də məteŋge na maddamba na gəla.

¹⁶ Təki nawzaɓ-Maŋgəlva naɗɗa əvəl nawzla kurmbuɗuk də gazway na təbəz pepreŋ nani gəm zleŋɗe nan dit zəgeɗ nani, ŋgefleŋ də zəga nawɗiyən akani.

¹⁷ Məzlzlaraɗe na daŋgla, bəlaŋɗe nani, gabbet də məteŋge na kirit memeŋgle.

¹⁸ Məmpaɗe na gəla dit məmpaɗe na daŋgla dit helegeɗ neti.

¹⁹ Lukutɗe na mahenziŋ naɗɗa wəza addəv gəla na Maŋgəlva, lukutɗe salala na Aron məsdəlva, lukutɗe net kirtin dəɗɗaŋgən wəza na məsdəlva.»

²⁰ Wəsap net mə Israyel pak azaraŋgək səba Moyis.

²¹ Məzuvəl pak adeke, məs də əmpəs nawvəl pak akiyək əvəl sən Yawe ammba wəza na gizlirke nalma də Maŋgəlva, gəm kaɗɗa wəza nan maɓɓan pakə, Gəm viyit lukutɗe salala.

²² Zel azzoŋguk gəm gil məzuvəlaŋ də mekret papar akiyaŋgək ogoneɗi, metendeŋɗe na sləma, gəm ndama, kaysa na wəla, zəga na meleŋge pakə, ɗəf pak avəl sənək Yawe va mahenziŋ aŋgələ.

²³ Ɗəf pak məs gabaga avan məs iŋkile nan va əffiyo na muŋgus, pepreŋ witwiti, gəm hõlhõ hõlhõ, ngərayã kukulfuto, deɓeke net gilewi, gəba net timeŋgiɗ məhəmən, gəm gəba net kilfeŋge dofeŋ, akiyka.

²⁴ Əvəl na təbəz babar də an na təbəz pepreŋ pak akiynənək ka əvəl sən Yawe, an məs dit wəleŋɗe na duvurnohõ avan pak akiyik naɗɗa wəza.

²⁵ Guluk məs maɗɗulat pak təɗəmək gaɓmay də vata, akiynənək gaɓmay məɗəmən mənɗerin pəreŋ pəreŋ, pepreŋ witwiti, hõlhõ hõlhõ gəm ngərayã kukulfuto.

²⁶ Gil məsmaɗɗulet pak aɗəmaŋgək deɓekeɗ net gilewi.

²⁷ Ɗiy gugriɗ akiyaŋgək gərmeŋɗe nzoloknzoloku, gərmeŋɗe nawtip aza lukut na daya net məsdəlveŋge gəm aza gabaga na makra daya net məsdəlveŋge.

²⁸ Timbe məs məŋgənən neneke, mẽl ammba lalam gəm naɗɗa ara mẽl nappay na mahenziŋ, timbe məs məŋginit nek nawzla.

²⁹ Ɗəf mizilin dət guluk pak məs makran asili, akiyaŋgək zəga na wəza məs Yawe aɗi wən nan naɗɗa pak də ma Moyis, mə Israyelɗe akininik əvəl də mekret papar sən Yawe.

Besalel gəm Oholiyab atəŋgənək wəza

³⁰ Moyis aɓsit mə Israyelɗe na: Mula Yawe ayak Besalel wətən Uri, wətən Hur zev Yuda də iya nani.

³¹ Aknəhək də əmpəs na Maŋgəlva, də maɗɗula, də hənhən, də wəsəna, gəm də wəsən əɗɗa zəga pakə.

³² Dəɗɗumongən an naɗɗa də meleŋge, də təbəz babara, gəm də təbəz pepreŋge.

³³ Əslmet gərmeŋɗe nawtipe, əntar wəleŋɗe vi kaɗɗa wəza awandi naɗɗa pakə.

³⁴ Aɗiyək a makran əvəl nawyeget ɗiyi, va aɗi a makra Oholiyab wətən Ahisamak zev Dan.

³⁵ Aknihik də maɗɗula naɗɗa wəza naɗɗumon pakə, məpyok wəleŋɗe, məbay gawla də gabaga mənɗerin pəreŋ pəreŋgi, də an pepreŋ witwiti, də an hõlhõ hõlhõ gəm də ngərayã kukulfuto, muhũ saka məzəɗɗaŋ wəza pakə, gəm məzəɗɗumoŋ nawzaɓ zəgeɗi.