Əgilye 34 - Bible en Guidar

Kalaɓɗe na mahenziŋ meɓɓeti

¹ Yawe aɓsən Moyis na: «Asləm kalaɓɗe na gərəm sula va en na maddaabəŋ, nəvergən əpel naket kalaɓɗe na maddaabəŋ məs kəkrap neki.

² Asla zuk ka pummo, kəpeŋgən aka gərəm na Sinay dəmpummo, kəziwgən abaw adak aka dadwar ki mossorgo.

³ Ɗəf adawpeŋ də is ɓa, ɗəf adawsan aka mossorgo dəwənnan pak ɓa, may gilewi, timeŋgiɗ dit wasliɗe adawtaɗaŋ aba mossorgo van ɓa.»

⁴ Yaŋ asləm kalaɓɗe na gərəm sula va en na maddaabəŋ neki, Moyis asilik dafsən pumu, apeŋ aka mossorgo metiŋ na Sinay va Yawe aɗi sən wən nani, agimik kalaɓɗe na gərəm sula nek avani.

⁵ Yawe aprikik addəv slaybuwən aziwik dəndən adaka, Moyis ayak iya na Yawe.

⁶ Yawe atoŋguk kəlabani, aya: Yawe, Yawe, Maŋgəlva muwəl-sasãhĩ, məgəɗ mbəlembəle, awdagədəv go' ɓa, məgəɗ moggoni gəm gegesiŋ diyɗa yi.

⁷ Tay ərma moggon nan azet sayit ɗiy gabalɗe, də əɓəs heslepe, əɓoŋgo gəm mambraya, appan na məs dəraygən wən ɓa hara wazək sləma aka heslepe net afiŋgiɗit kirin aket kirtiti, gəm aket kirtit kirtiti, aza sayit mahoko'o də mapoɗo'o.

⁸ Moyis agəmək zən, ndən ɓe' afuŋ pupu'u.

⁹ Amna: «An kəɗɗak moggon nok viyu na Yawe, kəta dok a walaŋmə kamə, vi ɗiyiŋ kiyit ɓəli yi, wakəvvuyon səm heslepe nam də mambray namə, kəɗiyəmgən ka ɗiy nawray noko.»

Əmsak əsɓan wənmiyna

¹⁰ Amna: In yakəŋ iynan wənmiyna abet ɗiy nok pakgiti, wanəgəɗ zəgeɗ naggət aket məs məɗɗay ɗah aka dələv dəwənnan ɓa, may a walaŋ vandayɗe meɓɓet ɓa, ɗiy pak wawlanən na is tat addəv wəza na Yawe, an nədaɗɗa də isi nawgeslne' səni.

¹¹ Nok na arma an nəɗi suk wən nan dəpaŋka, wanərɓehet mə Amorɗe, mə Kana'anɗe, mə Hittiɗe, mə Perziɗe, mə Hivviɗe gəm mə Yebusɗe səboko.

¹² Nok na asla zuko, vi wənmiyna adawsan a walaŋguk dit ɗiy naka dələv məs kədawtoŋ addəvənəŋ ɓa, vi adakkpaŋgaŋ ka bizwil abok ɓa.

¹³ Vi kəɓzluwnəngən matuya neti, kəkrepingin serekɗe neti, kərsletingin tuya Astera neti.

¹⁴ Kədappu' sən maŋgəlva maɓɓan ɓa, vi Yawe Maŋgəlva məskotoroki, tay də kotoroku.

¹⁵ Vi wənmiyna adawsan a walaŋguk dit ɗiy naka dəlvəŋ ɓa, waɗɗaŋ polkoyo nawku dit meŋgilveɗ neti, wazaɓən-Maŋgəlva sit meŋgilveɗ neti, wayukun kəzəmgən əzaɓ-Maŋgəlva neti.

¹⁶ An kəgəmək kirtit muguluŋgit sit kirtuko, kirtit muguluŋgit waɗɗaŋ polkoyo nawku dit meŋgilveɗ neti, wapolkoyetin kirtuk mezeŋgleket dit meŋgilveɗ neti.

¹⁷ «Kədaɗɗa meŋgilveɗ mbərwək na təbəz məhəsən ammba kizuk ɓa.

¹⁸ Kərmagən pay na wəzləra məza wuɗo ɓa. Pay buhul kəzəmgən peŋ məza wuɗo ɓa, an məs nəɗi suk wən nan gala təla na bu'um, vi aka təla na bu'um kəgil sə Eziptə.

¹⁹ Uwa maddaabəŋ pak nawi yi, səddəv gazlaŋ nok pak zəga naɗɗumon noki, uwa na bəlata də an na zagara gəm na ɓaɓlama pakə.

²⁰ Uwa na bəlata na koro, kəbitgən də time awaniɓa də hawã, an kəbit na ɓa, asna kəŋzlugən wəlani, uwa nok maddaabəŋ pak kəbitgəni. Kədazzok abaw halay halay ɓa.

²¹ Əvoŋ sləre kədaɗɗa wəza, pay mabuhulon kəffetgən səma winse, gəm səma wəkkalan zəga na mabardaw, kəffetgəni.

²² Kəɗɗaŋgən wəzləra nawvoŋ buhulu, zəga na mabardaw nok maddaabəŋ, hay an kəbələ, gəm wəzləra na dəgla nama əzva.

²³ Ama wəzva pakə, ɗiy mezeŋgleket na vanday nok dəzzoŋgən təl hoku ula hara Yawe, Yawe Maŋgəlva na Israyel.

²⁴ Vi wanəmõhet vandayɗe səboko, wanəzlzleten dələv noko, ɗəf tay nawsim dələv nok pay kədawpeŋ aba Yawe Maŋgəlva nok təl hoku ama wəzva ɓa.

²⁵ Kədawtaw su wəla zəga mamayã nawzaɓ-Maŋgəlva nok sap də mepteke peŋ məhəsən ɓa, zəga mətaw wəlan ammba wəzləra na Pak, adawvoŋ kim təki dadaŋ ɓa.

²⁶ Zəga na guli nok dəsəɓ maddaabəŋ pak kəkiygən addəv gəla na Yawe Maŋgəlva noko, kədawda wət hãw də moŋvo na man ɓa.»

²⁷ Yawe aɓsən Moyis na: «Nok aver əpeləŋka, vi də əpeləŋki nəgəɗ wənmiyna də isi gəm də Israyel.»

²⁸ Asanək adak də Yawe əsɓəta kaklaw poɗo də əvoŋ kaklaw poɗo, dəzəm peŋ ɓa, dəsə iŋkile ɓa, averik əpel naddəv wənmiyna kəlaw aket kalaɓɗe neki.

Əmilye na Moyis a dibirgidiki

²⁹ Pay Moyis adawpriken səka gərəm na Sinay, tay dit kalaɓɗe sula na wənmiyna avani, gala aprik səka gərma, Moyis dəsən na haran tay uwiɗ vi adawpel dəndəni ɓa.

³⁰ Aron dit mə Israyelɗe pak awlanənək Moyis, məɗa haran tay uwiɗe, ageslne'eŋgik dawzar azani.

³¹ Moyis ayeke, Aron dit ɗiy gugriɗ na əsap net ɗiy azzoŋguk azani, Moyis apel sitike.

³² Sissiŋ mə Israyelɗe pak azaraŋgək azani, aɗi sitik wən an Yawe apel dəndən aka gərəm na Sinay pakə.

³³ Moyis agrakək əpel dənɗaŋ, asərətək məsərət kiya aka harani.

³⁴ Pay an Moyis tay əzzan kawpel də Yawe, ndən ətor məsərət kiya səka haran hã ndən viti. Ndən əpel an məɗi sən wən nan sit mə Israyelɗe.

³⁵ Mə Israyelɗe awlanən gəba na məɗa hara Moyis tay uwiɗe, Moyis əmnda əsərət məsərət kiya aka məɗa haran hã gap pay adamndan əpel dəndəni.