Əgilye 33 - Bible en Guidar

Maŋgəlva aɗiyək wən nan sən Moyis dəgəmgən tive

¹ Yawe apel sən Moyis na: «Dok səŋka, is dit en kəgilgit səka dələv na Eziptə, aka dələv məs nəsway sit may Abraham, Isak, gəm Yakob dawnəh na: Sit kirtuk nədapsiti.

² Wanəslən maslay aboko, wanərɓehet: mə Kana'anɗe, mə Amorɗe, mə Hittiɗe, mə Perziɗe, mə Hivviɗe gəm mə Yebusɗe.

³ Dok aka dələv məs moŋvo də amama adawdawaŋ akan lokloku. Nəmbat na a walaŋkum ɓa, vi ɗiy kiɓəɓəl kənanəni, wanəzokum aka tive ɗarə.»

⁴ Ɗiy aprəmənək wən mbərayənəska, assoŋguk əɗəka; ɗəf tay dəgul lukut na mayã nan ɓa.

⁵ Yawe aɓsən Moyis na: «Anah sit mə Israyelɗe na: Ɗiy kiɓəɓəl kənanəni, an nədawək pay siɗikke də mənokum na, wanəzokum kakãhə, kakaŋ məggbuk lukut na mayã səzokum, nəsəngən an nədagəɗ sukum.»

⁶ Mə Israyelɗe akgbukinik lukutɗe na mayã net səzet təŋ səza gərəm na Horeb.

Gizlirke nalma də Maŋgəlva

⁷ Moyis agəmək gizlirke al əmpan ɓuhho a mapoho na dibirgidiki, aya na: «Gizlirke nalma». Ɗəf dədawkayan Yawe pak na, ndən əgilyen kəlaza gizlirke nalma də Maŋgəlva na mapoho dibirgidiki.

⁸ Pay Moyis adawgilyan kəlaza gizlirke, ɗiy pak əsilyoŋ naway pak əziw a maddamba na gizlirke nani, ulaŋ ammba Moyis hã ndən toŋ a gizlirke.

⁹ An Moyis atoŋguk a gizlirke na, slaybuwən ɓulotto əprikeni, ndən əziw ama gizlirke, ndən əpel də Moyis.

¹⁰ Ɗiy pak tahəŋ ulanən slaybuwən ɓulotto ama gizlirke, ɗiy pak le'le', ndəɗaŋ əppu'oŋ naway pak a ma gizlirke nani.

¹¹ Yawe apelik də Moyis heret seksek va ɗəf adawpel də galani, ndən əmndan a dibirgidiki, gawla Yosuwa wətən Nun, məbbaha nani, awzar səddəv gizlirke ɓa.

Daya tay əzga meŋ də Moyis

¹² Moyis aɓsən Yawe na: «Awle is kənah su na: “Ake ɗiyiŋki,” ya kənah su ɗəf an kədawslən də in ɓa, ɓa'sa kənah suwək na, “nəsənkuk də iya noko,” gəm əmpa na, “kəɗɗak moggon nok viwa.”

¹³ Kakaŋ an kəɗɗak moggon nok viwa, arban su tive nok kana kamə, nəsunukgəni; vi kəɗɗak moggon nok viwa, awla, vandayəŋ ɗiy nokuŋgə.»

¹⁴ Amna: «In sən kiyu nədaddaw əpsuk əffete.»

¹⁵ Aɓsən na: «An kəde na is sən kiyuk ɓa na, kəkəm saŋ sam ɓa.

¹⁶ Ya kawsənən aza miy na kəɗɗak moggon nok viwa in dit ɗiy nok di? Pay kədaddok də mənami gəm mədawsam temme səzet ɗiy naka dəlvafuŋ pak ɓa sa?»

¹⁷ Yawe aɓsən Moyis na: «Wanəɗɗa va wən an kəpeləska, vi kəɗɗak moggon nok viwa, nəsənkuk də iya noko.»

¹⁸ Amna: «Kamə, arban suw gagdak noko.»

¹⁹ Amna: «Wanətoŋgən moggon naw pak dəboko, waniya iya na Yawe aboko, wanəɗɗa moggon naw aka ɗəf an nəŋgəl əɗɗa moggoni, wanula sasãh ɗəf an nəŋgəl nawla sasãhni.

²⁰ Amna: Kəɓap na ula haraw ɓa, vi ɗəf tay nawlu ndən ɗew madaran ɓa.»

²¹ Yawe amna: «Təki yaŋ azawa, kəziwgən aka milɓe.

²² Pay gagdak naw adawtoŋgo, wanəɗiyuk a popor na gərma, wanəɗup vaw akok hã an nətoŋko.

²³ Wanəgəm vaw səkoko, gəɓaw kədawla, kula na haraw ɓa.»