Əgilye 32 - Bible en GuidarIsrayel apələk wənmiyna də Maŋgəlva ( 32:1—40:38 ) Wət wasli na meleŋge 1 Ɗiy awlanən na Moyis aliyək dəpriken səka mossorgo, yaŋ ɗiy akkalaŋ aza Aron, aɓsənən na: «Asili, azaɓ səm meŋgilveɗ dədawdawaŋ abamə, vi Moyis ɗəf dəgilgəm səka dələv na Eziptəŋ məsən an dəɗɗa ɓa.» 2 Aron aɓsit na: «Məprət metendeŋɗe na meleŋge sə sləmet gil nokum, kirtukum mezeŋgleket dit muguluŋgiti, məki suwe.» 3 Ɗiy pak aprətənək metendeŋɗe na meleŋgeɗe sə sləmeti, akiysəninik Aron. 4 Atafək səveti, azaɓək mbərwək va wət wasli na təbəz məhəsən də mabəl. Aɓɗaŋ na: «Eŋkiŋ meŋgilveɗ nok məs dəgilgukun səka dələv na Eziptə Israyel.» 5 Aron awla, yaŋ arka təki nawzaɓ-Maŋgəlva aba zəga va ɗəfa, yaŋ Aron aŋgəsl vaŋvəla, amna: «Wəzləra sən Yawe mazayən.» 6 Mazayin nan asilyoŋ dafsən azaɓən-Maŋgəlva də əvəl nawzla kurmbuɗuku, akiynənək azaɓənək-Maŋgəlva vi nawrəh zazaya, ɗiy assoŋguk kawzəm gəm kawsa, le'en kasmayã. 7 Yawe aɓsən Moyis na: «Doko, apriki, vi ɗiy nok kəgilgit səka dələv na Eziptə nek azlzlaɓaŋka. 8 Amzlahaŋgək də kakara ləŋ səka tive məs nəɗi sit wən nani, aɗɗaŋgək wət wasli mbərwək na təbəz məhəsən sən kiyti, appu'oŋ sənənka, aɗɗaŋ sənənək matuya, yaŋ aɓɗaŋ na: Israyel, eŋkiŋ meŋgilveɗ noko, məs dəgilgukun səka dələv na Eziptə. 9 Yawe aɓsən Moyis na: Nulek ɗiyiŋki, wəlet suroksuroki yi. 10 Kakaŋ na, appaw də maɗɗulaw nəfə̃hgən ədagədəv naw aketi, nəzetgəni, nəɗiyukgən ka vanday metiŋgini.» 11 Moyis affetenək makra Yawe Maŋgəlva nani, yaŋ amna: «Yawe, vimi kədaŋgla əfə̃h ədagədəv nok aket ɗiy nok məs kəgilgit səka dələv na Eziptə də gbogboŋ nok gəm də va totokprok nok di? 12 Vimi ka mə Eziptiɗ dənahaŋgən na: Sən ndarsaki agilgit vi kawbeyit aka mossorgo, kawzet səka dəlva. Azzayan mokrok səza ədagədəv noko, akkpaŋgan mok səka wəɗɗa mambray aket ɗiy noko. 13 Aɗɗumon Abraham, Isak gəm Israyel belemɗe nok məs kəsway sit sən kiyko. Kənah sitik na: wanuwan mazlalwõkum va ŋgərzleɗ na disiŋ, dələv nənahəŋ pak wanəpsit kirtukum, wasan ka net faɗə.» 14 Yawe akkpaŋganək man səka ədagədəv nan aka mambray an apel nawgəɗ sit ɗiy nani. 15 Moyis akkpaŋgək aprik səggərma, dit kalaɓɗe na wənmiyna sula avan məver aka təkzlumit dahãdahã. 16 Kalaɓɗe, wəza na Maŋgəlva əŋgə, əver naketi, əver na Maŋgəlva yi, məverin aket kalaɓɗe. 17 Yosuwa aprəmək wəlet ɗiy, aɓsən Moyis na: «Ɓaɓəlma əlpay a dibirgidiki.» 18 Amna: «Ɓaɓəlma naska wəlay ɓa, ɓaɓəlma nanzay yi ɓa'a. An nədaprəm na gəlyay yi.» 19 Adan adawgap aza dibirgidiki, yaŋ awla wət wasliya, wəskəlɗe, Moyis adək gədəv diyɗa, azgetik kalaɓɗe navan nek akrep aba mossorgo. 20 Agəmək wət wasli aɗɗaŋ naka, azlak aka offo, atakaɗək takaɗ takaɗə, appukuk aket iŋkile, apsitik mə Israyelɗe asanənka. 21 Moyis anah sən Aron na: «Miy ɗiyiŋ aɗɗaŋ sukun ka kəkiygən mambray metiŋgin vaŋ aket di?» 22 Aron amna: «Gədəv daya naw adə ɓa, kəsənək is sən kiyuk na ɗiyiŋ addəv ərayəŋgə.» 23 Aɓsuwənən na: «Agəɗ səm meŋgilveɗ dədawaŋgən abamə, ɗəf Moyis dəgilgəm səka dələv na Eziptəŋ, məsən an dəgəɗ sən ɓa.» 24 Yaŋ nənah sit na: «Naway də meleŋge di? Aprətənka apsuwəni, nəndol akoffo, yaŋ wət wasliyəkəŋ təgili.» Wəzga' sən ɗəfa 25 Moyis awlak na, Aron appetik ɗiy əɗɗa an aŋglaŋgə, kpaŋgit ɗiy ka zəga nawmas net məzuseɓɗe neti. 26 Moyis aziwik a maddamba na dibirgidik, amna: «Naway na Yawe di, dəde azawa!» Kirtin Levi akkalaŋgək azan pakə. 27 Aɓsit na: «An Yawe, Maŋgəlva na Israyel anah yaŋka: Naway pak dəlaw masalam nani, mətoŋgu, məmsak ətoŋ maddamba də maddamba a dibirgidiki, ɗəf pak dəbay məlməni, dəbay galani, gəm dəbay meggeni.» 28 Kirtin Levi aɗɗaŋgək va əpel na Moyis, dəpas kaka' ɗiy amtaŋgək gap gabal hoku. 29 Yaŋ Moyis amna: «Dəpaŋ məɗikumi ka na Yawe, vi ɗəf pak a gəla wətəni, gəm a gəla məlməni, vi kapsukum wəzaɓ nan dəpaŋka.» Moyis tay əkkaman Maŋgəlva dəvvuyongən mambray na Israyel 30 Mazayən nan Moyis anah sitik ɗiy na: «Kəɗɗaŋgək mambray metiŋgini, ya kakaŋ wanəpeŋ aza Yawe kuzuŋ wanəvvuyon mambray nokum soko.» 31 Moyis amndanək aza Yawe, yaŋ amna: «Kamə, ɗiyiŋ aɗɗaŋgək mambray metiŋgini, aɗɗaŋgək meŋgilveɗ na meleŋge sən kiyti.» 32 Ya kakaŋ na, agəm mambray neti, an vaski ɓa na kamə avvuyow səddəv ɗerewel nok an kəveri. 33 Yawe aɓsən Moyis na: «Naway dəgəɗ mambray azaw di? Anani yi nədavvuyon səddəv ɗerewel nawa. 34 Ya kakaŋ na, doko! Ake ɗiy a təki nənoh suko, maslay naw yaŋ wambat aboko. Ya pay nədaɗɗum aka wən nan na, asna wanəzge'sit aka mambray neti.» 35 Yawe argek ɗiy də wəray aka an aɗɗaŋgə, wət wasli an Aron agəɗə. |
All right reserved
Bible Society of Cameroon