Əgilye 30 - Bible en Guidar

Matuya na tursan

¹ Kəzaɓgən təki nawzaɓ-Maŋgəlva kawzla tursan, də wəlaŋga na duvurnohõ kədawzaɓən.

² Zezek nan wəɗak na metər, slosloprok nan wəɗak na metər, təkzlumun dakadaka poɗo adawsani, gəm əɓay nan metər taka. Mohõn dəsan sler dəndəni.

³ Kəkkəɗ səngən meleŋge saksakə, kini, maŋgavan suləkə gəm mohoŋ, kəbay səngən genhẽ aza man na meleŋge suləkə.

⁴ Kəgəɗ səngən ndemeɗ na meleŋge kəlamba man aka maŋgavan sula, kəɗɗegin aka təkzlumun sula dəsangən nawgul zleŋɗe kawslan dinditi.

⁵ Kəbəlgən zleŋɗe na duvurnohõ, kəkkəɗ sitgən meleŋge.

⁶ Kəɗigən aba məzlzlara naka akoti na ɗerewel na wənmiyna, aba man naka miziwe məs nədawləm suk adaka.

⁷ Aron dəzlagən tursan adak aza va təki addaŋ pakə, pay adawzeɓet lalamɗe, dəzlagəni.

⁸ Pay Aron adasɗe lalamɗe də pay piriŋpiriŋgi, dəzlagən tursan ɗayɗay aba Yawe aza sayit kirtukum.

⁹ Kədaɗɗaŋ tursan malakan akan ɓa, əvəl nawzla kurmbuɗuk ɓa, əvəl net wəleŋɗe ɓa, kədawpesleŋ mbazla akan ɓa.

¹⁰ Ama əzva Aron dəzaɓgən-Maŋgəlva navvuyon mambray təl taka aka mohoŋ dit mbel na əzaɓ-Maŋgəlva. Təl taka ama əzva adazaɓ-Maŋgəlva navvuyon mambray akan va sayit ɗiy nokum adaɗɗa. Əzaɓ-Maŋgəlva as wasan salala sən Yawe.

Nzalaka ammba gəla na Maŋgəlva

¹¹ Yawe apel sən Moyis, amna:

¹² «Pay kədaŋɗet mə Israyelɗe, va əŋɗa net asani, asna ɗəf pak dəfaɗ səngən Yawe nawbit megenegeneni, pay adaŋɗetin na, gəbay tay dədawrihit pay naŋɗet ɓa.»

¹³ Ɗəf dədawtoŋ a təki naŋɗa pak aŋki adawfaɗa: təbəz babar gəram sle' sən Yawe, va gəram naddəv gəla na Maŋgəlva adawgəmaŋ sənəni.

¹⁴ An dədawtoŋ a təki əŋɗa pakə, təŋ səza əzva kaklaw sula gap day kiy aska, wafaɗ əvəl sən Yawe.

¹⁵ Məsarya adawɗi day ki gəram sle' ɓa, məssahã adaggəsan səza gəram sle' va mətawən nawfaɗ sən Yawe vi navvuyon mambray na ɗəf nan ɓa.

¹⁶ Kəgəmgən koɓeɗ navvuyon mambray səvet mə Israyelɗe, kəɗigin vi wəza na gizlirke nalma də Maŋgəlva, dəsangən ka zəga naɗɗumon net mə Israyelɗe aba Yawe kavvuyon mambray səkokumu.

Ŋgefleŋ nawpesle

¹⁷ Yawe apel sən Moyis, amna:

¹⁸ Kəgəɗgən kasli marga nawpesl na təbəz pepreŋge, gəm tələn na təbəz pepreŋge, kəɗigən aka walaŋ gizlirke nalma də Maŋgəlva də təki nawzaɓ-Maŋgəlva, kəzigən iŋkile addəvən.

¹⁹ Aron dit kirtin dəɗanəngən vet də tilit dənɗaŋgə.

²⁰ Pay adawtoŋgoŋ addəv gizlirke nalma də Maŋgəlva na, dəslslayaŋgən dit iŋkile veti, vi adamtaŋ pay adawzaraŋ go'o aza təki nawzaɓ-Maŋgəlva kaɗɗa wəza nawzla way sən Yawe ɓa.

²¹ Waɗanən vet də təlti, vi amtaŋ ɓa. Dəsangən ka an məɗi wənan faɗə, səni gəm sit kirtin aza sayti.

Mẽl nappay na mahenziŋ

²² Yawe apel sən Moyis, amna:

²³ «Akay tursan sən kiyko, mẽl va telembe məs əŋgiti kilo sle'i, sinnamom məs məŋgənən pəɗak nani, kilo sula də mani, goɗoŋgoy məs məŋgənən nenek kilo sula də mani.»

²⁴ Gəm kirtin bebeserek kilo sle'i, aza gagdak naddəv gəla na Maŋgəlva, də mẽl na hereme litər sləre.

²⁵ Kəɗɗegən ka mẽl nappay na mahenziŋ salala, məs mədə tursan aslãhãni, ka mẽl nappay na mahenziŋ salala.

²⁶ Kəpeslgən gizlirke nalma də Maŋgəlva, gəm akoti na wənmiyna dəndəni.

²⁷ Gəm tabəl dit zəgeɗ nan pakgiti, təki nawɗi lalam dit zəgeɗ nan pakə, təki nawzaɓ-Maŋgəlva nawzla tursan.

²⁸ Təki nawzaɓ-Maŋgəlva naɗɗa əvəl nawzla kurmbuɗuk dit zəgeɗ nan pakə, ŋgefleŋ də zəga nawɗiyən akani.

²⁹ Kəwel sugin dəssoŋgən salala an faɗə, zəga an dədawne' azet pak wasan salala.

³⁰ Kəppay sitgin may Aron dit kirtini, kəpeslgin vi dəɗɗaŋ sugən wəza na məsdəlva.

³¹ Kənah sitgin mə Israyelɗe, də wənəh na: «Aŋ mẽl nappay na mahenziŋ salala naw adawsani, vi sayit kirtukum.»

³² Adappay aza ɗəf təttaka dayday ɓa; ɗəf adasɗeken əslãh nan dayday ɓa, vi salala yi, dəsan azokum salala.

³³ Ɗəf dəgəɗ tursan va ndəni, dəppay sən ɗəf ɗarə, asna kawgilgini yi səret ɗiy nani.

Əda tursan na matuya

³⁴ Yawe aɓsən Moyis na: «Agəm zəgeɗ məs məŋgənit nek sən kiyko: timbe na wəlaŋga neneke, gərəm mazakalyãkalyã, zəga məzəffok məs adawyaŋ na galbanum gəm zəga məffok neki wəɗak dakadaka adawsani.

³⁵ Kəɗɗagən ka tursan məslãhãn va əda na mədə tursan, lem, saksak, salala.

³⁶ Kətakaɗgən kuɗkuɗu, kəɗigən aba akoti naddəv gizlirke nalma də Maŋgəlva məs nədawləm suk adaka, dəsangən salala an faɗ vikum.

³⁷ Tursan an kədaɗɗa va ndənəŋka, kədaɗɗaŋ ammba kiykum ɓa; dəsangən salala viko, sən Yawe yi.

³⁸ Ɗəf an dədasɗeken vi kaffok məŋgənni, asna kawgilgəni səra vanday net ɗiy nani.»