Əgilye 3 - Bible en Guidar

¹ Moyis tay ətaɗ gilew na Yetro, afət goni, məsdələv na Madiyan. Akek gilew balsən kapta-muyã, agap aba gərəm na Maŋgəlva, a Horeb.

² Maslay na Yawe arbanək zən azan addəv herzləm offo, sə weleŋgit gaslambeɗi. Ndən təmə: awla offo tay əgilyen səddəvit gaslambeɗi, ya gaslambeɗ dəzlaŋ ɓa.

³ Moyis amna: «Nəsulək kawla səserge metiŋgin nəwələŋka: vimi gaslambeɗ awzlaŋ ɓa di?»

⁴ Yaŋ Yawe awla na, tay əkkpaŋ kawla, Maŋgəlva ayak səddəvit gaslambeɗi: «Moyis! Moyis!» Amna: «In yakəŋkə!»

⁵ Amna: «Kəzar aŋ ɓa! Akgbuk hensek noko, vi təki məs kəziwiŋka, salala yi.»

⁶ Yaŋ amna: «Intə Maŋgəlva na afuko, Maŋgəlva na Abraham, Maŋgəlva na Isak, Maŋgəlva na Yakob.» Moyis aɗamanək harani, vi tay əgeslne' dawla Maŋgəlva.

⁷ Yawe amna: «Nulak wəzəmsahã net ɗiy naw a Eziptə, nəprəmək əhəm net ama wərga net məzusərən meti. Vi nəsənək tatwãh neti.

⁸ Nəprik na, vi kawkõhgit səvet mə Eziptiɗi, kawgilgit səka dəlvəŋ, kawket aka dələv moggon fədiy fədiyə, aka dələv məs moŋvo də amama adawdawaŋ akan lokloku, kəlaka təki net mə Kana'anɗe, na Hitti, na Amori, na Perzi, na Hivvi, gəm na Yebusi.

⁹ Ya kakaŋka əhəm net mə Israyelɗe agapuwa, adan nulak tatwãh gagdak mə Eziptiɗ aɗi sitin gəresi,

¹⁰ kakaŋ na, doko; nəslunuk aza məlĩ Farawən, agilgit su ɗiy naw mə Israyelɗe sə Eziptə.»

Maŋgəlva tay ərban iya nan sən Moyis

¹¹ Moyis aɓsən Maŋgəlva na: «Nawa nan nəmbatgən aza Farawən, ka nəgilgitgin mə Israyelɗe sə Eziptə di?»

¹² Maŋgəlva amna ha'aw: «IN TAT də isi. Awle, zəga an narban suk na, intə nəslunko: pay kədawgilgit ɗiy naw sə Eziptə, kəgagdakanəngən Maŋgəlva aka gərməŋka.»

¹³ Moyis aɓsən Maŋgəlva na: «Yaŋ in tat əddaw azet mə Israyelɗe, wanənah sit na: Maŋgəlva net afiŋgiɗkum dəslənu azokum. An anahaŋ suwənək na: mbari yi iya nan di na, mbar nədawneh sit di?»

¹⁴ Maŋgəlva aɓsən Moyis na: «IN TAT MƏS NƏSAWA.» Yas amna: «Kənah sitgin mə Israyelɗe vaska: IN TAT dəslənu azokum.»

¹⁵ Maŋgəlva anah sən Moyis əmpa na: «Yaŋ an kədawpel sit mə Israyelɗe: Yawe, Maŋgəlva net afiŋgiɗkum, na Abraham, Maŋgəlva na Isak, Maŋgəlva na Yakob, dəslənu azokum. Aski iya naw faɗə, vaski adakkamawən aza va sayit ɗiy asani.

¹⁶ Doko, akkelet ɗiy məsɓet na Israyel, anah sit na: Yawe, Maŋgəlva net afiŋgiɗkum, Maŋgəlva na Abraham, na Isak, na Yakob, dərban zən azaw, dawnah su na: Nətoŋ addəv wən nan ambokum na, aka an məgəɗ sukum a Eziptə yi,

¹⁷ nənahək na: wanəgilgukum səka wəzəmsahã na Eziptə, Kawkukum kəlaka dələv na Kana'an, na Hitti, na Amori, na Perzi, na Hivvi, gəm na Yebusi, aka dələv məs moŋvo də amama adawdawaŋ akan lokloku.

¹⁸ Waprəmən moko, kətoŋgoŋgən, ana məlĩ na Eziptə da, isi, gəm ɗiy məsɓet na Israyel; kənahaŋ sənəngən na: Yawe, Maŋgəlva net mə Ibriɗ, arbanək zən azamə; ya kakaŋ na, kamə, mam aka əmbat malaka nasɓəta hoku aka ədaw a kapta-muyã, ətaw wəla zəga nawzaɓ-Maŋgəlva sən Yawe, Maŋgəlva namə.

¹⁹ Ya naw Nəsənək hara na, məlĩ na Eziptə appokum na kəddoŋgən ɓa, an wəlan məskan ɓa ɓa.

²⁰ Vasna wanəslan vaw aka dələv na Eziptə, wanərga dit sekeneɗ temtem məs nədaɗɗa akani. Dərɓaga aska, wappokum kəmbataŋgəni.

²¹ Wanəkkpeŋget mə Eziptiɗ dulanəngən sasẽhit ɗiy nokum; vokum asan na halay halay pay kədaddoŋ ɓa:

²² Guluk pak watəssõh zəgeɗ na təbəz babara, na meleŋge, lukutɗe azat meggeta də azat məsgəlata; kəslan sitingin aket kirtukum mezeŋgleket dit muguluŋgiti. Vaski kədappəttin mə Eziptiɗi.»