Əgilye 29 - Bible en Guidar

Wəɗi net məsdəlveŋge aka wəza neti

¹ Zəga an kədaɗɗa viyit kawɗiyit dəɗɗaŋ sugən wəza na məsdələv yaŋka: Agəm medgeɗge taka, wət wasliya gəm ndergeyẽɗ sula məza heslepe azet ɓa,

² sissiŋ peŋ məza wuɗo aran ɓa, gəpa na meleŋge məza də wuɗo ɓa, məslahəŋ də mẽle, hellem məza wuɗo ɓa də mẽl kaka'ə; kəɗɗegən də gəpa na toksor.

³ Kəziygən a kəggəl, kəkiygən kəggəl van məstaka də medgeɗge gəm ndergeyẽɗ sula nek addəv gəla na Maŋgəlva.

⁴ Kəkagən Aron dit kirtin a maddamba na gizlirke nalma də Maŋgəlva, dəslslayaŋgən aret iŋkile.

⁵ Kəndegən lukutɗe, kəgul səngən lukut məgbəŋtəŋga sən Aron, lukut na daya net məsdəlveŋge na helege na ngərayã, taɓak na ngərayã na makra lukut net məsdəlveŋge; kətokgin met helegeɗ na ngərayã,

⁶ kətər səngən kiyən də mətərkiya, kəgəɗgən zəga nawsənən aza mətərkiya nawɗi nan aka wəza;

⁷ sissiŋ kəgəmgən mẽl na mahenziŋ, kəman səngən akani, kəppay səngəni vi kawpeslin.

⁸ An məkiyti kirtini, kəgul sitgən parmeleɗi,

⁹ kiynan sitgən dedeket də maslapa, Aron dit kirtini, kəɗup sitgən kulpup na məsdələv aketi, wəza na matuya aveti yi, va mahenziŋ anahə akkpaŋ na ɓa. Vas Aron dit kirtin adawgəmnən wəza.

¹⁰ Kəkiygən medgeɗge aba gizlirke nalma də Maŋgəlva; Aron dit kirtin dəɗiynəngən vet aka medgeɗge vani.

¹¹ Kətawgən wəla medgeɗge van aba Yawe a maddamba na gizlirke nalma də Maŋgəlva.

¹² Kətefgin mbel na medgeɗge, kəɗigin də vok azet mohõ təki nawzaɓ-Maŋgəlva. Sissiŋ kəzlifgin mbel dəppan net aza gabba təki nawzaɓ-Maŋgəlva.

¹³ Kətorgən səlhã naddəvən pakə, pəɗak na memɗeke gəm kiritdəɓa də səlhã naketi, kəzlegin aka təki nawzaɓ-Maŋgəlva.

¹⁴ Kəzlagən slu na medgeɗge, gəba nani gəm sensen a mapoho na dibirgidiki. Nan əzaɓ-Maŋgəlva navvuyon mambray yi.

¹⁵ Kəgəmgən ndargayã taka, Aron dit kirtin dəɗiynəngən vet aka ki ndargayã vani.

¹⁶ Kətawgən wəla ndargayã, kətefgin mbel nani, kəksu'gin ki təki nawzaɓ-Maŋgəlva tərwəslə.

¹⁷ Kətawangən ndargayã van də ngaɗakən, kəskoɓgən herɗen gəm tetewirgeni, kəɗiygin aket ngaɗakənɗe neki gəm aka kini.

¹⁸ Kəzlagən ndargayã van dəwənnan aka təki nawzaɓ Maŋgəlva. Ndəni əvəl nawzla kurmbuɗuk sən Yawe, məŋgənən dəffeten səngən makrani, nan way məhhətən sən Yawe yi.

¹⁹ Asna kəgəmgən ndargayã masula'ən may Aron dit kirtin dəɗiynəngən vet aka ki ndargayã vani.

²⁰ Kətawgən wəla ndargayã, kəgəmgən mbel nan kənisgən aza mətekɗeke na sləma Aron gəm aza mətekɗeke na sləmet kirtin dəka dəzəŋ, aza vet mizilin dəzəŋ, tilit mizilin dəzəŋ; gəm kəksu'gin mbel ki təki nawzaɓ-Maŋgəlva tərwəslə.

²¹ Kəgəmgən mbel naka təki nawzaɓ-Maŋgəlva neki gəm mẽl nappaya, kəksu'gən aka Aron gəm aket lukutɗe nani, aket kirtini gəm aket lukuɗe net kirtin sap dəndəni, wassoŋ məweliti, ndən dit lukutɗe nani, kirtin dit lukutɗe net sap dəndəni.

²² Kəgəmgən səlhã na ndargayã gəm kuturni. Səlhã naka zəga naddəvən, pəɗak na memɗeke, kiritdəɓa sulegiti gəm səlhã naketi gəm mettile dəzəŋ, vi ndargayã van nawɗi ɗəf aka wəza yi.

²³ Kəgəmgən peŋ məhurzluŋgo taka, peŋ na gəpa məllaɓən də mẽl mədan taka gəm peŋ va gbirdidi taka səddəv hĩlĩw na peŋ məza wuɗo ɓa naba Yawe.

²⁴ Kəɗigən bayman pak aka dagrakay va Aron gəm aka dagrakay vet kirtini, dəpsuwəngən də əzokon aba Yawe.

²⁵ Kətefgin səveti, kəzlagən aka matuya aka əvəl nawzla kurmbuɗuku, vi məŋgənən dəffeten səngən makra Yawe, ndəni way məhhətən sən Yawe.

²⁶ Kəgəmgən makra ndargayã na wəzləra nawɗi Aron aka wəza, kəzokongən dəzok aba Yawe, dəsangən ka haran noko.

²⁷ Kəwel sugən makran məzokon nak gəm mettile ndargayã məɗi Aron dit kirtin aka wəza nak də mahenziŋ.

²⁸ Dəsangən haran nawgəm na Aron dit kirtin səvet mə Israyelɗe faɗə, vi nan əvəl nawgəmi, səza əzaɓ-Maŋgəlva nawrah zazay net mə Israyelɗe sən Yawe adazzani.

²⁹ Lukutɗe na wəza məpsən Aron wassoŋ ka net kirtin dərɓagani, vi pay nappay sit mẽlẽ gəm napsit weza.

³⁰ Məsdələv səret kirtin məs dədawgəm gəlan wagul pay buhulu, ndəni dədawtoŋ a gizlirke nalma də Maŋgəlva kaɗɗa wəza addəv təki nawzaɓ-Maŋgəlva.

³¹ Kəgəmgən ndargayã nawɗi ɗəf aka wəza, kədagən slu nan a təki na mahenziŋ.

³² Aron dit kirtin dəzəmnəngən slu na ndargayã vani, gəm peŋ naddəv hĩlĩw ama gizlirke nalma də Maŋgəlva.

³³ Dəzimningin zəgeɗ məɗɗet navvuyon mambray səketi, vi məwelitin kawɗiyit aka wəza. Ɗəf molhõyõ adawzəm ɓa vi zəgeɗ net salalaŋgə.

³⁴ An slu nawɗi ɗəf aka wəza apələk də peŋ hã dəmpummo, asna kəzlagən aka offo, kawzəmni ɓa, vi salala yi.

³⁵ Va nəɗi suk wən nani, vaski kədawgəɗ sit may Aron dit kirtini, wəzləra napsit wəza pay buhul adaɗɗa.

³⁶ «Medgeɗge taka kədataw wəlan va təki addaŋ pakə, vi əzaɓ-Maŋgəlva navvuyon mambraya. Kəzaɓgən-Maŋgəlva vi mambray aka matuya, an is tat əvvuyon mambray akani, kəppay səngən mẽl vi kawpeslin.

³⁷ Pay buhul kədazban mahenziŋ navvuyon mambray aka təki nawzaɓ-Maŋgəlva, kəwelgin dəsangən təki nawzaɓ-Maŋgəlva salala an faɗə, an dərəŋgən matuya pak wasan salala.»

Əzaɓ-Maŋgəlva va an dəslə ɗayɗayə

³⁸ Aŋki kədaɗɗa aka matuya, kirit timeŋgiɗ mezeŋgleket sula na əzva taka taka pay pakə.

³⁹ Wət time mizilin an taka, kəfotgən pummu, wət time mizilin an masulani, kəfotgən də pay piriŋpiriŋgi.

⁴⁰ Gəpa gap kilo hoku məllaɓən də mẽl məɗotən na hereme litər taka də wəɗak nani gəm mbazla nawpesl litər taka də wəɗak nan ammba wət time mizilin taka.

⁴¹ Wət time mizilin masulani, kəfotgən də pay piriŋpiriŋgi kapsən sap də əvəl an də zəga na mabardaw də mompumo, mbazla nawpesl nan ammbani, kəɗɗaŋgən anan ka zəga məs məŋgənən nek naffeten makrani, way məhhətən sən Yawe yi.

⁴² As əvəl nawzla kurmbuɗuk aza pay nan faɗi kədaɗɗanən aza sayit ɗiyit nokum a ma gizlirke nalma də Maŋgəlva aba Yawe, adaki nədawləm sukum, adak nədawpel suko.

⁴³ Adak Nələmsit mə Israyelɗe, a təki nəwel də gagdak nawa.

⁴⁴ Wanəpesl gizlirke nalma də Maŋgəlva gəm təki nawzaɓ Maŋgəlva; wanəwel Aron dit kirtin dəssoŋgən məsdəlveŋge nawa.

⁴⁵ Wanəsaw də gəla a weleŋgit mə Israyelɗe, wanəsaw ka Maŋgəlva neti.

⁴⁶ Wasənnən na, intə Yawe Maŋgəlva net məs dəgilgit səka dələv na Eziptə, vi nəsawgən də gəla a weleŋti. «In Yawe Maŋgəlva neti.»