Əgilye 28 - Bible en Guidar

Lukuɗe net məsdəlveŋge

¹ Agim may məlmuk Aron, gəm kirtini, sə weleŋgit mə Israyelɗe, dəɗɗaŋ suwəngən wəza na məsdəlva, Aron, Nadab, Abihu, Ele'azar gəm Itamar, kirtin Aron.

² Kərmah səngən lukutɗe na mahenziŋ naɗɗa wəza sən Aron məlmuko, gagdak nan dərbəgəni.

³ Nok, kənah sitgən ɗiy məsmaɗɗulet məs nəknih də maɗɗula, kənah sitgən na, dərmah sənən lukutɗe sən Aron, vi dəgulgən pay nawgəm wəza, gəm pay adaɗɗa wəza na məsdəlva.

⁴ Vaŋ, adarmehnin lukutɗe veti: lukut na makra ɗəfa, lukut na daya net məsdəlveŋge, lukut silipi, lukut məgbəŋtəŋga məɓəslən, mətərkiya, gəm maslapa nagzeni. Vasna dərmahaŋgən lukutɗe na matuya sən məlmuk Aron, gəm net kirtini, vi dəɗɗaŋ suwəngən wəza na məsdəlva.

⁵ Dəɗɗaŋgən wəza də meleŋge, iŋkile na əffuyo na muŋgus, gozoy, hõlhõ də ngərayã.

Lukut na daya net məsdəlveŋge

⁶ Iŋkile na lukut na daya net məsdəlveŋge dəsan na meleŋge, na əffuyo na muŋgus, gəm na gozoy, hõlhõ gəm ngərayã, wəza net ɗiy dəsənaŋ zəga yi.

⁷ Helegeɗ dəssoŋ sula aza metteɓ man dahãdahã na əlawni.

⁸ Helegeɗ na lukut na daya net məsdəlveŋge, nan məstaka də zəni: na meleŋge, mənɗerin pəreŋ pəreŋgi, pepreŋ va gozoy, holhõ gəm ngərayã məɗəmən.

⁹ Kəndəgən gərmeŋɗe nzoloknzolok sula, kəvergən iya net mə Israyelɗe aketi:

¹⁰ iya net sləre, aka gərəm maddaabəŋ, dəmbraŋ sləreŋ əmpa aka gərəm masulani, də dəbər ki ziti.

¹¹ Mətaw gərəm dədawtip iya net mə Israyelɗe aketi, va adawɗiyaŋ tampoŋ; kəgulgin addəvit gəlet na meleŋge.

¹² Kətipgin gərmeŋɗe nek azet helegeɗ na lukut na daya net məsdəlveŋge vani, gərmeŋɗe vetis wassoŋ ka zəga naɗɗumet mə Israyelɗe, Aron dəkagən iya net aba Yawe, aket helegeɗ suleŋ vi nəɗɗumokumgəni.

¹³ Kəzaɓgən gəlet nawgulit addəvit sula na meleŋge

¹⁴ gəm ngiyamɗe nanarɗe sula, na meleŋge saksakə, kəɗɗegən va helege məɗəmti, kəslaketgin aza gəlet naka.

Taɓak na makra lukut na daya net məsdəlveŋge

¹⁵ Sissiŋ kəgəɗgən gabaga na makra ɗəf nawtaw wəna, wəza na məbay gawla adawsani; kəɗɗaŋgən va məɗɗa lukut na daya net məsdəlveŋge, na meleŋge kədaɗɗa, mənɗerin pəreŋ pəreŋgi, pepreŋ va gozoy, holhõ holhõ gəm də helege na ngərayã kukulfut məɗəmən kədaɗɗani.

¹⁶ Təkzlumən poɗo dakadaka məmaslən haran sula adawsani, zezek nan va ɗəf papar taka, slosloprok nan va ɗəf papar taka.

¹⁷ Kəverengin ŋgbeɗeɗe dit gərmeŋɗe na sləma wədor poɗo. Wədor taka: lawkakanya, nzoloknzoloku, gəm ma kolobo. Wədor an maddaabəŋgi yi;

¹⁸ wədor masulani: gərəm zulazula, tirtiri gəm na təbəz ɓəɓəla;

¹⁹ Wədor mahoko'ən: Barbarə, lekeɗek lekeɗek, pepreŋ liwliwi;

²⁰ Wədor mapoɗoni: dit en va mabazaya, en nzoloknzoloku, en titir ɗeslɗesli. Məgulit addəv gəlet na meleŋge nawŋgbeɗeɗet adassoŋgu.

²¹ Gərmeŋɗe vet wassoŋ aza iya na mahəlfa net mə Israyelɗe, gərmeŋɗe vet kəlaw kiyit sulaŋgə; wassoŋ məverit va tampoŋ aza iya pakə, wassoŋ vi mahəlfa kelaw kiyən sula.

²² Kəgəɗgən ngiyamɗe məturoɗit gəm məɗimit na meleŋge saksak aza gabaga na makra ɗəfa.

²³ Kəgəɗgən ndemeɗ na meleŋge sula, kərmehgən ndemeɗ vet aza metteɓ ma gabaga na makra ɗəf naka.

²⁴ Kətokgən helegeɗ na meleŋge məɗimit nek azet ndemeɗ sula neki, aza metteɓ ma gabaga na makra ɗəfa,

²⁵ metteɓ met everzleɗ məbaya sula nek kətokgin aza gəlet sula naka. Kəŋgbe'igin azet helegeɗ naza lukut na daya net məsdəlveŋge kəlabani.

²⁶ Kəgəɗgən ndemeɗ na meleŋge, kəɗɗegin aza metteɓ ma gabaga na makra ɗəf sulegiti, aza lukut na daya net məsdəlveŋge kəladdəvən kədarmehti.

²⁷ Kəgəɗgən ndemeɗ na meleŋge sula, kəɗɗegən azet helegeɗ na lukut na daya net məsdəlveŋge sula neki, aza gabbet dəbe, go'o də təki əsap neti, disiŋ kiy helegeɗ na lukut na daya net məsdəlveŋge.

²⁸ Kawsapan gabaga na makra ɗəf nak dit ndemeɗ nan azet ndemeɗ na lukut na daya net məsdəlveŋge də helege mənɗerin va əffiyo na muŋgus vi dəsangən aza gabaga nawlaw aka lukut na daya net məsdəlveŋge, vasna gabaga na makra ɗəf van awzar səka lukut na daya net məsdəlveŋge ɓa.

²⁹ «Pay adawtoŋ addəv təki nawzaɓ-Maŋgəlva, Aron dəlawgən a makran, aka gabaga na makra ɗəf nawtaw wəna, iya net mə Israyelɗe naɗɗumon aba Yawe hã faɗə.

³⁰ Kəɗigin Urim də Tummim addəv gabaga na makra ɗəf na ətaw wəna; Wassoŋ aka makra Aron pay adawtoŋ aba Yawe: Aron dəgəmgən ətawwən net mə Israyelɗe a makran faɗ, aba Yawe.»

Lukutɗe meɓɓet na matuya

³¹ Sissiŋ lukut məsilip məs kədarmaha, dəsangən mənɗerin va uffiyo na bəbərət mətəwək dəwənnani də lukut na daya net məsdəlveŋge.

³² Ma wəlan dəsan foŋgo nawgul ki ɗəf addakən, sulək ma wəlan na, wasan wəza net məhõŋ saka; Təki foŋgo nanəŋ dəsan va lukut na təbəz nawgaya, məza nawngari yi kpak ɓa.

³³ Aza gabban məwendeŋgeŋka, kəgəɗgən weweɗe mənɗerit va əffiyo na muŋgus, na gozoy, gəm na hõlhõ ɗiwɗiwi, tərwəsl ammba gabban məwendeŋgeŋka, sə weleŋti, kəgəɗgən motondoloŋɗe na meleŋge tərwəslə:

³⁴ Wewe taka motondoloŋ taka, wewe taka motondoloŋ taka, wewe taka, aza gabba lukut məslip tərwəslə.

³⁵ Aron iyi dədawgul lukut nan pay adaɗɗa wəza; ɓaɓəlmet motondoloŋɗe dəprəmgən pay atoŋ aba Yawe addəv təki nawzaɓ-Maŋgəlva, gəm an tay əgilyeni: vasna: amtə na ɓa.

³⁶ Kəvotgən miypa'a na meleŋge saksakə, kətiɗipgən azan va adawɗiyaŋ tampoŋ: «Məpsən Yawe»,

³⁷ kəɗɗaŋgən aka gabaga iŋkilen va əffuyo na muŋgus, dəsangən aka mətərkiya də bani.

³⁸ Miypa'a nan dəsangən a mirbiz Aron vi dəslangən mambray məɗɗan azet zəgeɗ en mə Israyelɗe avəlaŋ na matuya pakə: Dəsangə pay pak a mirbizin vi Yawe dənnekgən də əvəl vani.

³⁹ Sə dərɓagan na, kəhõhgən lukut na ngərayã, kəgəɗgən mətərkiya na ngərayã; kəgəɗgən maslapa nagze məvereni.

⁴⁰ Net kirtin Aron na, kərmah sitgən lukutɗe məgbəŋtəŋga na sləma, kəgəɗ sitgən maslapeɗ nagze; sissiŋ kəgəɗ sitgən mətərkiyeɗi, karban na ɗiy gagdakɗeŋgə.

⁴¹ «Kəgul səngən lukut sən Aron məlmuko gəm sit kirtin dəndəni, kəppay sitgən mẽl na mahenziŋ, kəɗigən aka wəza, apesle, dəɗɗaŋgən wəza na məsdəlva.

⁴² Agəɗ sit bente na ngərayã vi kawɗaman zirndiwwe na ziti; dətəŋgən səza gizeti gap aza mettileti.

⁴³ May Aron dit kirtin dəndetingin pay adawtoŋgoŋ addəv gizlirke nalma də Maŋgəlva awaniɓa an tahəŋ əzaraŋ aza təki nawzaɓ-Maŋgəlva naɗɗa wəza addəv Gəla na Maŋgəlva, vi adawslanən mambray himbit kamtaŋ ɗar ɓa. Mahenziŋ məs akkpaŋ na ɓa yi, akan dit kirtin dərɓagani.»