Əgilye 27 - Bible en Guidar

Təki nawzaɓ-Maŋgəlva nawda tuyaɗe

¹ Kəzaɓgən təki nawzaɓ-Maŋgəlva dit wəleŋɗe na duvurnohõ: zezek nan dəsangən metər sula də mani, slosloprok nan metər sula də mani. Təki nawzaɓ-Maŋgəlva van dəsangən təkzlumən poɗo dakadaka, əɓay na təki nawzaɓ-Maŋgəlva van metər taka də mani.

² Aka əŋzla nan poɗogən pakə, kəgəɗgən mohõŋɗe dəssoŋ sler dəndəni, kəkkəɗ sitgən təbəz pepreŋge.

³ Kərkəgən kasliɗe na moŋglo na təki nawzaɓ-Maŋgəlva, ziginɗe, məɗawaɗe naksu' mbeli, zəgeɗ ma yorkok nampa sluwa, met kasliɗe; də təbəz pepreŋ kədaɗɗe zəgeɗis pakə.

⁴ Kəhũhsəngən gazway na təbəz pepreŋge, kəvotgən ndemeɗ gugriɗe na təbəz pepreŋ poɗo aza ma gazway poɗogən pakə.

⁵ Kəɗigən gazway na təbəz pepreŋ van ammba ma təki nawzaɓ-Maŋgəlva, aza gabbani, dəgəɗgən wəɗak nawɓay na təki nawzaɓ-Maŋgəlva.

⁶ Kəzaɓgən zleŋɗe sən təki nawzaɓ-Maŋgəlva, zleŋɗe na wəlaŋga na duvurnohõ, kəkkəɗ sitgən təbəz pepreŋge.

⁷ Kawgul zleŋɗe vet addəvit ndemeɗ gugriɗe naka maŋgava təki nawzaɓ-Maŋgəlva, dəssoŋgən nawslani.

⁸ Kəzaɓgən təki nawzaɓ-Maŋgəlva van dit wəleŋɗe gədəvən kutuk kutuk adawsani, kəɗɗagən səɗek va mərban suk aggərəma.

Gizlirkeɗe na daŋgla

⁹ Sissiŋ Kəzaɓgən daŋgla ama gəla nassa vani. Kəla dohoŋ va ənəh na də mbana, təkzlumən taka pak kəlawgen helegeɗ kukulfut na ngərayã məɗimti, aka zezek na ma daŋgla van metər kaklaw sle'i.

¹⁰ Dədəkeɗ net kaklaw sula də tilit kaklaw sula na təbəz pepreŋge; məŋgba'aɗe net dədəkeɗ dit mətəlawaɗe net wassoŋ na təbəz babara.

¹¹ Vaska'e adawsan də tapaslay pay də gazga, dəka mezezekeni: helegeɗ kukulfut na ngərayã məlewit aka zezek na metər kaklaw sle'i, dədəkeɗ nan də tilit na təbəz pepreŋge, kaklaw sula sula, məŋgba'aɗe net dədəkeɗ dit mətəlawaɗe net wassoŋ na təbəz babara.

¹² Slosloprok na daŋgla də ma pehe: Helegeɗ kukulfut na ngərayã məɗimti, aka metər kaklaw sula kiyən sle'i, dədəkeɗ net kəlawə, də tilit kəlawə.

¹³ Slosloprok na daŋgla dəmmba pay nampum: metər kaklaw sula kiyən sle'i;

¹⁴ dəka persleken taka pakə, məzlzlaraɗe tahəŋ aka metər buhul də man dit dədəkeɗ net hoku, gəm tilit hoku.

¹⁵ Gəm dəka persleken mbərni, məzlzlaraɗe tahəŋ aka metər buhul də man dit dədəkeɗ net hoku, gəm tilit hoku.

¹⁶ Dəwəl sən kirit memeŋgle na, məzlzlara na metər kəlawə, iŋkile nan va əffiyo na muŋgus, pepreŋ witwiti, hõlhõ hõlhõ na ngərayã kukulfut məɗəmni, wəza na məzuhõ, dədəkeɗ nan poɗo gəm tilit poɗo.

¹⁷ Dədəkeɗ na daŋglaŋ pak wasapaŋ dit zleŋɗe na təbəz babara, məŋgba'aɗe net na təbəz babar adassoŋgu, gəm tilit na təbəz pepreŋge.

¹⁸ Zezek na daŋgla tay: metər kaklaw sle'i. Slosloprok nan: aza man dahãdahã pak, metər kaklaw sula kiyən sle' sle'i. Wəɓay nan metər sula də mani, na ngərayã məɗəmən, tilit na təbəz pepreŋge.

¹⁹ Zəgeɗ naddəv gəlaŋ pak, təbəz pepreŋgi naɗɗan dəndəni, dədəkeɗ dəwən neti, dədəkeɗ na gəla zəknan də təbəz pepreŋgəŋgə.

Mẽl na lalam

²⁰ Kəɗigən wən nan sit mə Israyelɗe dəkayaŋ sukungən mẽl na hereme an ɗololo, narman offo, dəfəɗ də kapay ɗayɗayə.

²¹ Addəv gizlirke nalma də Maŋgəlva, aba gabaga məzlzlarən dəɗaman akoti na wənmiyna, may Aron dit kirtin waɗiynən dəzləgən də moskoy hã təki dadaŋ aba Yawe: Mahenziŋ məs addəɗ na ɓay ammba sayit mə Israyelɗe faɗə.