Əgilye 25 - Bible en Guidar

Gizlirke salala gəm ərba aka va adagagdakanən Maŋgəlva ( 25:1—31:18 ) Əbbah net mə Israyelɗe

¹ Yawe anah sən Moyis:

² Anah sit mə Israyelɗe, dətaf suwən əbbaha; səvet zel məvəlaŋ mekret paparə, kətafnəngən əbbahəska.

³ Əbbah an kədawtafaŋ səvet na: meleŋge, təbəz babara, təbəz pepreŋge,

⁴ gabaga məs iŋkile nan va əffiyo na muŋgus, an pepreŋ witwiti, an hõlhõ hõlhõ, ngərayã kukulfuto gəm deɓeke net gilewi,

⁵ gəbeɗe net ndergeyẽɗ məhimti, gəbeɗe net zəgeɗ neret iŋkile adawyaŋ na dofeŋ, gəm wəlaŋga na duvurnohõ,

⁶ mẽl nasɗa offo kerkeri, gaŋgəlya naɗɗa ara mẽl nappaya gəm nawzla,

⁷ gərmeŋɗe nzoloknzoloku, gərmeŋɗe nawbay gawla aza lukut na daya net məsdəlveŋge gəm taɓak na makra lukut nani.

⁸ Dərkaŋ suwəngən təki nawzaɓ-Maŋgəlva, wanəsaw a weleŋti.

⁹ Wanərban suk va gəla van adawsani, va zəgeɗ na wəza nan temtem adassoŋgu: səɗek vas kədaɗɗetini.

Zəgeɗ naddəv gəla na Maŋgəlva Akoti

¹⁰ Dəɗɗaŋ suwəngən akoti də wəlaŋga na duvurnohõ, zezek nan metər taka də mani, slosloprok nan tay ɓa siɗikke səddəv metər, əɓay nan tay ɓa siɗikke səddəv metər.

¹¹ Kəkkəɗ səngən meleŋge saksakə, gədəvən də gəɓan pakə, kəbay səngən genhe maŋgavan sulək na meleŋge,

¹² kəbaygən ndemeɗ gugriɗe na meleŋge poɗo, kəɗɗegən aza tələn poɗegiti, ndemeɗ sula təkzlum dahã, sula dəka maɓɓani.

¹³ Kəgəɗgən zleŋɗe na wəlaŋga na duvurnohõ, kəkkəɗ sitgən meleŋge,

¹⁴ kəgulgin zleŋɗe vet addivit ndemeɗ naka təkzlum akoti sulagən nak kawslan dənditi.

¹⁵ Zleŋɗe nek dəssoŋgən addəvit ndemeɗ na akoti naka, kagdihti yi ɓa.

¹⁶ Kəɗigən ɗerewel na wənmiyna nak addəv akoti nədapsuk naka.

¹⁷ Kəzaɓgən man nampan na meleŋge saksakə, zezek nan metər taka də wəɗakə nani, slosloprok nan tay ɓa siɗikke səddəv metər.

¹⁸ Kəzaɓgən maslay kerubaɗe sula na meleŋge; kəvotgin a metteɓ ma man nak dahãdahã.

¹⁹ Kəvotgən maslay kerubaɗe nek aza man dahãdahã; kəɗɗeningin maslay kerubaɗe vet ɗoŋgor ɗoŋgor aka man naka, aza metteɓ ma man dahãdahã.

²⁰ Maslay Kerubaɗe dəpparnəngən persleket kəla disiŋ vi kawzeŋ ara ma akoti də persleketi; dəssoŋgən heret aza zit sekseki, dulaŋgən dəza mani.

²¹ Kəɗupgən man nak aka akoti, kəɗigən ɗerewel na wənmiyna nədapsuk nak addəv akoti vani.

²² Nələmgən də is adaka, səka man naka, sə weleŋgit kerubaɗe sula naka akoti na wənmiyna, wanənoh suk wəsəɓɗe en nədapsuk sit mə Israyelɗe.

Tabəl

²³ Sissiŋ kəgəɗgən tabəl na wəlaŋga na duvurnohõ, zezek nan wasan metər taka, slosloprok nan wəɗak na metər taka, əɓay nan tay ɓa siɗikke səddəv metər.

²⁴ Kəkkəɗ səngən meleŋge saksakə, kəbaygən gawla sən man tərwəsl də meleŋge.

²⁵ Kəkkpa'gən təki nawbay gawla dit wəleŋɗe təkzlumun poɗo pakə, slosloprok net va ɗəf weɗi, kəbaygən gawla sən man də meleŋge tərwəsl kiyit wəleŋɗe neki.

²⁶ Kəgəɗ səngən ndemeɗ gugriɗe na meleŋge poɗo, kəɗɗegən təkzlumən poɗegit na tələn pakə.

²⁷ Go'o dit wəleŋɗe naka təkzlumən neki, kawguli ndemeɗ gugriɗe, vi nawgul zleŋɗe nawslan tabəl vani.

²⁸ Kəɗɗegən zleŋɗe na duvurnohõ, kəkkəɗ sitgən meleŋge, kawslan tabəl dinditi.

²⁹ Kəgəɗ səngən ma wayɗe, hiŋgiɗ net iŋkile, hiŋgiɗ net iŋkile na təbza dit maɗaweɗ nawpesl dənɗaŋ. Də meleŋge saksak kədaɗɗeti.

³⁰ Way dəsan ɗayɗay aka tabəl a bawa.

Zəga nawɗi lalam

³¹ Sissiŋ kəgəɗgən zəga nawɗi lalam na meleŋge saksakə. Zəga nawɗi lalam van nawvot dəvoti yi; gabbani, wəlaŋ zəni, kivani, kasliɗe nani gəm uffuyẽɗ nan sap azani.

³² Kivan dəgohoŋgən sləre a maŋgavani, hoku dahã, hoku dahã na zəga nawɗi lalam.

³³ Aka kivan taka pak, kasliɗe hoku va tutukuluk uffuyo na teŋɗeke assoŋgu, gəm aka maɓɓan dəssoŋgək va aŋka'e: kivan sləre wawɗak səza zəga nawɗi lalam naka.

³⁴ Aka zəga nawɗi lalam zək nani, kasliɗe dəssoŋgən poɗo va kirtin teŋɗeke, dit tutukulukɗe gəm uffuyẽɗi:

³⁵ tutukuluk taka wasan ammba kivan sula dəgohoŋ səza mani, vas adassan ammba kivan medembirgit poɗeŋki.

³⁶ Tutukulukɗe də kivan wassoŋ sap azani, məvotit məstaka na meleŋge saksakə.

³⁷ Kəgəɗ səngən lalamɗe akan buhulu; kasɗe lalamɗe dəkekeɓe'nəngən təki nabani.

³⁸ Mərmaɗe nan də met kasliɗe nan dəssoŋgən na meleŋge saksakə.

³⁹ Kawzaɓ zəga nawɗi lalamɗe dit zəgeɗ nan pak na, də meleŋge saksaki yi.

⁴⁰ Awla ɗa, aɗɗa va mərban suk aka gərəməŋ dekdeki.