Əgilye 24 - Bible en Guidar

Maŋgəlva aynək wənmiyna də Israyel

¹ Yawe aɓsən Moyis na: «Apeŋ azawa, isi, Aron, Nadab gəm Abihu, dit ɗiy məsɓet net mə Israyelɗe kaklaw buhulu, kəgdukoŋgən kup səka faraɗa.

² Moyis yi kaka' nawzar go'o aza Yawe; net adawzar azan ɓa, ɗiy adawpegeŋ dəndən ɓa.»

³ Moyis pay əboton wən məs Yawe anah pak sit ɗiyi, gəm wənɗe məziwgiti. Ɗiy pak azlanənək met taka: «Əpel məs Yawe anah pak, waməzbani.»

⁴ Moyis averik əpel na Yawe pakə; asilik də mopumo arka təki nawzaɓ-Maŋgəlva aba mossorgo metiŋ dit gərmeŋɗe məmpet kəlaw kiyit sula, aza wəŋɗa na zev Israyel.

⁵ Sissiŋ aslin gewleɗ na Israyel; akiyaŋgək əvəl nawzla kurmbuɗuku, gəm azaɓaŋgək-Maŋgəlva dit medgeɗgeɗe sən Yawe va əzaɓ-Maŋgəlva nawslere.

⁶ Moyis agəmək wəɗak net mbeli, azi addəvit hiliŋgiɗ nawsa zəga; madembirgit mbel na, aksu' sənək matuya.

⁷ Agəmək ɗerewel na wənmiyna, aŋɗan sitik ɗiyi. Aɓɗaŋ na: «An Yawe anah səm pak waməɗɗa, waməprəm səni.»

⁸ Moyis agimik mbeli, ndən kusu'kusu' sit ɗiyi, amna: «Eŋkiŋ mbel na wənmiyna məs Yawe aynə də mənokum, aka wəpel temteməŋ pakə.»

⁹ Moyis apeŋke, vaski Aronə'e, Nadab gəm Abihu, dit ɗiy məsɓet na Israyel kaklaw buhul neki.

¹⁰ Awlanənək Maŋgəlva na Israyel, təki məkkəɗən ammba tələn dit gərmeŋge adawyaŋ na safir tiyir səɗek va təki a disiŋ.

¹¹ Ɗiy məsɓet na Israyelis, Maŋgəlva dəgəɗ sit zəga ɓa; asəŋgləkanənək Maŋgəlva, ndəɗaŋ namnamə, hərəh hərəhə.

Moyis aləmək də Maŋgəlva aka mossorgo

¹² Yawe anah sən Moyis na: «Apeŋ azaw aka gərəm aŋ kəsokgən aŋka, vi nəpsukgən kalaɓɗe: Mahenziŋ də əpel na ənziya məs nəver vi kawyegeti.»

¹³ Moyis le'i, də Yosuwa, masulani, Moyis peŋ dəka gərəm na Maŋgəlva,

¹⁴ dərɓaga anah sit ɗiy məsɓeti: «Məgəm aŋka, hã gap mədazzam azokum. May Aron də Hur yeŋ də mənokum; ɗəf an də wən na, dənah siti.»

¹⁵ Moyis peŋ aka gərma; yaŋ slaybuwən asərət ki gərma,

¹⁶ gagdak na Yawe asanək aka mossorgo metiŋ na sinay, slaybuwən nak asanək gap pay sləre. Aya Moyis aka pay mabuhuloni, səddəv slaybuna.

¹⁷ Gagdak na Yawe tay ərban zən a maheret mə Israyelɗe va offo məlkat təkiya, aka dadwar ki mossorgo metiŋ.

¹⁸ Moyis toŋ addəv slaybuna, peŋ aka gərma. Moyis asanək aka gərəm əsɓəta kaklaw poɗo, əvoŋ kaklaw poɗo.