Əgilye 23 - Bible en Guidar

Wəɗi kiyit ɗiy məddekti

¹ Kədabbalan tepelke ɓa. Kədawaŋ wən kabbah sən ɗəf mbərayən ɓa.

² Vi ɗiy vadaysa assoŋ addəv mambray na kədazbet ɓa, aka pay wətaw wən na, kədawzlan əzban vadaysa net ɗiy vi kawslokoron wən nawtaw ɓa.

³ Pay nawtaw wən aka məssahã na, Kədabbah sən ɓa.

⁴ An kəgbatək aka wasli na məzuseɓ nok məzani, awaniɓa koro nani, kəki səngini.

⁵ Pay kula koro na məzuzelok məskotən də gabal, kədawtoŋ kiyən ɓa, kəbbah səngən əslan gabal vani.

⁶ An məssahã nok akiyək wən nawtawa, kədawslokoron wətaw wən nan ɓa.

⁷ Azar faraɗa səza əpel na uwawəna. Kədawbay ɗəf də mazlibezlibe na man may ɗəf təstəs ɓa, vi nənah na, ana ɗəf məs mambray na təstəs yi ɓa.

⁸ Kədawtaf zəga na makaryam ɓa, vi zəga na makaryam awtip hara ɗəf dawla moggoni, awraygən wən net ɗiy en təstəsə.

⁹ «Kəzəmgən sahã na molhõyõ dappar zən ɓa; mənokum sən kiykum kəsənənək wəssa na molhõyõ, vi kəssoŋgək molhẽyẽɗ aka dələv na Eziptə.»

Əzva naffete gəm əvoŋ naffete

¹⁰ Kənsegən guli nok əzva sləre ammba zəni, kəkkalangən zəga naddəvən.

¹¹ Aka əzva mabuhulon na Kəbəlgən, kəppangən a gəlan adaka; məs sahãŋɗe nammbet ɗiy nok dəzəmaŋgəni, an adappaŋ a gəleti, zəga nawra dəzəmgəni. Vas kədaɗɗa də guli net megezlembirkeɗ noko, gəm net hereme noko.

¹² Wəvoŋ sləre, kəɗɗa wəza noko, ya wəvoŋ mabuhulon na kəffetgəni, vi wasli nok də koro nok dəffeteŋgəni, wətət balamək nok də molhõyõ dəmpəsaŋgəni.

¹³ «Mərma an məs nənah sukum pak təstəsə: kədawyaŋ iya net meŋgilveɗ meɓɓet ɓa, ɗəf adaprəmən amokum ɓa.»

Wəzləreɗ nazba a Israyel

¹⁴ Kəgəɗ sugən wəzləra təl hoku ama wəzva.

¹⁵ Kərmagən pay na wəzləra na mepteke məza wuɗo ɓa. Wəvoŋ buhul mepteke məza wuɗo ɓa kədawzəma, va nəɗi suk wən nan na aka təla na bu'um, vi aka pay nani yi kəgil sə Eziptə. Azzoŋ addəv Gəla naw va ɗəf halay halay ɓa.

¹⁶ Gəm wəzləra na dəgəla aka pay net zəgeɗ na mabardaw nok an maddaabəŋ, an kəzlək a guli anokda, də wəzləra nakkalan zəga sura ama əgrak əzva, pay kədakkalan zəga nok sura pakə.

¹⁷ Ama wəzva pakə, ɗiy mezeŋgleket na vanday nok təl hoku adazzoŋ ula hara Yawe, Maŋgəlva.

¹⁸ Kədawvay mbel na əzaɓ-Maŋgəlva nawrah zazay nok sap də mepteke məhəsən ɓa; səlhã məvay na wəzləra naw adawvoŋ kim təki dadaŋ ɓa.

¹⁹ Kəkiygən zəgeɗ na mabardaw na guli nok en maddaabəŋ pak addəv gəla na Yawe, Maŋgəlva noko. Kədawda wət hãw də moŋvo na man ɓa.

Wənmiyna gəm wəzga' tak əmbata

²⁰ «Wanəslən maslay naw aboko, vi dəgukgən aka tive, vi dəgapgukgən a təki nəzaɓ suko.

²¹ Asla zuko, aprəm mani, kədawdan sən gədəvən ɓa, wavvuyet tepelke nokum ɓa, vi tay də iya nawa.

²² An is tat əprəm mani, is tat əɗɗa an nənah pakə, asna wanəzel məzuzelkuni, wanəsaw məzuseɓ net mərmaŋ mama azoko.

²³ Vi maslay naw wadaw aboko, watoŋguk kəlanet mə Amorɗe da, mə Hittiɗe da, mə Perziɗe da, dit mə Kana'anɗe da, mə Hivviɗe da, gəm kəlanet mə Yebusɗe da, ya wanəzeti,

²⁴ kədappu' abet meŋgilveɗ net ɓa, kədawgəɗ sit wəza ɓa, kədaɗɗa zev wəzeɗe net ɓa, dərəŋ na əbzluw kədaɓzluwti, əkkrep kədekrep gərmeŋge məs ampaŋgə.

²⁵ Kəɗaŋgən wəza sən Yawe Maŋgəlva nokum, vasna waɗɗa wəzaɓ nan aka peŋ nokum gəm aket iŋkile nokum, wanəzargən gbəgba' suwalaŋkum;

²⁶ guluk tat nawki daway may nassat ndarzlayək aka dələv nok ɓa; wanəpsuk ənziya egge zeki.

²⁷ Wanəslən ezlezle naw əmbat aboko, wanəki wəzlzlaɓ aweleŋgit ɗiy məs kədawtoŋ anet da pakə, wanəɗɗa ka məzuzelɗe dəktuhnəngən dəɓet əŋzoŋ suko.

²⁸ Wanəslən apapray na bekne aboko, dərɓigin mə Hivviɗe, mə Kana'anɗe, gəm mə Hittiɗe səboko.

²⁹ Nərɓehet na səbok aka əzva taka ɓa, vi dələv adawsan muyã ɗar, ka zəgeɗ darawit nawra duwanəngən zit kattapok ɓa.

³⁰ Teletele nədarɓehet səboko, hã gap kuwangən kiyko, kətafgən dələv van ka noko.

³¹ Wanəɗi suk dələv nok təŋ sə pehe net vəlarɗe gap pehe net mə Filistiɗe, təŋ sə kapta-muyã gap a məlpa guzlo, vi wanəppet ɗiy naka dələv ammba vok kərɓehetigin suboko.

³² Kədawtəp mok dənɗaŋ ɓa, kədayna wənmiyna dit meŋgilveɗ net ɓa,

³³ Adassoŋ də gəla aka dələv nok ɓa, vi adawtoŋgukən addəv əɗɗa mbərayən akaw ɓa: vi əɗɗa wəza sit meŋgilveɗ net na, wasan bizwil aboko.»