Əgilye 22 - Bible en Guidar

¹ An məgbati aka məhãla daflik gəla, yas məbayən zamə, kampəlni kiyən ɓa,

² an pay vitsa məbayni, kampəlni kini. Təstəs nan na məhãlã dəfaɗgən aka an ahãlə. An zəga nan tay ɓa na, asna kawvəlni a gəla əhãl nani.

³ An mərahni zəga an ahãl van madaran avani, wasli soko, koro soko, hã gap time awaniɓa hãwã, təɓələn sula adawfaɗa.

An ɗəf araygən sənən ərah na ɗəfa

⁴ An ɗəf appetik zəgeɗ memeyẽɗ nan əmbat əŋgrof guliyo awaniɓa megezlembirkeɗ na ɗəfa, guli nan an dəgəɗ moggoni də guli net megezlembirkeɗ nan an moggon adawfaɗ dəndəni.

⁵ An offo akõhuk arah gedirgeɗi, azla hay sə maŋgaŋva, awaniɓa hay a disiŋ, ɗəf an dəɗi sən təkiya əfaɗ adawfaɗa.

⁶ An ɗəf apsənək koɓeɗ sən ɗəf əzaɓa awaniɓa zəgeɗ meɓɓeti, yaŋ məhãlit səna ɗəf da vani, an mərəhni məhãla vani, wafaɗ təɓələn sula.

⁷ An mərəhni məhãla van ɓa, asna afən gəlas dəzargən aba Maŋgəlva an ndəni dərəŋgən zəga na meggen ɓa.

⁸ Aka wən na vurum pak, dəwəl sən wasliya, koro, time, lukutu, awaniɓa zəga dəzə pakə, an mənah yi na ndəni kpakə, wən net sulegit pak dədegin aba Maŋgəlva: ɗəf an Maŋgəlva arban na, ndəni dəraygəni, wafaɗ sən meggen təɓələn sula.

⁹ An ɗəf azgək koro, wasliya, time, də zəga mamayã zev awan di pak ana meggen da ətaɗa, yas amtə awaniɓa aŋgəslə awaniɓa mərmani məza ɗəf ulan ɓa,

¹⁰ əsway də iya na Yawe dədawɗeket sulegiti an dərəŋgən zəga na meggen ɓa. Afən zəga dətafgən wən nani, ɗəf van adawfaɗ ɓa.

¹¹ Ya an səmaŋgavan məhãləni, dəfaɗ sən afəni.

¹² An zəga darawən dəbakani, dəkiygən wərbani, afaɗ na a gəla zəga mamayã məbakan van ɓa.

¹³ «An ɗəf aŋgələk zəga mamayãn səva meggeni, yas aŋgəslə awaniɓa amtə dərɓaga afən na, əfaɗ adawfaɗən.

¹⁴ An dara afəni na, afaɗ na ɓa. An ka zəga agəma, dəfaɗgən an məs aslereŋ akani.»

Mahenziŋ aka əssa net ɗiyi gəm wəzbaɗe temtemi

¹⁵ Ya an ɗəf ambəɗatək waŋ goruk məza tay əkaytən ɓa araygəta, arya nakat adawziya; ka ɗak nan tədawsata.

¹⁶ An afət əɓoŋ aɓoŋ dapsənta, arya va adawkaŋ akat gorku ŋgbuɓɓo adawfaɗa.

¹⁷ Kədappat məgəɗ tetelek madarat ɓa.

¹⁸ Ɗəf dərka' sən zəga mamayãni, kawbayni.

¹⁹ Məs dətaw wəla zəga nawzaɓ-Maŋgəlva sit meŋgilveɗi, kazgani; an sən Yawe yi kaka ɓa ɓa.

²⁰ Kədawzəmgən sahã na molhõyõ ɓa, kədawtakən dappar zən ɓa, vi kəssoŋguk molhõyẽɗ a Eziptə.

²¹ Ga gəbaya də mitiwe pak kəzəmgitin sahã ɓa.

²² An əzəm kədawzəmgit sahã, an ahəmaŋ suwənka, wanəprəm əhəm neti,

²³ wədagədəv naw wasili, wanəbaykum də masalam, gil nokum wassoŋ ka gil net gəbayɗe, kirtukum wassoŋ mitiweɗi.

²⁴ An kəpsənək dəmən net koɓeɗ sən məssahã məs dəsan də is naret ɗiy nawa, kədassok dəndən va məzəddakan ɓa; kədassõh iŋkile akan ɓa.

²⁵ An lukut na meggok tay kətaf aka dəməna, amndan sən tak pay əbəta.

²⁶ Vi aski yi zəga nawsərət akan kaka'ə, lukut məs adawɗaman zən dəndəni. Addəv miy adawvoŋ di? An asanək hã ndən həm su na, asna wanəprəma vi məgəɗ mbəlembəle nani.

²⁷ Kəranən Maŋgəlva ɓa, kəpel mbərayən aka məlĩ net ɗiy nokum ɓa.

²⁸ Kəki sugən zəga na mabardaw dit iŋkile net megezlembirkeɗ noko. Uwa maddaabəŋ naret kirtuk mezeŋgleketi, Kəpsugəni.

²⁹ Vas kədaɗɗa dit wasliɗe noko, gəm gilew noko; dəsangən lumu taka də mani; aka pay madodopoɗon na, kəpsugəni.

³⁰ Məssoŋ ka ɗiy naw salala, kədawzəmaŋ zəga mamayã mogogoy ɓa, kəzgan sənəngən kəra.