Əgilye 21 - Bible en Guidar

Mahenziŋ aket mə Ibriɗ belemɗe

¹ Wən məziwgin yaŋ kədawnah siti:

² An kəlbahək mə Ibriɗ ka balamə, wagəɗ suk wəza wəzva sləre; mabuhulon na, wagil ka na kiyən na makaryam.

³ An takərgən ade, nan dəgilgən takərgəni. An dət ɗaki, ɗak nan təgilgən dəndəni.

⁴ An daya nan dəpsənət gulku, an tuwə sən kirin mezeŋgleketi awaniɓa muguluŋgiti, guluk dit kirtət pak na daya nanəŋgə, nan dəgil takərgəni.

⁵ Ya an balam nak anahək na: «Nəŋgələk əsaw də afuwa, ɗak nawa dit kirtuwa, nəgil na, na kiyu ɓa»,

⁶ vasna daya nan dəzargən aza Maŋgəlva, dəzargən aza maddamba awaniɓa wəleŋɗe na təkzlum maddamba, dəkkul səngən sləman də har nakkul zəga: wagəɗ sən wəza hã faɗə.

⁷ «An ɗəf avəltək wətən ka balamkə, nat təgil na va belemɗe mezeŋgleket adawgilyoŋ ɓa.

⁸ An tat law a mahara daya nat nawɗi nan ɓa, wappata. Tay də tive dəvələtgən də əzəm kiyit sən mahəlfa mbərən ɓa.

⁹ Ya an apsəntək wətəni, dəgəɗ sətgən va adaɗɗaŋ sitin gorɗeŋge.

¹⁰ An aɗiyək mbərta, tay dədawzlẽh səza zəga nawzəm nat ɓa, səza wəgul nat ɓa, səza əsap dəndət ɓa.

¹¹ Ya an aɗɗa sət zəgeɗ hokis ɓa, asna watəgil məza wəfaɗ koɓeɗ ɓa.»

Mambray dəslə nawbay ɗəf aka wən nani

¹² Ɗəf dəbay ɗəf bay zamə, kawbayni.

¹³ An tive avoŋ sən ɓa, yas Maŋgəlva apan mandara agəɗ avani, asna wanəɗi suk təki məs adanzan adaka.

¹⁴ Ya an pepet agəɗ vi kawbay meggeni, dətoŋ a təki nawzaɓ-Maŋgəlva naw dayday na, mərma məbaya.

¹⁵ Ɗəf dərga afən dət mani, əmta adamta.

¹⁶ Məs dəhãl ɗəfa vi kawvələn awaniɓa dəsangən avani, əmta adamta.

¹⁷ Ɗəf dəran afəni awaniɓa mani, əmta adamta.

Wərgaɗe gəm vamviya

¹⁸ An ɗiy tay əgayaŋgə, yas ɗəf maɓɓan arga meggen də gərma awaniɓa də van kətəm kətəmə, ɗəf nan dəmtə ɓa, ya ɓulohi aka zəga nawvoŋgo,

¹⁹ an waɓap əsilyeni, wagil appaka də mikke nani, wən tay aka ɗəf dərgaŋ ɓa. Dəfaɗ səngən a gəla avoŋ ɓulohoŋka, dənzaɗgən hã ndən mbəle'i.

²⁰ Ya an ɗəf argak balam nan awaniɓa balamək nan də tandaŋ, yas amtaŋ ammba vani, kampelni kini.

²¹ An aɗɗaŋgək əvoŋ taka may sula na, kampəlni kiyit ɓa, vi koɓeɗ nanəŋgə.

²² An ɗiy tay ərganən ziti, aslkərtən guluk də daway, guluk nak bok də moggon məza mandara ɓa, wafaɗaŋ va zələt anahə, wafaɗnən va mətawaŋwən aziwginini.

²³ Ya an mandara agəɗək na, kəfaɗgən zeŋgile də zeŋgile,

²⁴ hara ɗəf a gəla hara ɗəfa, slay ɗəf a gəla slay ɗəfa, va ɗəf a gəla va ɗəfa, təl ɗəf a gəla təl ɗəfa,

²⁵ wəzla də offo a gəla wəzla də offo, vaŋviy a gəla vaŋviya, huwwa a gəla huwwa.

²⁶ An ɗəf andosluk hara balam nan awaniɓa nat balamək nani, yas arayə, dəppet əmbat na kiyti, a gəla hereti.

²⁷ Ya an slay balam awaniɓa nat balamək nan akkpanyə, wappet əmbat na kiyit a gəla slayti.

²⁸ An wasli abayək ɗəfa, awaniɓa guluk bay zamə, kaska wasli vani, kawzəmni sluwən ɓa, wən asan na aka afən ɓa.

²⁹ An wasli van məzubay yi farə, məki səni dolgoy sən afəni, dətaɗ ɓa, yaŋ abay ɗəfa awaniɓa guluk bay zamə, kaskani wasliya gəm kawbayni afəni'e.

³⁰ An mənah səni na dəfaɗə, dəkiygən zəga an məssohõn pak, a gəla zeŋgileni.

³¹ An wiyin abayə awaniɓa waŋkə, va wən nan adawtaw adawziwginini.

³² An wasli abayək balam awaniɓa balamkə, afən wasli wafaɗ sən koɓet na təbəz babar kaklaw hoku sən daya neti, kaskani wasli vani.

³³ Ya an ɗəf appanək vov net iŋkile nan viŋŋge, awaniɓa waso' vov net iŋkile məza əmpan man ɓa, an wasli may koro abətək addəvni,

³⁴ afən vov wafaɗ sən ɗəfəs dit koɓeɗi. An dəmtə, wasan ka nani.

³⁵ «Ya an wasli na ɗəf abayək an na ɗəf maɓɓan zamə, wavəlnən wasli madaranəŋka, wawɗeketin koɓeɗi; an dəmtə waɗaknənə'e.

³⁶ Ya an nafɗaŋga də nabes nafɗaŋga məprəman səni wasli van assərəkək əbaya, yas dətaɗ ɓa, afən wasli vanəs wafaɗ wasli a gəlani, dəgəmgən an məmtən ka nani.»

An məhãli zəga mamayã

³⁷ An ɗəf ahãlək wasliya awaniɓa time, yas afoto awaniɓa avəla, wasliɗe sle' adawfaɗ a gəla wasliya gəm timeŋgiɗ poɗo a gəla time.