Əgilye 20 - Bible en Guidar

Mahenziŋ kəlaw

¹ Maŋgəlva apelik wənəs pak də wənah na:

² Intə Yawe, Maŋgəlva noko, məs dəgilguk səka dələv na Eziptə, səka balam.

³ Meŋgilveɗ nok meɓɓet adassoŋ abbəru ɓa.

⁴ Kədawzaɓ zəgakamaŋgəlva ɓa, may zəga dəgil səɗek va zəga na disiŋ gəm naka dəlvafuŋgu awaniɓa neret iŋkile ammba dəlvafuŋ ɓa.

⁵ Kədappu' abet ɓa, kədawgəɗ sit wəza ɓa, vi intə Yawe Maŋgəlva noko, Maŋgəlva məskotorok məzəŋɗan mambray net efiŋgiɗit kirin en dəzelnən aket kirtit gap sayit hoku də poɗo

⁶ Ya, məzəŋgluwəni, məzərmanən an nəɗi naɗɗa, wanərban sit moggon naw hã gap sayit gabalə.

⁷ Kədawya iya na Yawe, Maŋgəlva nok vi kawa wən ɓa, vi Yawe awla na məwəwən də iya nan ka ɗəf məs man bartata ɓa.

⁸ Aɗɗum aka pay naffete, aɗi kini.

⁹ Addəv pay sləre, aɗɗa wəza nok pakə,

¹⁰ pay mabuhulon hara na, Əffet na Yawe, Maŋgəlva noki yi. Kədaɗɗa wəza ta'sa ɓa, is ɓa, wutuk mizilin ɓa, muguluŋgut ɓa, balam nok ɓa, balamək nok ɓa, zəga mamayã nok may molhõyõ na walaŋgəleɗe gugriɗ nok ɓa.

¹¹ Vi aka pay sləre yi, Yawe azəməɗ: disiŋ də dəlvafuŋ, pehe dit zəgeɗ naddəvən pakə, pay mabuhulon affeti. Vini yi, Yawe aɗɗa əzaɓ aka pay naffete, dəsangən ka nani.

¹² Agagdakan afuk dət moko, vi əvoŋ nok dəzzekgən aka dələv məs Yawe, Maŋgəlva nok apsuko.

¹³ Kədawbay gəbay ɓa.

¹⁴ Kədawku a gizbe ɓa.

¹⁵ Kədawhãl ɓa.

¹⁶ Kədawa wən aka meggok ɓa.

¹⁷ Kədawsim gəla na meggok ɓa. Kədawsimit ga meggok ɓa, may balam nan dət balamək nan ɓa, may wasli nan də koro nan ɓa, zəga awandi na meggok pakə.

¹⁸ Ɗiy pak tahəŋ əprəmən gaŋgəlma gəm ɓaɓəlma gozloro. Tahəŋ uwlenin əwiɗ na buwən gəm enene aka mossorgo ɗəkɗəkə; səza ɗiy awlanəni, akkereŋke, aziweŋgək faraɗa.

¹⁹ Anahaŋ sənən Moyis: «Dəɗah apel səm dəvoko, nam na, waməprəmko; Maŋgəlva adawpel səm ɓa, vi mədamta ɓa!»

²⁰ Moyis aɓsit ɗiy na: «Kəgeslne'eŋ ɓa! Vi kawslukumi Maŋgəlva ade, vi kəgeslne'eŋ sənəngəni, kədaɗɗaŋ mambray ɓa.»

²¹ Ɗiy aziweŋgək ɓuhu, Moyis azarək go'o aza guzli tiɗimtiɗim a təki Maŋgəlva asani.

Mahenziŋ dəwəl sən təki nawzaɓ-Maŋgəlva nawtaw wəla zəga

²² Yawe anah sən Moyis: «An kədawnah sit mə Israyelɗe yaŋka: Mənokum sən kiykum kulanənək va nəpel sukum sə disiŋ.

²³ Kədawɗiwən va meŋgilveɗ na təbəz babar gəm na meleŋge ɓa, nokum kədawvotnin ɓa.

²⁴ Noko, matuya na dələv kədarka, akani kədaɗɗa əvəl nawzla kurmbuɗuku, də əzaɓ-Maŋgəlva nawrah zazay dit gilew gəm wasliɗe noko. A təki nədarban iya nawa, wanəde azoko, wanəzaɓoko.

²⁵ Ya an təki nawzaɓ-Maŋgəlva na gərəm kədarka suwa, kədarkan dit gərmeŋge məslmet ɓa, vi kədarnoket də mabəl nok ɓa.

²⁶ Kədarkanən təki nawzaɓ-Maŋgəlva hã disiŋ ɓa, vi gabba ɗəf məzuteŋ adak adawla ɓa.»