Əgilye 2 - Bible en Guidar

Uwa na Moyis gəm əɓay nani ( 2:1—4:31 )

¹ Ɗəf səddəv məlma na Levi, alək əgəmət wətən Levi.

² Guluk nak təɗiyək daway, təwək wiyna, tula wiyin van lawi, ndət haɗamgən gap təla hoku.

³ Adan təɓap na əɗaman əmpa ɓa na, təgəm kəggəl mərkan də sleɗu, təkkəɗ sən timbe gəm membezleŋ, təktuk wiyin nak addəvni, təl əɗiyən addəvit vəlarɗe a mabuzgum na Nil.

⁴ Məlmən wiyin nak muguluŋgut tek ziw faraɗa kawla an dədawrəhni.

⁵ Yaŋ wətən Farawən təprik kaslslay a Nil, gorɗeŋge nammbat tam azbanən ma məlpa. Ndət təm keggəl addəvit vəlarɗe, yas təslənət balamək nat əgəmən.

⁶ Ndət kol əkolən na, muzliya: wiyni dədawhəma. Tulak sãhə̃: «Təmna, aŋ van wətit mə Ibriɗe yi.»

⁷ Məlmən nak tənah sət wətən Farawən na: «Nəmbat iyə suk ɗak nawaɗgən səret gil net mə Ibriɗ təwaɗgən sukgən muzliya van sa?»

⁸ Wətən Farawən təpsət na: «Doko.» Waŋ nak təmbat, təyət ma muzliya naka.

⁹ Wətən Farawən təpsət na: «Aka wiynəŋka, awaɗgən suwa, wanəfaɗ suko.» Ɗak nak təgəmək wiyin naka təwaɗgənəka.

¹⁰ Muzliya aɓayka, təki sətək sət wətən Farawən naka. Asanək ka wətəta, yaŋ təlvan na Moyis, vi təmna: «Səret iŋkile nəkdəha.»

Moyis tay ənzan a Madiyan

¹¹ Moyis agilik kəlazet milmiŋgiɗin, aka əvoŋ nan dasək na, aɓayək səkkay, awlak va adawzəmaŋ sahã aka wəza. Awla mə Eziptə məzərga mə Ibriɗ, taka naret milmiŋgiɗni.

¹² Ndən haran balbal, ɗəf tay ɓa, yas avək mə Eziptə nak vək bay əbayni, aɗaman ammba hoyoŋko.

¹³ Vit pummo nan əmpa na, ndən pay, gas ərih mə Ibriɗ sula ərganən ziti. Anah sən ɗəf an dəraygənəŋ na: «Vimi kədarga meggok di?»

¹⁴ Ɗəf nak amna: «Naway dəɗiyuk ka ɗəf daya mətaw wən nam di? Mok aka wəbayu va kəbay mə Eziptə sa?» Moyis ageslne'ke, amna: «Mbara wənəŋ aprəmka!»

¹⁵ Farawən aprəmək wənəska, akayanək Moyis kawbayni. Yaŋ Moyis anzan səna Farawən da; al əsa də gəla aka dələv na Madiyan, asanək a maŋgava vov net iŋkile.

¹⁶ Məsdələv na Madiyan, tay dit kirin muguluŋgit buhulu. Azzoŋguk əmbaɗaŋ iŋkile, kaknəhiŋ horkotɗe gilew na afit dəsaŋgəni.

¹⁷ Məzuteɗeŋɗe azzoŋ arɓehetini. Yaŋ Moyis asil atəre, apsit iŋkile sit gilew neti.

¹⁸ Amndoŋ aza Re'uwel, afiti, anah sit na: «Vimi kəgəmən zukum əmilye dəpaŋ di?»

¹⁹ Aɓɗaŋ na: «Mə Eziptə tay də tərəm səvet məzuteɗeŋɗe; ndəni yi dəmbeɗ səm iŋkile, apsit gilew dəsaŋgəni!»

²⁰ Anah sit kirtin muguluŋgit neki: «Ya, ŋgay di? Vimi kəppanən ɗəfəs adak di? Miya! Dəzəmgən peŋ!»

²¹ Moyis atafək əsa ana ɗəf daska, apsəntək Sipora wətən sən Moyis.

²² Təwək wiyna; alvan na, Gersom vi amna: «Molhõyõ nan aka dəlvəŋka!»

Maŋgəlva awelik Moyis, kawkõhgən Israyel

²³ Sə dərɓagan alyaŋ adaka, məlĩ na Eziptə zamə. Mə Israyelɗe aɓuhunək met sən wəza, ahəmaŋka. Əhəm net agapək aza Maŋgəlva aka wən na wəza.

²⁴ Maŋgəlva aprəmək əhəm neti; Maŋgəlva aɗɗumuk aka wənmiyna na walaŋgən də Abraham, də Isak gəm də Yakob.

²⁵ Maŋgəlva awlek mə Israyelɗe; arbanək zən azeti.