Əgilye 19 - Bible en Guidar

Maheŋziŋ gəm əslere ( 19:1—24:18 ) Maŋgəlva arbanək wənmiyna nan sən Israyel

¹ Aka təla mahoko'ən, dərɓaga əgilye net Israyelɗe səka dələv na Eziptə, dəpaski agapaŋ a kapta-muyã na Sinay.

² Ambataŋgək sə Refidim, yas azzoŋ a kapta-muyã na Sinay, aziyənək dibirgidik net a kapta-muyã. Adaki Israyel azi dibirgidik nan, aba mossorgo,

³ Yas Moyis apeŋ aza Maŋgəlva. Yawe ayak səka mossorgo metiŋ, amna: «Vaŋ kədawnah sən gəla na Yakob, kəboton sitgən mə Israyelɗe:

⁴ Kulanənək munokum sən kiykum an nəgəɗ sit mə Eziptiɗi, nəslokumuk aka persleke gazla, yas nəkikum azawa.

⁵ Ya kakaŋ na, an mənokum tat əprəm maw gəm ərma wənmiyna nawa, asna wakəssoŋ ka naw sə weleŋgit ɗiy pakə adan dələv pak nawi yi.

⁶ Wakəssoŋ suwən ka məlĩ net məsdəlveŋge, Kirtindələv en salala. Aski əpel an kədawnah sit mə Israyelɗe.»

⁷ Moyis payə; yas aye ɗiy məsɓet net ɗiyi, aɗiyək wən məs Yawe aɗi sən wən nan pak abeti.

⁸ Ɗiy pak azlanənək met taka, aɓɗaŋ na: «Waməɗɗa an Yawe anah pakə.» Yas Moyis aki əpel net ɗiy sən Yawe.

⁹ Yawe aɓsən Moyis na: «Awle, wanəde azok addəv slay buna, vi ɗiy dəprəmnəngən gala nədawpel də isi ka dətafnəngən wən nok hã faɗə tamə.» Yaŋ Moyis aboton əpel net ɗiy sən Yawe.

Maŋgəlva aləmək də Moyis aka gərəm na Sinay

¹⁰ Yawe aɓsən Moyis na: «Dok azet ɗiy, kubburgin dəpaŋ də mazayən; dəskoɓnin lukutɗe neti,

¹¹ dəzaɓanəngən zit ammba pay mahoko'o, vi aka pay mahoko'o Yawe waprik aka mossorgo metiŋ na Sinay a maheret ɗiy pakə.

¹² Kəɗigən meŋge sit ɗiy kiyən tərwəsl də wənah na: Məsla zukum kədawpeŋgeŋ aka mossorgo ɓa, kədawrəŋgənən maŋgavan ɓa. Ɗəf an dərəŋgən mossorgo vani, bay zam adawbayəni.

¹³ Dəsan zəga mamayã, dəsan ɗəfi yi, va ɗəf adawne azan ɓa, kaskani dəske awaniɓa kawhõni dit herɗe, asan na madaran ɓa. Pay gozloro adoffo aggərma adawpeŋgeŋgi.»

¹⁴ Moyis aprikik səkgərəm azet ɗiyi. Abburik ɗiyi yas askoɓinik lukutɗe neti.

¹⁵ Aɓsit ɗiy na: «Məsla zukum vi bew mazayin taka. Kədawzaraŋ azat guluk ɓa.»

¹⁶ Aka mazayin bew taka nak də mopumo na, geŋgere də əwiɗ na buna də slaybuwən gbimgbim aɗɗaŋgək aka mossorgo gəm ɓaɓəlma mohõ holoŋ holoŋgu, yas ɗiy sə dibirgidik pak akkereŋgi.

¹⁷ Yas Moyis agilgit ɗiy vi kalma də Maŋgəlva amapoho na dibirgidik, aziweŋgik pak aba gərma.

¹⁸ Mossorgo metiŋ na Sinay na, eneneŋ akan pakə, vi Yawe aprikik akan addəv offo; enene nan asilyoŋgək va enene na movoro, gərəm dəwənnan pak akkerik girgiri.

¹⁹ Ɓaɓəlma mohõ nak azlərəwək təkiya: Moyis əpele, Maŋgəlva wəzlan sən də ɓaɓəlma əhãy na buna.

²⁰ Yawe aprikik aka dadwar ki mossorgo metiŋ na Sinay, Yawe ayak Moyis aka dadwar gərma, yas Moyis apeŋ aka mossorgo.

²¹ Yawe anah sən Moyis na: «Aprik anah sit ɗiyi, vi adaggaraŋ də kakara kiyit meŋge əpeŋ kawla Yawe ɓa, wəmta wagəɗ diyɗa aweleŋti.

²² Məsdəlveŋge dədawzaraŋ go'o aza Yawe na, dubburun ziti vi Yawe adawbeyit ɓa.»

²³ Moyis aɓsən Yawe na: «Ɗiy aɓapaŋ na əpeŋgeŋ aka mossorgo na Sinay ɓa, vi kəssak səmək səkay na: asla ma təki sulək ki mossorgo, kəpeslgəni!»

²⁴ Yawe anah sən na: «Amsak apriki, sissiŋ kəpeŋgeŋgən də Aron matakə. Məsdəlveŋge dit ɗiy na, adaggaraŋ kakara kiyit meŋge vi kawpeŋ aza Yawe ɓa, vi adawbeyit ɓa!»

²⁵ Moyis aprikik azet ɗiyi, apel siti.