Əgilye 18 - Bible en Guidar

Moyis də Yetro dəhni

¹ Yetro, məsdələv na Madiyan, dəhən Moyis, aprəmək an Maŋgəlva agəɗ pak vi Moyis gəm viyit ɗiy nan mə Israyelɗe: Yawe agilgitik mə Israyelɗe sə Eziptə!

² Yetro, dəhən Moyis, agəmtək Sipora, guluk na Moyis dərɓaga arɓahata

³ dit kirtin mezeŋgleket sula: iya na taka na Gersom vi anahək na, molhõyõ nan aka dələv a guwa,

⁴ gəm iya na an mbərən na, Eli'ezer (Maŋgəlva məzutəri) Maŋgəlva na afu məzutər nawi Akõhguwək səma masalam na Farawən.

⁵ Yetro, dəhən Moyis, Kirtin mezeŋgleket sula, goni addoŋgək aza Moyis a kapta-muyã, a təki azi dibirgidik nan a gərəm na Maŋgəlva adaka.

⁶ Aprəman sənək Moyis na: «In Yetro, duhko, nədek azok dət ɗak nok gəm kirtuk sulegit dəndəta.»

⁷ Moyis agilik kawləm sən dəhən, yas appu'u, allamək a makrani; asɗanənək ziti, atoŋgoŋgək a gizlirke.

⁸ Moyis abotonək zəga an Yawe agəɗ sən Farawən gəm sən Eziptə aka batam Israyel sən dəhni, tatwãhɗe an arahaŋ aka tive, Yawe akõhgiti.

⁹ Zə Yetro annekik vi moggon an Yawe agəɗ sən Israyel, akõhgən səva Eziptə.

¹⁰ Yaŋ Yetro, anahə: «Soko sən Yawe məs dəkõhgukum səva Eziptə gəm səva Farawən, məs dəkõhgit ɗiy nan səva Eziptə!

¹¹ Nəsənək kakaŋ na, Yawe adayək kiyit meŋgilveɗi, arbanək aka mə Eziptiɗ asilyoŋ aket mə Israyelɗe.»

¹² Yetro, dəhən Moyis, aɗɗak əvəl nawzla kurmbuɗuk gəm əzaɓ-Maŋgəlva sən Maŋgəlva, yas Aron dit ɗiy məsɓet na Israyel azzoŋ pak kawzəm peŋ də dəhən Moyis aba Maŋgəlva.

Moyis aɗiyək deyeɗe nawtaw wəna

¹³ Vit pumpum nani, Moyis asanək kawtaw wən net ɗiyi, ɗiy aziweŋgik aba Moyis təŋ də mopumo hã moskoyo.

¹⁴ Dəhən Moyis awlak va adaɗɗa viyit ɗiy pakə: «Miy kədaɗɗa vas viyit ɗiy di? Vi miy kəsok takərguk ɗiy pak ziwziw abok hurruɓ təŋ də mopumo hã moskoyəŋ di?»

¹⁵ Moyis aɓsən dəhən na: «Ɗiy adazzoŋ azaw na, kakkaman Maŋgəlva yi.

¹⁶ An tahəŋ də wən na, ndəɗaŋ əzzoŋ azawa, in ətaw sit wən naka walaŋ ɗəf də meggeni gəm in ərban sit an Maŋgəlva aɗi wən nani gəm tive nani.»

¹⁷ Dəhən Moyis aɓsən na: «Zəga kədaɗɗas moggoni ɓa.

¹⁸ Wəya kədawyan zuko, is dit ɗiy məs də is pakə. Vi zəga nan gədaki viyko. Kəɓap na wəɗɗan takərguk ɓa.

¹⁹ Kakaŋka, aprəm suwa! Nətawan suk wən nani, Maŋgəlva dəsan də isi! Nok asok aba Maŋgəlva viyit ɗiy: nok istə kədawki wən aba Maŋgəlva,

²⁰ nok aboton an aɗi wən nani dit tiveɗi, arban sit tive adadawaŋ akani gəm wəza an adaɗɗaŋgə.

²¹ Sissiŋ, kəwəlgən zel tektek səret ɗiy pakə məgeslne'eŋ sənən Maŋgəlva, zel təstəs məza məŋglunən ki zit kaka' ɓa, kəɗigin aket ka deyeɗe, aket ɗiy gabalɗe, səkatɗe, kaklaw sle'ɗe dit kəlawɗe.

²² Watawən wən net ɗiy pay pakə. Wən tetek pak na, waki sukuni, ya wən an tekteki ɓa na, watawən wən nan dəveti. Akaftakan gagdak nan səkoko. Dəzlanən sap də isi!

²³ An kəɗɗak wəzaŋ va Maŋgəlva aɗi suk wən nan na, asna wakəɓap əziwwe, ɗiyiŋ tam pak waddoŋ anetda də zazaya.»

²⁴ Moyis aprəmək ma dəhən naka, aɗɗak an va anah sən pakə.

²⁵ Yas Moyis awel ɗiy tetek səret mə Israyelɗe pakə, aɗiyik aket ɗiy: va deyeɗe aket gabalɗe, aket səkatɗe, aket kaklaw sle'ɗe gəm aket kəlawə.

²⁶ Tahəŋ ətaw wən net ɗiy pay pakə. Wən an ɓəɓəl na, tahəŋ əki sənən Moyis, an kakaftak na, ndəɗaŋ ətawnən wən nani.

²⁷ Moyis appanək dəhən əmbata, ndən mbat aka dələv nani.