Əgilye 16 - Bible en Guidar

Manhu dit gbegberwekɗe

¹ Wəsap net mə Israyelɗe pak ambatək sə Eliyam, agapək a kapta-muyã na Sin, aka walaŋ Elim də Sinay addəv əvoŋ kəlaw kiyən sle na təla masulan səza agilyoŋ sə Eziptə.

² A kapta-muyã na, wəsap net mə Israyelɗe pak aɓuhuk man aket may Moyis də Aron.

³ Mə Israyelɗe aɓsitin na: «Aŋ na! Dəɗah va Yawe dəbayəm aka dələv na Eziptə, pay mədakkal aka mesteɓe na sluwa, mədawzəm Way kpe'i! Kəgilgəmənək kəla kapta-muyãŋ na vi kawbay əsapəŋ pak də may sa?»

⁴ Yawe aɓsən Moyis na: «Wanəzi sukum peŋ sə disiŋ va buna. Va addaŋ pak, ɗiy dəgilyoŋ əkkalan an adawzəmaŋ va aza wəsɓəta, vi nəslegəni: wadawaŋ addəv mahenziŋ naw sa awaniɓa adawaŋ na ɓa?

⁵ Aka pay masləre'en, an adanənək an akiyaŋgə, an akkalan vanəs na, warahaŋ na pay sula.»

⁶ May Moyis də Aron anahaŋ sitin mə Israyelɗe pak na: «Moskoyəŋka, wakəsənən na, Yawe dəgilgukum səka dələv na Eziptə;

⁷ Də mopumo na, wakulanən gagdak na Yawe, vi Yawe aprəmkumuk əhəm dəndəni. Ya nam na miy mənan kəɓuhungən mokum akam di?»

⁸ Moyis amna: Yawe wapsukum slu nawzəm moskoyo gəm peŋ də mompumo vi kəbaŋgəni. Gala Yawe adaprəmkum əhəma, dəndə Yawe kəhəmaŋgə. Nam miy mənan di.

⁹ Moyis aɓsən Aron na: «Anah sən əkkal net mə Israyelɗe pak na: Məzar go'o aba Yawe, vi aprəmək əhəm nokum.»

¹⁰ Gala Aron adawpel sən əkkal net mə Israyelɗe pakə, ndəɗaŋ heret kpaŋgən kəla kapta-muyã: awlanən na, gagdak na Yawe arbək addəv slay buna.

¹¹ Yawe apel sənək Moyis də wənah na:

¹² «Nəprəmək əhəm net mə Israyelɗe. Anah sit na: Pay priŋpriŋ na, wakəzəmaŋ sluwa; də mompumo, wakəbaŋ peŋ, wakəsənwən na, intə Yawe, Maŋgəlva nokum.»

¹³ Moskoy nan na, gbegberwekɗe azzoŋ asərətnən dibirgidiki; də pummo na, minɗe aziyaŋgək sulək ki dibirgidiki.

¹⁴ Səza minɗe assaraŋgə. Awlanən aka ki kapta-muyã na, zəga tay slepreke slepreke məzənzla pelpeli, zəga va ɓəɓrezle mərma zən aka dəlvafuŋ.

¹⁵ Yaŋ mə Israyelɗe awlanəni, ɗəf ənah sən məlmən na: «Manhu» Miy aŋ di? Vi dəsən na miyi di ɓa? Yas Moyis anah sit na: «As Way məs Yawe apsukum ka zəga nawzəmi yi.

¹⁶ An Yawe aɗi wən nan yaŋka: Məkkpor ɗəf pak gba adawzəma. Aza ki ɗəf pak hĩlĩw maway taka. Ɗəf pak aza wəŋɗa net ɗiy neŋgili ananda adawnda.»

¹⁷ Mə Israyelɗe aɗɗanənək vaska; akkalanənka, an dəkkal diyɗa gəm an dəkkal siɗɗikke.

¹⁸ Səza aslanən də hĩlĩwe, ɗəf an dəkkal diyɗa nan dəday ɓa, ɗəf an dəkkal siɗikke, nak dəgəs ɓa'a. Naway pak akkalək gba adawzəma.

Wən məɗiyən temtem aka wən na manhu

¹⁹ Moyis aɓsit na: «Ɗəf adawzaɓan ka pummo ɓa!»

²⁰ Ya dəprəmən ma Moyis ɓa, appaŋgək ka pummo; awə tentiwilgeɗ kuɗis-kuɗisi, yas akkpaŋ vərãhə. Moyis adək gədəv aketi.

²¹ Aza də mopumo pak ɗəf əkkalan gba adawzəma. An pay arəmka ndən uwere.

²² Pay masləre'eni, akkalanənək peŋ, ɗəf taka pak hĩlĩw sula sula. Ɗiy gugriɗ na wəkkal net ɗiy pak azzoŋguk aboton sənən Moyis.

²³ Anah sitik na: «Aski an Yawe anah aka əffete, pay salala naffet na Yawe yi. Mazayni məda an nawda dəde; an nawya duya'ə, muya'a; an nakani, məɗi ka pummo.»

²⁴ Aɗiynənək hã ka pummo, va Moyis aɗi wən nani. Dəŋgən ɓa, dəwə tentiwilgeɗ ɓa'a.

²⁵ Moyis amna: «Məzəm dəpaŋka. Vi dəpaŋ na pay naffet na Yawe yi. Dəpaŋ na kərahəŋ na awra ɓa.

²⁶ Wakəkkalanən pay sləre, pay mabuhulon na, əffeti yi; aka pay nan na asan na ɓa.»

²⁷ Yaŋ aka pay mabuhulon na, ɗiy sə weleŋgiɗ agilyoŋ kawnda, ya dərahaŋ ɓa.

²⁸ Yawe anah sənək Moyis na: «Hã gap dewe kədappanən əɓoŋ darma əpel na ənziya gəm tive naw di?

²⁹ Mula, Yawe apsukumək pay naffete, vini aka pay masləre'in na, apsukum peŋ na əvoŋ sula. Pay mabuhuloni, ɗəf pak adawgilyen ɓa, dəsan a gəlani.»

³⁰ Pay mabuhuloni, ɗiy affeteŋke.

³¹ Mə Israyelɗe alvanənək na, Manhu. Səɗek va tassaka-na-bekne məslembeɗin, babara, nenek nan va gəpa məpəpla məslahəŋ də amama.

³² Moyis amna: «Aŋki əpel an Yawe aɗi wən nani: kawɗi Manhu van maway ɗap taka ta'ə, vi sayit ɗiy nok dulanəngən peŋ məs nəzəmgukum dəndən a kapta-muyã, gala nəgilgukum səka dələv na Eziptə.»

³³ Yas Moyis anah sən Aron na: «Agəm hinziw taka, azlər Manhu maway ɗap taka addəvən, aɗi aba Yawe, kawzaɓan vi sayit ɗiy noko.»

³⁴ Aron aɗiyək ta' aba kalaɓ na wənmiyna, va Yawe aɗi wən nan sən Moyis.

³⁵ Kirtit mə Israyelɗe azəmaŋgək Manhu əzva kaklaw poɗo hã gap ətoŋ net aka dələv məs assoŋ də gəla; Manhu adawzəmaŋ hã ndəɗaŋ gap aket meŋge na dələv na Kana'an.

³⁶ Hĩlĩw maway van na, marga wawɗakan kəlawə.