Əgilye 15 - Bible en Guidar

Gəlya na Moyis də an net mə Israyelɗe

¹ Ndəni Moyis dit mə Israyelɗe ayanən gəlyaŋ sən Yawe, anahaŋ aɓɗaŋ na: «Wanəya gəlya sən Yawe, askək wəla; azganək pələs də ɗəf naka a pehe.

² Gbogboŋ naw də gəlya naw na Yawe yi. Əkõh naw na Maŋgəlva yi. Wanəgagdakan Maŋgəlva net afiŋgiɗwa də wəɗi kini.

³ Yawe məzəlpay. Yawe yi iya nani.

⁴ Mawteɗ dit məzəlpaŋ na Farawən, a pehe yi andole. Ɗiy mətektek səret ɗiy na pələs nani pehe net vəlarɗe asulupike.

⁵ Məhere atəpgitke, asəreheŋgik ammbet va gərma.

⁶ Yawe, va dəzəŋ nok, gbogboŋgi yi, Yawe, va dəzəŋ nok, tay əŋzlan məzuzele.

⁷ Addəv gagdak nok metiŋgini, is tat əŋgrof məzuseɓɗe noko. Is tat əppan ədagədəv nok wəzet va tərɗa ɗarə.

⁸ Də wəmpəs na məŋkunko iŋkile akkalaŋka, armannək zit hirzliŋ, iŋkile məzədawaŋ arslaŋgək dahadaha Inkile na pehe arslaŋka.

⁹ Məzuzel tay ənəh na: Wanərɓahani, wanərufo, wanuɗakan wərəh na wəgaya, wanəbə kpe'i. Wanəptu masalam nawa, wanərme də vawa!

¹⁰ Kəmpəska, pehe asəritike. Abətaŋgək va təbəz aret iŋkile kpukpumɗe.

¹¹ Yawe sə weleŋgit meŋgilveɗ na naway va is di? Naway məs gagdak na salala nan va is Nawgeslne' sən də wəgagdakani di? Məgəɗ zəga naggət akan di?

¹² Kəpparək vok dəzəŋ, dəlvafuŋ asɗikke.

¹³ Də moggon noko, Kədawgitik ɗiy məs kəmeti! Də gbogboŋ noko, kəkek addəv salala noko.

¹⁴ Ɗiy tahəŋ əkkereŋgi, səza aprəmnəni. Wəzəmsahã armek mə Filistiɗe.

¹⁵ Yaŋ məgeslnegit milyeŋge na Edom. Geslne armek məs gbogboŋɗe na Mo'ab. Ɗiy naka dələv na Kana'an pak aɓlaŋka.

¹⁶ Geslne metiŋgin də ezlezle adek aketi. Vi gagdak na vokiy assoŋ sləɓək va gərmeŋge, hã gap ɗiy nok mbataŋgə Yawe, gap ɗiy nammbok mbataŋgə.

¹⁷ Wakəke kawɗiyit aka gərəm nawray voko. Yawe, təki kədassoko, kəzaɓanək salala. Yawe, Vokiy dəzaɓani.

¹⁸ Yawe tay əzəm məlĩ ka faɗə!»

¹⁹ Gala Pilseŋge na Farawən atoŋgoŋ dit mawteɗ gəm məpeŋgeŋ pilseŋge nan addəv pehe, Yawe amndegetik iŋkile na pehe aketi: net mə Israyelɗe na aggaraŋ dəka təki məklakan addak pehe.

²⁰ Məskəleŋgək Miryam məlmən Aron, təgəmtək dəglak avata; yas gil beymet agilyoŋ ammbat dit digileɗ gəm də wəskəla.

²¹ Miryam təgəmək wəla gəlya: «Məyə sən gəlya sən Yawe, vi ɗəf gagdaki. Aslanək pələs də məzupeŋ akani, azgetik a pehe!»

Təŋ səza pehe net vəlarɗe hã aza mossorgo na Sinay ( 15:22—18:27 ) Iŋkile na Marah

²² Moyis akek mə Israyelɗe sə ma pehe net vəlarɗe, agilyoŋgək kəla kapta-muyã na Sur. Addoŋguk əvoŋ hoku ədaw a kapta-muyã məza gassaŋ iŋkile ɓa.

²³ Agapaŋgək a Marah, ya dəɓapaŋ əsenin iŋkile na Marah ɓa, vi tərãhəŋgə, vini məyan na «Marah».

²⁴ Ɗiy aɓuhənək met aka Moyis dawnahaŋ na: «Miy mədawsa kandi?»

²⁵ Yaŋ akkaman Yawe, Yawe arban sən wəlaŋga. Azgan aret iŋkile, iŋkile nek kpaŋ neki. Adaki aziwgin sit wən nani də va adadawaŋgə. Adaki awla nazeti.

²⁶ Amna: «An kəprəmək ma Yawe, Maŋgəlva nok moggoni, an kaɗɗa zəga təstəs ama harani, an is tat əpak sləmok ammba əpel na ənziya, an is tat ərma wən an aynə pakə, gbəgba nəki aket mə Eziptiɗiŋ ade na akok ɓa, vi intə Yawe nawmbəlguko.»

²⁷ Agapaŋgək a Eliyam: Met iŋkile tahəŋ kəlaw kiyit sula adaka, gogozleɗ kaklaw buhulu. Aziynən dibirgidik net adak go'o dit iŋkile.