Əgilye 14 - Bible en Guidar

Farawən tay əzbet mə Israyelɗe

¹ Yawe apel sənək Moyis amna:

² «Anah sit mə Israyelɗe dəmndoŋ dəmpanən dəbirgidik net aba Pi-Hahirot, aka walaŋ Migdol də pehe, aba Ba'al-sefon, aban rakrak kədawziynən dibirgidikɗe nokum, a maŋgava pehe.

³ Asna, Farawən wapel aket mə Israyelɗe: “Tahəŋ slorslor də geslne addəv dəlva! Kapta-muyã asɗikke!”

⁴ Wanəɓɓəlan makra Farawən, dərɓeget na, wazbeti. Ya wanəgagdakan kiyu aka Farawən də gbogboŋ nan pakə, vasna mə Eziptiɗ wasənnən na, intə Yawe.» Aɗɗaŋgə vaska.

⁵ Mənah səni məlĩ na Eziptə na, mə Israyelɗe anzoŋko'. Farawən dit məɗɗaŋ wəza nan addəɗanənək wəɗɗum net səket ɗiyi, aɓɗaŋ na: «Miy məgəɗəŋ gala məppet mə Israyelɗe əmbat səka əgəɗ səm wəza di?»

⁶ Atokək mawta na pələs nani, andek ɗiy nan dəndəni.

⁷ Andək mawteɗ dəwel səkat sləre sə Eziptə, dit ɗiy na pələs aket va assoŋ pakə.

⁸ Yawe aɓɓəlanək makra Farawən, məlĩ na Eziptə, yas azbet mə Israyelɗe dəgilyoŋ kivet ɗohɗoh naka.

⁹ Mə Eziptiɗ azbetinik dit pilseŋge gəm mawteɗ na Farawən gbogboŋ nani, arufin na aziyənək dibirgidik net ama pehe go'o də Pi-Hahirot, aba Ba'al-Sefon.

¹⁰ Farawən adek go'o. Mə Israyelɗe le'gənən heret na: Mə Eziptiɗ yeŋ əzbetini! Geslne armek mə Israyelɗe sawɓa yaŋ akkamanən Yawe.

¹¹ Apsənən Moyis na: «Magamasɗe dəkkpapaŋ sə Eziptə, kəkiyəm məmtəgən a kapta-muyã sa? Miy aŋ kəgəɗ səm dawgilgəm sə Eziptə əŋdi?

¹² Mənoh suk wəpeləŋ sə Eziptə dawnəh na: “Appam məgəɗ wəza sit mə Eziptiɗ ɓa sa? Vi dəɗah səm wəɗɗa wəza sit mə Eziptiɗ ki məmtəgən a kapta-muyã.”»

¹³ Moyis aɓsit ɗiy na: «Kəgeslne'eŋ ɓa! Məmpa təlkum! Mula əkõh va Yawe adaɗɗa vikum dəpaŋka. Vi mə Eziptiɗ kulaŋ dəpaŋka, kulenin na ɗah əmpa ɓa.

¹⁴ Yawe dədawgay a gəlokum. Nokum na, sləɓək kədassoŋgu!»

Maŋgəlva akoluk tive dəka pehe

¹⁵ Yawe anah sən Moyis na: «Vi miy kədawhəm su di? Anah sit mə Israyelɗe na dəddoŋgu!

¹⁶ Ya nok na, aslan zleŋge noko, atəl vok aka pehe, apɗaka, mə Israyelɗe dətoŋgoŋ addak pehe dəka təki məklakani.

¹⁷ Naw na, wanəɓɓəlan mekret mə Eziptiɗ dəsereheŋgin ammbeti, vi nəgagdakangən kizu aka Farawən də gbogboŋ nani, mawteɗ nani gəm dulaɗe nalpa nan pakə.

¹⁸ Vasna mə Eziptiɗ wasənnən na, intə Yawe, an nəgagdakanək kizu aka Farawən, aket mawteɗ nan dit dulaɗe nalpa nani.»

¹⁹ Maslay na Maŋgəlva ambatka, ndən məzudaw aba dibirgidik na Israyel al dərɓegeti; slaybuwən nabet ɓulot nak allək ziw dərɓegeti.

²⁰ Slaybuwən van adek ətoŋ a walaŋ dibirgidik net mə Eziptiɗ də an net mə Israyelɗe. Dahah guzliyo; dahah əkekeɓe' dəfɗa. Kim awzaraŋ go'o aza zit ɓa.

²¹ Moyis atələk van aka pehe. Dəfəɗ nan kimi, Yawe akomik iŋkile də barkataŋ nammba pay nampummo, aŋkəlwək pehe va dəlvafuŋ. Iŋkile arslaŋka,

²² mə Israyelɗe atoŋgoŋgək dəddak pehe aka təki məklakani, iŋkile tahəŋ va zlava na dələv dəka dəzəŋ də zlaɓay neti.

²³ Mə Eziptiɗ azbetinke, atoŋgoŋgək ammbeti, pilseŋge na Farawən dəwənnet pakə, mawteɗ nani dit məpeŋgeŋ pilseŋge nani, hã addak pehe.

²⁴ Aba pummo, səddəv offo də slaybuwən na, Yawe awəl afuŋ kəlaza dibirgidik net mə Eziptiɗi, yas atoŋgən əttap a dibirgiɗik net mə Eziptiɗi.

²⁵ Aynanək tilit mawteɗi, awɓap əŋkoroŋ ɓa. Yas Eziptə amna: «Wanənzaw səba Israyel, vi Yawe dədawgay də Eziptə ammbeti!»

²⁶ Yawe anah sən Moyis na: «Atəl vok aka pehe: iŋkile dəzlalbayaŋgən aka Eziptə dit mawteɗ nan gəm məpeŋgeŋ pilseŋge nani!»

²⁷ Moyis atələk van aka pehe, a bapummo iŋkile na pehe amndoŋgək a gəlet va lahəŋka. Mə Eziptiɗ dənzoŋ almaŋ sitini. Vas Yawe attu' mə Eziptiɗ faraɗa səzan addak pehe.

²⁸ Iŋkile azzoŋguk əsəritin mawteɗ dit məŋkoroŋ pilseŋge; də dula nalpa na Farawən məs dəsereheŋ ammbet a pehe, tay dəmbər səret təttaka ɓa.

²⁹ Ya net mə Israyelɗe na, aggaraŋgək dəka təki məklakani addak pehe, iŋkile akomoŋgək dəka vet dahãdahã zigiɗ zigiɗi.

³⁰ Pay nan dəpaska, Yawe akõhgitik mə Israyelɗe səvet mə Eziptiɗi, mə Israyelɗe awlenənik mə Eziptiɗ mimtit kpor a mabuzgum na pehe.

³¹ Israyel awlak gbogboŋ an va Yawe agəɗ aka Eziptə. Ɗiy ageslne'eŋ sənən Yawe, atafən Yawe gəm gawla nan Moyis.