Əgilye 13 - Bible en Guidar

Əyak maɓɓan dəwəl sən wəzləra na Pakə

¹ Yawe apel sənək Moyis na:

² «Aɗi su ta' uwa maddaabəŋ pakə, uwa mizilin na məlviya na Israyelɗe, net ɗiyi də an na zəga mamayã. Nan nawi.»

³ Moyis, aɓsit ɗiy na: «Məɗɗumon payəŋ məs kəgilyoŋ sə Eziptə, səddəv gəla na balam, vi də gbogboŋ na van Yawe agilgukum sədaka. Kawzəmi zəga məhəsən ɓa.

⁴ Dəpaŋki kədawgilyoŋgu, aka təla na Bu'um.

⁵ Ya, pay Yawe adawkuk kəlaka dələv net mə Kana'anɗe, net Hittiɗe, net Amorɗe, net Hivviɗe gəm net Yebusɗe, məs asway sit afiŋgiɗkum napsuko, dələv məs moŋvo də amama adawdawaŋ akan lokloku. Wəzaŋka, aka təlaŋki kədaɗɗani:

⁶ Lumu taka, zəga məza wuɗo ɓa kədawzəma. Pay mabuhuloni, wəzləra na Yawe yi.

⁷ Zəga məza wuɗo ɓa kədawzəmaŋ pay buhulu. Zəga məhəsən kawlay ɓa, wuɗo, kawlay aka va nok ɓa pakə.

⁸ Pay dəpaska kəboton səngən wutuk də wənah na: Aŋki Yawe agəɗ viyu gala nəgil sə Eziptə.

⁹ Wasan suk zəga narba azan aka voko gəm naɗɗumoni a mirbizkum, vi Mahenziŋ na Yawe dəsangən a moko, vi də van gbogboŋgi Yawe agilguk sə Eziptə.

¹⁰ Ama wəzva pak, kəzbanəngən wən nan də pay nani.»

¹¹ Pay Yawe atoŋguk aka dələv na Kana'an va asway suk gəm sit afiŋgiɗuk wapsukoŋ na,

¹² uwa na məlviya nok pak kəpsəngən Yawe, də zəgeɗ memeyẽɗ nok mezeŋgleket maddaabəŋ pak sən Yawe!

¹³ Wət bəlata na koro na, kəbitgən də time. An kəbit na ɓa na, kəŋzlugən muffur wəlani. Ya uwa na məlviya nok səret kirtuk pak kəbitgini.

¹⁴ Pay an wətuk assohõk mazayən: Vimi aŋ di na? Asna kənah səngən na: Də gbogboŋ na vani Yawe agilgəm sə Eziptə, səddəv gəla na balam.

¹⁵ Gala Farawən aɓɓəlan kiyən, atakəm dawmbata, Yawe abeyək uwa maddaabəŋ net ɗiy də an net zəgeɗ memeyẽɗ naka dələv na Eziptə pakə, vini nədawzaɓ-Maŋgəlva sən Yawe də uwa na məlviya mizilin pakə, ya uwa maddaabəŋ net kirtu pak nəbitgini.

¹⁶ Wasan zəga nawsən azan aka vokum gəm a mirbizkum. Vi də gbogboŋ na vani Yawe agilgəm sə Eziptə.

Maŋgəlva tay ədawgit ɗiy nani

¹⁷ Pay Farawən appet ɗiy əmbata, Maŋgəlva dəke dəka tive naka dələv net mə Filistiɗe ɓa, ndəni duɗukko kəta. Vi Maŋgəlva amna: «An ɗiy awlanən əgay na, waddakaŋ ka ndəɗaŋ kamndoŋ a Eziptə!»

¹⁸ Maŋgəlva akkpeŋgetik ɗiy kəla kapta-muyã kəla pehe net vəlarɗe. Va wədor nalpa yi, mə Israyelɗe agilyoŋ səka dələv na Eziptə.

¹⁹ Moyis andek sleŋsleŋɗe na Yosef avani, vi nan aswaygitik mə Israyelɗe dəsway dawnəh na: «Sesel Maŋgəlva watərkum; kəkeningin sleŋsleŋɗe naw səŋ avokumu.»

²⁰ Ambataŋgək sə Sukkot, ampannək dəbirgidik net a Etam, ama kapta-muyã.

²¹ Də kapaya, Yawe ədaw abet addəv slaybuwən va dədəka, də dəfɗa, tay əkekeɓe' təki abet addəv offo zulorro vi dədawaŋgən aka tive kapay də dəfɗa.

²² Də kapaya, slaybuwən va dədəka awzar səket ɗiy ɓa; də dəfɗa, offo zulorro tay abeti.