Əgilye 12 - Bible en Guidar

Wəzləra na Pak gəm əmbat sə Eziptə ( 12:1—15:21 ) Wəzləra na Pak

¹ Yawe aɓsən Moyis də Aron aka dələv na Eziptə dawnəh na:

² Təlaŋka, wətəŋ net təlaɗe yi azokum, ndəni wətəŋ net təlaɗe na wəzva azokum.

³ Məpel sən wəsap net ɗiy na Israyel pak də wənah na: Də wəvoŋ kəlaw na təlaŋka, dəgəmaŋgən, afən gəla pak, porsoku awaniɓa ndargayãkə, taka aza təl gəla.

⁴ An gəla vanəs məffinyahi, ɗiy tahəŋ gala na hãw ɓa, asna dəgəmgən ndəndə meggen an go'o də gəla nani aza əŋɗa net ɗiyi. Ɗəf pak va adawzəm kədawelnin zəga mamayã nani.

⁵ Wət time məs kədawgəmaŋ dəsan mizilin na wəzva taka məza heslepe azan ɓa səret gilewi.

⁶ Kəɗinəngən gap əvoŋ kəlaw kiyən poɗo na təlaŋka. Wəsap net ɗiy na Israyel dəwən neti, dətawningən wəlet pay priŋpriŋgi.

⁷ Dəgimingən mbeli; dəppeyningən azet wəleŋɗe na maddamba dahãdahã, aka kiyit maddambeɗe na gəleɗe məs adawzəman addivti.

⁸ Də dəfəɗəski kədampərnən slu nani. Məpsan dəpse kədampərnən də peŋ məza wuɗo ɓa, də kevile tatrãha.

⁹ Kədampernən madaran may mədan dəde ɓa, səbbər məpsan akoffo də kini, tetewirgeni, gəm zəga naddəvən ɓa.

¹⁰ Kədappaŋ ka pummo ɓa; ya an dəmbər ka pummo na, kəzlanəngən akoffo.

¹¹ Vaski kədampərnəni: dadakkum deŋdeŋgi, hensekɗe aka təlkum kpa'ə, zleŋge avokum kãwə. Də kakara kədampərnəni. Pak na Yawe yi.

¹² Dəfəɗ nan na wanətoŋ dəka dələv na Eziptə. Wanəbay uwa maddaabəŋ na ɗəf titir də an na zəga mamayã naka dələv na Eziptə pakə. Ya in Yawe wanətaw wən aket meŋgilveɗ na Eziptə.

¹³ Mbeləŋgə dədarbanən gəla məs kədassoŋ addəvni. An nulek mbeli, wanətoŋ kiykum, tatwãh məraygən dələv arəŋgukum na gala nədarga dələv na Eziptə ɓa.

¹⁴ Pay nan wasan sukum naɗɗum akani. Wakəɗinən ka na wəzləra sən Yawe vi sayit ɗiy nokumu. As an məɗiyən naɗɗa məza addəɗ ɓa pay paki yi.

Wəzləra na peŋ məza wuɗo ɓa

¹⁵ Pay buhul peŋ məza wuɗo ɓa kədawzəmaŋgə. Arbək na, aka pay maddaabəŋ na, kəzanəngən wuɗo sə nokum da. Vi ɗəf an dəzəm peŋ məhəsən təŋ səza əvoŋ taka hã gap aza əvoŋ mabuhulon na, asna kawgilgini səret mə Israyel.

¹⁶ Əvoŋ maddaabəŋ na, kəyaŋgən əkkal salala. Aka pay mabuhuloni, kəyaŋgən əkkal salala. Wəza tay kədaɗɗaŋ dəpas ɓa, dəbərki way va peŋ nawzəm nokum kaka ɗəf adaɗɗa.

¹⁷ Kərmanəngən pay na wəzləra məza wuɗo ɓaŋka, vi pay nani yi, nəgilgit dulaɗe nalpa nokum səka dələv na Eziptə. As an məɗiyən naɗɗa məza addəɗ ɓa pay paki yi.

¹⁸ Moskoy na əvoŋ maddaabəŋ na pay makəlaw kiyən poɗon na təla maddaabəŋ, kəzəmaŋgən peŋ məza wuɗo ɓa, gap moskoy na əvoŋ kaklaw sula kiyən taka na təla.

¹⁹ Pay buhul, wuɗo adawsan eŋgil anokum da ɓa. Vi ɗəf an dəzəm zəga məhəsni, səret molhõyẽɗi də səret kirtindələv na, ɗəf nan karɓahni səra əsap net mə Israyelɗe.

²⁰ Zəga məhəsən pak, kədawzəmaŋ ɓa. A təki kəssoŋ də gəla, zəga məza wuɗo ɓa kədawzəmaŋgə.

Way na Pak

²¹ Moyis ayek ɗiy məsɓet na Israyel pakə, aɓsit na: «Mərəm porsoku awaniɓa ndargayãkə məgdaha, mətaw wəlan na Pak vi mazlalwõkum.

²² Kəgəməngən Isop minan ndiɗi, kəyopnəngən aret mbel naddəv kasliya, kəppay sənəngən ki maddamba gəm wəleŋɗe na maddamba maŋgava dahãdahã, ya nokum na ɗəf adawgilyen siŋgil ananda ɓa, hã təki dadaŋgə.

²³ Yawe watoŋ karga Eziptə də tatwãhã, ya wawle mbel aka ki maddamba gəm azet wəleŋɗe na maddamba dahãdahã neki. Vasna Yawe watoŋ ki maddamba vani, appan na əza ətoŋ eŋgil anokum da kargan də tatwãh ɓa.

²⁴ Kərmanəngən əpel məɗi wən nanəŋka, is dit kirtuk ka mahenziŋ hã faɗə.

²⁵ Pay kədawtoŋgoŋ aka dələv məs Yawe adapsukum va anahə, vasna kərmanəngən wəzaŋka.

²⁶ Pay kirtukum adawnahaŋ sukumən na: wəzaŋ miy adarba vikum di?

²⁷ Kənahaŋgən na: Əzaɓ-Maŋgəlva na Pak sən Yawe məs dətoŋ dəka kigəla net mə Israyelɗe a Eziptə, gala abey ɗiy na Eziptə, akõhgit gəleɗe nam yi.» Yaŋ ɗiy aɓe'en appu'oŋgu.

²⁸ Mə Israyelɗe ambataŋka, aɗɗaŋgək va Yawe aɗiy sit may Moyis də Aron, vas aɗɗaŋgə.

Tatwãh an dirɓe dirɓe faɗə: əmta net Tiziɗe net mə Eziptəɗe

²⁹ Aka teteŋgit sin na, Yawe abeyik uwa maddaabəŋ naka dələv na Eziptə pakə, təŋ səka Tiz na Farawən məs nawsan aka mazaŋga na məlĩ nani hã gap aka Tiz na mə fərsəna a fərsəna, də an net zəgeɗ memeyẽɗi.

³⁰ Farawən asilik də dəfɗəska, məɗɗaŋ wəza nan dəwən neti, ɗiy na Eziptə dəwən neti, vaŋvəl agəɗək metiŋgin a Eziptə, vi gəla tay məza əmta dəgəɗ addəvən ɓa ɓa.

³¹ Ayek may Moyis də Aron də dəfɗa, amna: «Misili! Migil səret ɗiy nawa, mənokum dit mə Israyelɗe. Məddoŋ əgəɗ sən wəza sən Yawe va kənahaŋgə.

³² Migim gilew dit wasliɗe nokum va kənahaŋgə, məddoŋgu. Kəɓuhoŋ suwəngən ma tamə!»

³³ Mə Eziptiɗ aɗɗumoŋgək na wamtaŋ pakə, yaŋ agəɗ sitin kakara sit mə Israyelɗe, appetinik əmbat gu' səka dələv neti.

³⁴ Yaŋ mə Israyelɗe agəmən gəpa net məllaɓən tak dəhəs ɓa; atərnənək dit lukutɗe net aɗiynən akki veti.

³⁵ Mə Israyelɗe azbanənək əpel na Moyis; assohõŋgək zəgeɗ na təbəz babar dit zəgeɗ na meleŋge may lukutɗe səvet mə Eziptiɗi.

³⁶ Yawe aɗɗak ka ɗiy nan dərahaŋgən mbəlembəle ama haret mə Eziptiɗi, apsitinik an attokoŋgu. Vaski appitin mə Eziptiɗe!

³⁷ Mə Israyelɗe ambataŋgək sə Ramses a Sukkot, məzəlpaŋ mədawaŋ də tilit waɗɗaŋ gabal səkat sləre, zəli məza əŋɗet kirin ɓa.

³⁸ Mahəlfaɗə mbirit diyɗa aslahaŋgək dənɗaŋ ambataŋgək dit gilewi, timeŋgiɗi gəm wasliɗe kaɗkaɗə.

³⁹ Adan mərɓehit sə Eziptə na, adaŋgək peŋ-məsleprekeɗe məza wuɗo ɓa də gəpa məllaɓən məs agilyoŋ dəndən sə Eziptə naka, vi dəhəs ɓa. Dənziyaŋ ɓa ya dəkayaŋ zəga nawzəm net tive tive avet ɓa.

⁴⁰ Wəzva net mə Israyelɗe aka dələv na Eziptə, agəɗək səkat poɗo də kaklaw hoku.

⁴¹ Addəv wəzva səkat poɗo də kaklaw hokuŋka, pay nanəski dulaɗe nalpa na Yawe pak agilyoŋ səka dələv na Eziptə.

⁴² Dəfəɗ nani, nawvoŋ na Yawe kim daran kawgilgit səka dələv na Eziptə. Dəfəɗ nani, na Yawe yi, nawvoŋ net mə Israyelɗe beymet kim dereti, va sayit agap pakə.

Va aslə naɗɗa wəzəlra na Pak

⁴³ Yawe anah sən Moyis də Aron na: «Əɗɗa na Pak yaŋka: Molhõyõ tay dədawzəm ɓa.

⁴⁴ Balam məzilin məlbəhən də koɓo pak, kəskəlgəngən awra, asna wazəmə.

⁴⁵ Məsgəlokum də məgəɗ wəza na dala azəmaŋ na ɓa.

⁴⁶ Addəv gəla takay əzəm nani; kədawgilgin slu nan siŋgil ɓa. Adaŋzlaŋ sleŋsleŋ nan taka dayday ɓa.

⁴⁷ Wəsap net mə Israyelɗe dəwən nan pak dədaɗɗanəni.

⁴⁸ An molhõyõ narokum, man aka wəɗɗa wəzləra na Pak sən Yawe na, ɗəf məzilin nananda pak dəsan məskələn awra. Asna, waɓaɓ kaɗɗani, ya wasan va wətdəlva. Məs dəskəlawra ɓa pak na, adawzəm ɓa.

⁴⁹ Mahenziŋ taka dədawsan vi wətdəlva gəm molhõyõ məs dəsan arokumu.»

⁵⁰ Mə Israyelɗe pak, aɗɗanənək vaska. Va Yawe aɗi wən nan sit may Moyis də Aron aɗɗanən dekdeki.

⁵¹ Pay nan dəpaski Yawe agilgit mə Israyelɗe səka dələv na Eziptə aza dula nalpa neti.