Əgilye 11 - Bible en Guidar

Tatwãh an medidirɓe

¹ Yawe anah sənək Moyis na: «Wanəki tatwãh taka əmpa aka Farawən də aka dələv na Eziptə. Sə dərɓagan na, wappokum əmbat səŋka, pay adappokum əmbat faɗə, dərɓah adarɓahokum səŋka.

² Ya aprəman sit ɗiy kana, dəssohõŋgən zəgeɗ na təbəz babara gəm na meleŋge, ɗəf pak aza galani, guluk pak azat galata.»

³ Yawe apsitik mə Eziptiɗ ula sasẽhit mə Israyelɗe. Əmpa na, Moyis, ɗəf metiŋgini sawɓa aka dələv na Eziptə a maheret məɗɗaŋ wəza na Farawən gəm a maheret ɗiy pakə.

⁴ Moyis amna: «Vaŋ Yawe anahə: Də teteŋgiɗ sin na, wanəgil addəv Eziptə.

⁵ Uwa maddaabəŋ naka dələv na Eziptə pak wamtə, təŋ səza uwa na Farawən maddaabəŋ, məs dədawgəm mazaŋga na məlĩ nan kəta, gap aza an nat balamək nan məzusəra, dit kirtit zəgeɗ memeyẽɗ maddaabəŋ pakə.

⁶ Wəhəm na gəlabay wagəɗ aka dələv na Eziptə təhə, zeŋvin dəgəɗ ɗah ɓa, ya agəɗ na ɗah ɓa'e.

⁷ Ya anet mə Israyelɗe da na, kəra aharan na ɗəfa may zəga mamayã ɓa, vi kəsənnəngən na, Yawe wagəɗ uɗak aweleŋgit mə Eziptiɗ dit mə Israyelɗe.

⁸ Addəv asna məɗɗaŋ wəza nok wapirkoŋ kəlazawa, wappu'oŋ abaw də wənah na: Agili, is dit ɗiy nammba təluk pakə. Sə dərɓaga askan na, wanəgili» Yas agil səza Farawən addəv ədagədəva.

⁹ Yawe anah sənək Moyis na: «Farawən waprəmkum ɓa, vi nəwetgən sekeneɗ naw aka dələv na Eziptə.»

¹⁰ May Moyis də Aron aɗɗetinik sekeneɗis pak aba Farawən, yaŋ Yawe aɓɓəlan makra Farawən, dəppet mə Israyelɗe əmbataŋ səka dələv nan ɓa.