Əgilye 10 - Bible en Guidar

Tatwãh madodopoɗoni: Zaray (8)

¹ Yawe aɓsən Moyis na: «Atoŋ aza Farawən, vi nəɓɓəlanək makrani, də mekret məɗɗaŋ wəza nani, vi nərbetgin sesergeɗe nawiŋ a weleŋti,

² vi kəboton səngən wutuko, gəm sən wətən wutuk va mbar nəsmenyet mə Eziptiɗ dit sesergeɗe naw nəgəɗ aweleŋtiŋ di. Wakəsənən na, intə Yawe.»

³ May Moyis də Aron, atoŋgoŋgək aza Farawən, anahaŋ sənən na: «An Yawe, Maŋgəlva net mə Ibriɗe anah yaŋka: Gap pay gbəŋgbar kədawɓoŋ dawɓegən kiyuk abaw di? Appet ɗiy naw dəmbataŋ əgəɗ su wəza.

⁴ An kəɓoŋgək dəppet ɗiy naw əmbat na, awle mazayən na wanətaw zaray aka dələv noko.

⁵ Wasərətnən dələv awəl na ɓa. Wazəmnən an dəkõh, məs ɓeɓrezleɗ appaŋgə, wazəmin wəleŋɗe məzugilyoŋ a muyã nokum pakə.

⁶ Waknəhnən gəla noko, gəleɗe net məɗɗaŋ wəza nok də gəleɗe net ɗiy na Eziptə pakə, an may afiŋgiɗuk dit dihiŋgiɗuk dulaŋ ɗah təŋ səza əsa net aka dəlvəŋka hã gap pay dəpaŋka.» Moyis amanək haran, egilik səna Farawən da.

⁷ Məɗɗaŋ wəza na Farawən aɓsənən na: «Gap dewe ɗəfəŋ adassaŋ ka pew̃eŋ abaməŋ di? Appet ɗiyiŋ dəmbataŋ əɗɗa wəza sən Yawe, Maŋgəlva neti. Hã gəgaŋ na kəsən na Eziptə tay əzza ɓa sa?»

⁸ Məkiyti may Moyis də Aron aza Farawən, yaŋ aɓsit na: «Məddoŋ məgəɗ wəza sən Yawe, Maŋgəlva nokum. Ya may nawa də nawa dədaddoŋ kandi?»

⁹ Moyis amna: «Dit gewleɗi, gəm mezzeɗ nam mədaddamə, dit kirtəm mezeŋgleketi, muguluŋgiti, gilewi, timeŋgiɗ dit wasliɗe nam mədaddamə. Vi wəzləra mədagəɗ sən Yawe.»

¹⁰ Aɓsit na: «Mbara! Yawe wasan də mənokum an nəppokumək əmbat dit kirtukum! Mula va mbərayən asan a mirbizkum!

¹¹ Agəɗ na vas ɓa! Məddoŋ kana, zel məsɓet dəddoŋ əɗɗa wəza sən Yawe, vi aski kədawkayanəni.» Yas mərɓehit səna Farawən da.

¹² Yawe anah sən Moyis na: «Atəl vok aka dələv na Eziptə kətawgən zaray: wazəmən kevile naka dələv gərak məs dəpəl səmet ɓeɓrezleɗi.»

¹³ Moyis atələk zleŋge nan aka dələv na Eziptə, yaŋ Yawe aki səmyã səmmba pay nampum aka dələv əsɓəta nan də dəfəɗ nan pakə. Təki əddaŋga, səmyã səmmba pay nampum aki zaray.

¹⁴ Zaray aveŋgik aka dələv na Eziptə təhə, assanək aka va na Eziptə pakə: adayaŋgək sawɓa, zaray dəgəɗ ɗah lahəŋ vas va agəɗəs ɓa ya dərɓagani, agəɗ na vas ɓa'a.

¹⁵ Asərətək dələv pakə, agəɗək guzli ɗəkɗəkə aka dəlva, yas azəm kevile naka dələv də uwa na wəlaŋga məs dəpəl səmet ɓeɓrezleɗ pakə. Va wəlaŋga də kevile məkdəkan tay dəmbər awra aka dələv na Eziptə ɓa.

¹⁶ Farawən agəmək zən əye may Moyis də Aron anah na: «Nəgəɗək mambray aza Yawe, Maŋgəlva nokum, gəm azokum.

¹⁷ Ya kakaŋ na, kamə məvvuyon su mbərayən naw əmpa kana. Məkkaman Yawe Maŋgəlva nokum, dəzargənəgən əmtaŋ səkaw kaka'ə.»

¹⁸ Ya agilik səza Farawən, akkamanək Yawe.

¹⁹ Yawe akkpaŋganək səmyã ka barkataŋ na məlpa də gagdak sawɓa, akak zaray naka, akomək addəv pehe net vəlarɗe. Zaray təttaka tay dəpəl aka va na Eziptə ɓa.

²⁰ Yas Yawe aɓɓəlan makra Farawən, dəppet mə Israyelɗe dəmbataŋgən ɓa.

Tatwãh ma vaytakani: Guzli titire (9)

²¹ Yawe anah sən Moyis na: «Atəl vok a disiŋ. Guzli titir dəgəɗgən aka dələv na Eziptə, guzli titir naɗɗa gbislgbisli!»

²² Moyis atələk van a disiŋ, guzli titir agəɗək aka dələv na Eziptə dəwənnan pay hoku.

²³ Ɗəf tay dədawla məlmən ɓa, tay dədawkoroh sə gəlan ɓa pay hoku. Ya net mə Israyelɗe na, təki pasaki a təki an assoŋ də gəla.

²⁴ Farawən ayak Moyis, amna: «Məddoŋ dit kirtukum! Məgəɗ wəza sən Yawe. Gilewi, timeŋgiɗ dit wasliɗe nokum kaka adaddoŋ ɓa.»

²⁵ Moyis amna: «Istə kədapsəm zəga nawzaɓ-Maŋgəlva gəm əvəl nawzla kurmbuɗuk sən Yawe Maŋgəlva nam van sa?

²⁶ Ya dit zəgeɗ memeyẽɗ nam mədaddamə, zəga təttaka tay dədappa ɓa. Vi səreti yi mədawgəm nawgəɗ sən wəza sən Yawe Maŋgəlva namə. Mənam zək nam məsən an mədawzaɓ-Maŋgəlva sən Yawe dəndə an mənam gapsa adaki ɓa ɓa.»

²⁷ Yaŋ Yawe aɓɓəlan makra Farawən, dəŋger əppet əmbat ɓa.

²⁸ Farawən aɓsən na: «Dok səzawa! Nok na, nədawluk a maharaw aŋ əmpa ɓa. Vi pay kula haraw na, əmta noki!»

²⁹ Moyis amna: «Va kənahə! Nula na ɗah horok əmpa ɓa!»