Əgilye 1 - Bible en Guidar

Əgilye net mə Israyelɗe səka balam sə Eziptə ( 1:1—15:21 ) Wəza na balam a Eziptə 1:1-22

¹ Iya net mə Israyel məs dəzzoŋ a Eziptə də Yakob yeŋki, azzoŋgu naway pak də gəla nani:

² Ruben, Simeyon, Levi gəm Yuda,

³ Isakar, Zabulon gəm Benyamin

⁴ Dan də Neftali, Gad də Aser.

⁵ Zev Yakob dəwənnet pak tahəŋ ɗiy kaklaw buhulu: na Yosef na, a Eziptə yi səkay.

⁶ Sədərɓagani, Yosef amtə adak dit milmiŋgiɗin pakə gəm sayit ɗiyis pakgəni.

⁷ Mə Israyelɗe awaŋka, awanənək kiyit hõyo' hõyo'u, akkpaŋgaŋgək gboŋgboŋ diyɗa: dələv aknahək dəndəɗaŋgə.

⁸ Məlĩ meleketen, məs dəsən Yosef ɓa, asanək aka Eziptə.

⁹ Anah sit ɗiy nan na: «Mule va mə Israyelɗe awanən kiyit day, gboŋgboŋ əŋgə day kimə.

¹⁰ Mərah səm keket moggon aketi, adawwanən kiyit ɓa. An əgay agəɗəka, wasapaŋ dit məzuzelɗe namə, wagayaŋ də mənamə, wagilyoŋ səka dələv aŋka.»

¹¹ Aɗiyaŋgək deyeɗe aketi vi dəzimgitingin sahã, dəɗɗaŋgən wəza na vavyakə, arkaŋgək walaŋgəleɗe nakkelet zəgeɗ sən Farawən addəvti, Pitom də Ramses.

¹² Də adaŋzlu ma sleŋsleŋgit pak, mə Israyelɗe awanən kiyit hõyo'hõyo' diyɗa yas ageslne'eŋ sitinin mə Israyel.

¹³ Mə Eziptiɗ azimgitinik sahã net mə Israyel va nawteme,

¹⁴ akkpaŋganənək əssa net tuwãh diyɗa, də wəpsit wəza tatwãh naɗɗa: Dələv nawndəɓa, menekeɗe nawbaya, wəza net gulyeŋɗe, wəzeɗe en apsitin pak va nawtemi ɗarə.

Farawən tay əsər met mə Israyelɗe

¹⁵ Məlĩ na Eziptə aɓsit gil məzuwaŋ gil net mə Ibriɗe, akən taka dawyətən na, Sifra, masulat tam na Pu'a:

¹⁶ «An munokum tat uwenin gil net mə Ibriɗeŋ na, mula ba muzliya vani, An wiyni, məbaya. An waŋtə na, məppata.»

¹⁷ Muwaŋ gil nek na, ageslne'eŋ sənənək Maŋgəlva; dəɗɗanən va məlĩ na Eziptə anah sit nak ɓa, appetinik kirin mezeŋgleket medereti.

¹⁸ Yaŋ məlĩ na Eziptə, aye gil muwaŋ gil neki aɓsit na: «Vimi kəppetin kirin mezeŋgleket mederet di?»

¹⁹ Muwaŋ gil anahaŋ sənən Farawən na: «Vi gil net mə Ibriɗe, va gil net mə Eziptiɗeŋ ɓa; net guromɗeŋgə; tak muwə guluk tədawgap azet na, awaŋgək səkay.»

²⁰ Maŋgəlva agəɗ sitik moggon sit muwaŋ gil neki, ɗiy awanənək kiyit diyɗa. Akkpaŋgaŋgək gboŋgboŋgu.

²¹ Adan muwaŋ gil nek ageslne'eŋ sənən Maŋgəlva, Maŋgəlva apsitik zeŋviti,

²² Farawən aɗi wən nan sit ɗiy pak də wənah na: «Wiyin muwan pak məzgan a Nil, waŋ pak na, məppat madarata!»