Əɓuhma 5 - Bible en Guidar

Əkkam namndan əsoko ( 5:1-22 ) Amilgəm azoko

¹ Yawe aɗɗumon an dərahmə. Azi horok awla va adawraməni.

² Məpsiti arya nawray nam sit ɗiy-ɗarə, ya gəleɗe namə, sit ɗiy-ɗarə.

³ Kpaŋgəm yaŋ mitiweɗi afəm tay ɓa, may mam kpaŋ gil net gəbayɗe.

⁴ Iŋkile namə faɗsa aket mədawsa. Sesemeɗ namə dəlbah mədalbəhti.

⁵ Məzərɓahamən aklakaŋgək awlamə; məyəka ya əffet tay viyəm ɓa.

⁶ Mətələk vam sən Eziptə gəm sən Asiri, ka məbəgən way kpe'i.

⁷ Efiŋgiɗim aɗɗaŋgək mambraya, net tahəŋ əmpa ɓa. Gagdak na mambray net akami yi.

⁸ Belemɗe tahəŋ əzəm məlĩ akamə, ɗəf tay nawmõhəm səvet ɓa.

⁹ Zeŋgilem mədawkay əzan ama masalam a kapta-muyã dawki zəga nawzəm namə.

¹⁰ Gəba zəm azlək va a movoro sən hoɗhoɗ na mayã.

¹¹ Tay əvoŋgitin gil na gəgay a Siyon, gəm gorɗeŋge a walaŋgəleɗe gugriɗ na Yuda.

¹² Alewinik ɗiy gugriɗ dəveti, awgegdeketin ɗiy məsɓet ɓa.

¹³ Gewleɗ togbõli tahəŋ əsəraŋgə, gewleɗ tahəŋ əskotoŋ sən gagdak na zəga nawsla.

¹⁴ Ɗiy məsɓet assoŋ aka wətawan wən ɓa gewleɗ appanənək gabba əya gəlya.

¹⁵ Makram appanək ənneke, əskəl sən ənnek nam akkpaŋgək gəlabaya.

¹⁶ Gagdak nam agrakka! Əray akamə haya vi məgəɗək mambraya!

¹⁷ Vi aski makram assamə, viyit zəgeɗiski haram akkpaŋ girifgirifi.

¹⁸ Vi məzani mossorgo metiŋ na Siyon. Akkpaŋgək təki net balwayɗe.

¹⁹ Is Yawe is tat aka mazaŋga na məlĩ nok hã faɗə, va aza sayit ɗiy akkpaŋgə.

²⁰ Vimi kədazgət kiyəm faɗ di? Kədazgam firik hã faɗ di?

²¹ Amilgəmə Yawe, waməmil azoko. Akkpaŋgan ənziya nam meleketen va lahəŋka.

²² Wəzga kəzgam wã' sa? Meŋge na ədagədəv nok akam tay ɓa sa?