Əɓuhma 4 - Bible en Guidar

Yerusalem addəv əraya ( 4:1-22 ) Tay əzanən Yerusalem (Alef)

(Alef)

¹ Haya! Meleŋge argã'ka, meleŋge saksak arayka, gərmeŋɗe na matuya atrayaŋgək aka wətəŋ net tiveɗ pakə.

(Bet)

(Bet)

² Kirin na Siyon ndəɗaŋ məs dəssoŋ na sləma va meleŋge saksak neki. Haya! Tay uletin va mesteɓe na dələv mərkan də va ɗəfa!

(Gimel)

(Gimel)

³ Wawayɗe dayday tay əpsitin bide əwaɗgit kirtiti. Waŋ net ɗiy naw na, məs darawəktə va herkeseŋɗe a kapta-muya.

(Dalet)

(Dalet)

⁴ Hərzləm məzuwaɗ tay ətip aza geŋɗetin sit meme. Kirin memeɗeŋɗe tahəŋ əŋglaŋ waya; ɗəf tay dədapsit ɓa.

(He)

(He)

⁵ Məzəmaŋ zəga neneke tay əmtaŋ aka tive. En məɓeygit addəv arya tahəŋ əkosonən dagərgiya.

(Waw)

(Waw)

⁶ Heslepe net ɗiy naw gbefiyi day ki mambray na Sodom məs dəzə addəv hara ɗəf pilim taka məza va ɗəf dəslə akan ɓa.

(Zayin)

(Zayin)

⁷ Hã day ki ɓeɓrezlerizze deyeɗe nan adawiɗeŋ lahəŋka babar day ki moŋvo. Badak zit pərreŋgi day ki ambalyãmbalyã heret tay va gərəm Safir.

(Het)

(Het)

⁸ Gəba zit kakaŋ na tay ula nziɗiknziɗik day ki harambərziya, awsənaŋ aka tive ɓa. Kotoroki nosnos aket slesleŋɗe neti məklakan va wəlaŋga.

(Tet)

(Tet)

⁹ Dəɗa en dəmtaŋ ama masalam ki en dəmtaŋ sən mayã gəm dətaraŋ dəddakaŋ sən zəga nawzəm tay mərəh sə guli ɓa.

(Yod)

(Yod)

¹⁰ Gil də ulasahã net pak, adeninik kirtit diveti, kpaŋgaŋ ka zəga nawzəm net aka tatwãh ade aket ɗiy nawa.

(Kaf)

(Kaf)

¹¹ Ma ədagədəv nan gbeŋ Yawe eŋgbeŋge, aggbo'uk offo na ədagədəv nani. Asɗak offo a Siyon azəmək gabban məs aziw akani.

(Lamed)

(Lamed)

¹² Milyeŋge nammba dələv dit ɗiy naka dəlva dəɗɗumoŋ ɗah na məzuzel gəm massa wade ətoŋ kəla maddambeɗe na Yerusalem ɓa.

(Mem)

(Mem)

¹³ As pak agəɗ na aka mambray net məskəleŋɗe nani, gəm an məsdəlveŋge nan araygənəni yi, abeyinik ɗiy təstəs addəvni.

(Nun)

(Nun)

¹⁴ Kakaŋ na tahəŋ ədawaŋ slorslor va daŋgarɗeŋ aka tive. Mbel azet totoptotopu mətaki ərəŋgit lukutɗe neti.

(Samek)

(Samek)

¹⁵ Mərɓehit dawnah na: Məmndoŋgu, ɗiy mbəreyti! Məmndoŋgu, kəgapaŋ aŋ ɓa! Vi na ənzo adanzoŋgu məza dəsənnən təki adaddoŋ ɓa. Ɗiy ɗar tahəŋ ənahaŋ na: adassoŋ faɗ anamda ɓa.

(Pe)

(Pe)

¹⁶ Yawe sən kiyən dətrəyeti man tay aka ulet ɓa. Məgegdeketi məsdələveŋge ɓa, mulay sasãhit ɗiy məsɓet ɓa.

(Ayin)

(Ayin)

¹⁷ Haram sam ayə əga əbbah ɗarə. Ɗəhərra a təki nawga məyə əgge ɗiy-ɗarə, məs aɓapaŋ na əkõhgəm ɓa.

(Sade)

(Sade)

¹⁸ Heret ammba tələm yarra kawtakəm daddam agəlam. Əgrak nam agapka, əvoŋɗe nam aknahaŋka əgrak nam agapka.

(Kof)

(Kof)

¹⁹ Məzərɓahamən adayaŋgək kiyit gazlaɗe na disiŋ də kakara. Tay ərɓahamən aket mossorgoɗe. Əvoŋ səmən a kapta-muyã.

(Resh)

(Resh)

²⁰ Armanən məgə əmpəs nam wẽk, ana məlĩ mesiya na Yawe, ndən məs mədawnah na: «Ara zeŋgileni waməsam madaram aweleŋgit ɗiy-ɗarə!» Yaŋ addəv bizwil neti.

(Sin)

(Sin)

²¹ Ya anneki, asok zuk babyak babyakə, waŋ na Edom, is məs kəsok də gəla aka dələv na Us! Haran nok wade nawtaw wən akoko! Wabayuk va mbazla, wakəkgbuk zuk mekeleŋ!

(Taw)

(Taw)

²² Waŋ na Siyon, heslepe nok agraka, kazbani əkuk aka balam əmpa ɓa. Ya nok na waŋ Edom, atawək wən aka mambray noko. Wappasan ɗarɗar noko.