Əɓuhma 3 - Bible en Guidar

Ətawwəna gəm əɗɗum nawrəh zəga abe ( 3:1-66 ) Addəv əzəmsahã diyɗa zlaŋ əɗɗum nawrəh tayi (Alef)

(Alef)

¹ Intə ɗəf məs dəwəl əzəmsahã ama zleŋge net herɗe nani.

² Aɓelwək abani, adawgu ara guzliyo məza ara əkeɗeɗe ɓa.

³ Akaw kaka adawsaŋ van tiliwwe pay pakə.

(Bet)

(Bet)

⁴ Asseɓik slu zu də gəba zuwa, aŋzlanək sleŋsleŋwa.

⁵ Arkak zlava na muwən də tatwãh kiyu tərwəslə.

⁶ Aɗiwək də gəla ara guzli va ɗiy en dəmtaŋ farə.

⁷ Aherik zlava akaw vi nədawgilyew ɓa. Asəɓetik ŋgiyamɗe nawa, vi nədawgilyew ɓa.

⁸ Kəta nəŋgəsl vaŋvəl nəyə əbbah dayday, ndən ətak əkkam nawa.

⁹ Asukik tiveɗ naw dit gərmeŋge gugriɗe, aslokoretik tiveɗ nawa.

(Dalet)

(Dalet)

¹⁰ Asan suwək va zəga darawən adawyaŋ Ursə sorro abawa, va ɓoolu a təki nawɗam nani.

¹¹ Ədaw naw amzlagəni, abakwəka gəm azawəka.

¹² Enslinik bile nani yaŋ aɗiyu ka zəga nahõ də hara.

(He)

(He)

¹³ Aflikik kirit dəɓaw dit herɗe sə gulom nani.

¹⁴ Nəsawək ka zəga nawmas akan azet ɗiy naw pakə, kpaŋ va zəga nawya gəlya net akani.

¹⁵ Abawək dit zəgeɗ nassan makrawa azlər suwək ndərzl.

(Waw)

(Waw)

¹⁶ Anzləwək slayu dit gərmeŋge, gəm andəkwək ammba burɗuku.

¹⁷ Kəzgawək faraɗa səza zazaya, nəzgətək ki əssa neki.

¹⁸ Gagdak naw azəka nənahə, əga naw səza Yawe azəka.

(Zayin)

(Zayin)

¹⁹ Aɗɗumon əzəmsahã naw gəm slorslor nawa ndəɗaŋgə ndərzl də muwəna.

²⁰ In tat əɗɗumoni, əɗɗumoni, tay əssawa.

²¹ Hara na, ndəni nəɗi a makrawa, vini nədawgani:

(Het)

(Het)

²² Ulasãhã na Yawe dəgrak ɓa, ula-əzəmsãhã nan dəbayman ɓa.

²³ Tay əkkpaŋ meleketen aza də mompumo pakə. Əziwɓəlɓəl nok metiŋgini.

²⁴ Naw nəmna Yawe yi hara ərəh nawa, vini nədawgan səvani.

(Tet)

(Tet)

²⁵ Yawe moggoni aza ɗəf dəɗi əɗɗum nan akani, məzukayani.

²⁶ Moggoni əga əkõh na Yawe də ɓatɓatə.

²⁷ Moggoni aza ɗəf dəɓə' sən vavyak təŋ səka gawla nani.

(Yod)

(Yod)

²⁸ Dəsan takərgən ɓatɓat an Daya agəɗ sənək vavyakə.

²⁹ Dəmpa man aka burɗuku kuzuŋ an nawrəh tay abe.

³⁰ Dəpak tapaslayən sən ɗəf məzərgani, dəbə ərah.

(Kaf)

(Kaf)

³¹ Vi Daya azga zəga ka faɗ ɓa.

³² Dənda meme ɗəf zlaŋ na, tay də ulasahã sən moggon nan diyɗaŋka.

³³ Vi na makrani adawtoŋgit ɗiy addəv tatwãh gəm adawzimgit sahã ɓa.

(Lamed)

(Lamed)

³⁴ An tay əndepetin məfərsəneɗ naka dələv pak ammba təl ɗəfa,

³⁵ an tay əttapanən an dəslən sən ɗəf səba Məsəɗəɗə,

³⁶ an tay əraygənən wən na ɗəf aba wətawwən na, Yawe nan awlan ɓa sa?

(Mem)

(Mem)

³⁷ Naway dəpel na zəga nan gəɗe di? Daya dəɗi wən nan ɓa sa?

³⁸ Səma Məsəɗəɗə tatwãh də nenek adawgilyen ɓa sa?

³⁹ Sən mi ɗəf adawɓuh man addəv ənziya nan di? Ɗəf pak dəɓuh man aka mambray nani.

(Nun)

(Nun)

⁴⁰ Məbbalan səm haram aket tiveɗ namə, məɗɗum səm aketi, məmilgin aza Yawe.

⁴¹ Məkkam də makram pak də ətəl vam sulagən sən Maŋgəlva na disiŋ.

⁴² Nam na, məɓoŋko məɓɓəlanək kiymə, ya nok kəvvuyon səm ɓa.

(Samek)

(Samek)

⁴³ Kətoŋguk addəv ədagədəva, kərɓahamka. Kəbaymək məza ulasahã akam ɓa.

⁴⁴ Kətoŋguk ara slaybuna vi əkkam nam adawgapuk ɓa.

⁴⁵ Ka dagərgiya gəm ka bitik kəɗiyəm aweleŋgit ɗiy meɓɓeti.

(Pe)

(Pe)

⁴⁶ Məzuzelɗe nam aha'ənək met bakaka ərma mama azamə.

⁴⁷ Geslne, vovu əza kuɓupu gəm tatwãhĩ akamə.

⁴⁸ Sin agilyoŋguk gekgek arawa vi əza nat waŋ net ɗiy nawa.

(Ayin)

(Ayin)

⁴⁹ Sin araw buwwa məza ərsla ɓa, məza əffet ɓa.

⁵⁰ Hã gap Yawe ɓe' sə disiŋ kawlani.

⁵¹ Haraw tay əssaw aka wən net gorɗeŋge na walaŋgəla-metiŋ nawa.

(Sade)

(Sade)

⁵² Məzuzelwən ɗar dərɓah arɓahwən va bəŋga.

⁵³ Madaraw aloɗwən a vovu, azgaŋ gərmeŋge akawa.

⁵⁴ Iŋkile apaɗamwənka nəmnah nəzəka.

(Kof)

(Kof)

⁵⁵ Səddəv hədək na vov nəya iya noko Yawe.

⁵⁶ Kəprəmək wəlawa, Kamə kəsuk sləmok daprəm ənɗəs naw gəm vaŋvəl naw ɓa.

⁵⁷ Pay nəyuk kəzar azawa yaŋ kənah suwa: Kəgeslne ɓa.

(Resh)

(Resh)

⁵⁸ Wəkõh kəkõhgən zeŋgilewa, Daya, kəbitwəka.

⁵⁹ Kulak va adawzəmgəwən sahã, atawwən nawa.

⁶⁰ Kulak əmpəlkiya net akaw pakə. An aynaŋ akaw pak kulaka.

(Sin)

(Sin)

⁶¹ Ya Yawe kəprəmək wəra net gəm an aynaŋ akaw pakə.

⁶² Əpel net məzuzelwəni gəm sekeseke net tay akaw huruɓu.

⁶³ An ɗewɗewəŋ, an ziwziwiŋ, awle: intə zəga nawya gəlya neti.

(Taw)

(Taw)

⁶⁴ Va zəga an aɗɗaŋgə vas kədawfaɗ siti Yawe.

⁶⁵ Makra ɓəɓəl kədapsiti dəsangən mefɗeke nok aketi.

⁶⁶ Kərɓehgin də ədagədəv noko, kəzetgin səka dəlva Yawe.