Əɓuhma 2 - Bible en Guidar

Ətawwən aka Yerusalem ( 2:1-22 ) Daya tay va məzuzel na Yerusalem (Alef)

(Alef)

¹ Aw haya, mbarmbar Daya aki slaybuwən kirit addəv ədagədəv nan aka Siyon di! Azganək lelew na Israyel sə disiŋ hã afuŋgu, dəɗɗum aka təki nawɗi tələn pay ədagədəv nan ɓa.

(Bet)

(Bet)

² Bəbəh Daya abbəh təki nawtaɗ na Yakob, səɗək asɗək bayman məza ula səsãhən ɓa. Azetik walaŋgəleɗe na korgu na Yuda addəv ədagədəv nani, azlambrakanək afuŋgu. Araygənək dələv dit milyeŋge nani.

(Gimel)

(Gimel)

³ Dəka ədagədəv nani, apuɗoŋguk mohõ Israyel pakə. Amndaganək van dəzəŋ dərɓe səba məzuzele. Yaŋ asɗa zəga va offo nzilim nzilim əzla sulək ki Yakob.

⁴ Anslənək bəle nan va məzuzel adawziw van dəzəŋ ta' aka uhõ. Va masa, abey zəgeɗ məs hara ɗəf adawla lew pak sə gizlirke na Siyon. Akgbo'uk ədagədəv nan va offo.

(He)

(He)

⁵ Daya asanək va məzuzele, asɗəkək Israyel, asɗikik gəleɗe mogget nani, abzliwik walaŋgəleɗe na korgu nani. Əhəm də əray awanək zən a Yuda.

(Waw)

(Waw)

⁶ Va mambara na guli net wəleŋɗe ator zlava nani, abzluwək təki nalma nan də mənamə. Araygənək təki nakkal nani. Yawe aɗɗak ka ɗiy dəzgətaŋgən ki pay na wəzləra gəm pay naffet a Siyon. Addəv ədagədəv nan na, arbəsənək wil sən məlĩ də məsdələv pakə.

⁷ Daya azganək gəlamatuya nani. Azelenək təki salala nani. Appanək gəla moggon nan ava məzuzele. Aɗɗaŋgək gugoyo diyɗa addəv gəla na Yawe hã va pay na wəzləra.

⁸ Yawe aynanək a makran nabzlu zlava səka Siyon. Apparək helege nawslani dəmndagan van dabzluwən ɓa, hã ndən gərakə. Zlava nakəleŋgil də an nappaka pak, abzlaŋgək sapə.

(Tet)

(Tet)

⁹ Maddambeɗe nan pak atoŋgoŋguk afuŋ, areygitik təbzeŋge nawkəɗəslit petepete. Məlĩ nani dit ɗiy gugriɗ nan pak tahəŋ ammba vet ɗiy ɗarə, mahenziŋ tay ɓa, məskəleŋɗe nan dayday awrəhaŋ ula məs dəde səza Yawe ɓa.

(Yod)

(Yod)

¹⁰ Ɗiy məsɓet na Siyon assoŋguk afuŋ gurom, ɓata'ɓata'ə. Aziyaŋgək burɗuk aka kiti. Tahəŋ də lukut na gəbay ezeti. Gorɗeŋge na Yerusalem kiyit təktək afuŋ. Aguloŋguk lukut na gəlabay azeti.

(Kaf)

(Kaf)

¹¹ Haraw pəreŋ sən əhəma, zəga van aɓlawka, makraw tay əziw a gəlan ɓa sən əray məs dərih ɗiy nawəŋka. Vi kirin memeɗeŋɗe dit en namet bide pak tay əmtaŋ a walaŋgəla-metiŋ.

¹² Tay ənah sitin may met na: «Ngay way may mbazla di?» Dəka tay əɓirzliweŋ va ɗiy dərəhaŋ vaŋvi a walaŋgəla-metiŋ, ndəɗaŋ əmtaŋ avet may meti.

¹³ Də Mi nədassak suk di? Mi nədaŋɗa nawsla də is di, walaŋgəla-metiŋ na Yerusalem? Mi nədawsluk dəndən naffeten suk mokrok di, walaŋgəla-metiŋ na Siyon? Vi əray nokuŋ diyɗay va pehe; Naway nawmbəlguk di?

¹⁴ Məskəleŋɗe nok tepelke awlaŋ sukuni gəm wən ɗar loloh lolohu. Dəppasanən heslepe nok kawzaɓan wən nok ɓa. An awlaŋ sukun na, tepelke atawaŋgə, gəm əraka.

(Samek)

(Samek)

¹⁵ Məzutoŋgoŋ tivetive pak ərganən vet akoko. Əɗiyaŋ fofyoko, əɓlanən kiyit aket ɗiy na Yerusalem, ənahaŋ na: «Aŋki walaŋgəla-metiŋ məs adawnəhaŋ lahəŋ na lelewi sawɓa, ənnek na dələv paki nak sa?»

(Pe)

(Pe)

¹⁶ Məzuzelɗe nok pak met hĩyõhĩyõ akoko. Ndəɗaŋ əfyokoŋ Əhar veti. Ənəhaŋ na: «Məsɗəkək səɗəkə, pay an mədawga naki kana. Məgapək azani, mənam tat ulani.»

¹⁷ Yawe aɗɗak an aɗɗum naɗɗa, aknahanək an apel wən nani, məs aynan naɗɗa far lahəŋka: abzluwək zəga pak, məza ulasahã ɓa. Annekenik zə məzuzel nok də əray noko; esɓetik məzuseɓɗe nok akoko.

¹⁸ Mekret ahəmsənək Daya, zlava nat waŋ na Siyon. Appet sin nok dəzlbaŋ va məlpa dəfəɗ də kapay pakə. Kədaffeten zuk ɓa, horok adaŋkəla ɓa.

(Sade)

(Sade)

¹⁹ Asil də dəfəɗ pak akkamə, apar an na mokrok pak aba Yawe va iŋkile. Aslan vok sulagən kəlazani, ammba zeŋgilet kirtuk məzəmtaŋ sən may aka zləzlaŋgray tive pakəŋka.

(Resh)

(Resh)

²⁰ Azi horoko Yawe awla: naway kəzəmgən sahã zev aŋ di? Adahək gil dəmpirningin kirtit məs awaŋ adawsa'aŋgəŋ sa? Adahək əbey məsdəlveŋge dit məskəleŋɗe addəv gəlamatuya nok is Yawe sa?

(Shin)

(Shin)

²¹ Kirin dit mezzeɗ tahəŋ ɓelohɓəloh afuŋ aka tive. Gorɗeŋge dit gewleɗ tahəŋ firikfirik afuŋ məbeyit də masalam. Aka pay ədagədəv nok kəbeye, kətaw wəlet məza ulasahã ɓa.

(Taw)

(Taw)

²² Va aka pay na wəzləra kiye meggegiɗu en nawgeslne' siti. Pay na ədagədəv na Yawe na, ɗəf tay dəkõh ɓa, tay dəmbər daran ɓa. En nəzgə sləma aketi dit en nəzgəl pak məzuzel naw azetik kakãhə.