Əɓuhma 1 - Bible en Guidar

Tatwãh na Yerusalem ( 1:1-22 ) Yerusalem tay va gagəbay məzgata (Alef)

(Alef)

¹ Aw haya, mbar walaŋgəla-metiŋ vaŋ məs ɗiy addəvən hõyõ'hõyõ', asan tuɓollo di! Ndən ula na va gagəbaya. Ndən məs dəsan daya lahəŋ a walaŋgit dilveŋge gəm a walaŋgit kivet dilveŋge, yaŋ akkpaŋ balamə.

(Bet)

(Bet)

² Ndən kim aka əhəma: Sin aran zletzleti. Ɗak tat nawɓətgən səret gəreŋgiɗin ɓa. Beyneŋgiɗin pak appanənka, kpaŋgaŋ məzuzelɗe nani.

(Gimel)

(Gimel)

³ Duɓ əduɓ kiyən addəv ərba wili, məkani Yuda aka wəza na balamə. Aweleŋgit dilveŋge asani, ya awrəh təki naffet ɓa. Məzuzelɗe nan pak arufunək addəv əɓuhmani.

(Dalet)

(Dalet)

⁴ Əhəmi yi aket tiveɗ na Siyon, ɗiy tahəŋ dədazzoŋ a təki əŋɗa va ɓa. Metiveɗ nan pak arayaŋka, məsdəlveŋge nan tahəŋ ənɗəsaŋgə. Zit gorɗeŋge nan tay baybayə; wən na dərwa dəɗar akani.

(He)

(He)

⁵ Meseŋgiɗin askanən wəlani, məzuzelɗe nan tahəŋ zit neki. Vi Yawe tay əzəmgən sahã, sən kiɓəɓəl nan dayəŋka. Masan almetik kirtin mezeŋgleket aban ake aka balamə.

(Waw)

(Waw)

⁶ Gagdak net ɗiy na Siyon azəka. Kirtit milyeŋge net yeŋ va muneŋge. Awrahaŋ təki nawtaɗ ɓa: Tahəŋ əmbataŋ tiɓiɓ-tiɓiɓ aba məzərɓeheti.

(Zayin)

(Zayin)

⁷ Yerusalem aka asan slorslor addəv əzəmsãha nani, tay əɗɗumet zəgeɗ nan na sləma en dəssoŋ aka pay an lahəŋ pakə. Aka ɗiy nan abətaŋ ammba va məzuzel nan, məza ɗəf əbbah sən ɓaŋka. Məzuzelɗe nan awlanənka amasaŋgək aka əhhi nani.

(Het)

(Het)

⁸ Yerusalem agəɗək mambray gədakə vini arnoku. Məzugagdakanən lahəŋ pak tay əzelenəni vi awlanən gabban mekeleŋ. An dəpəl sən na əhəmi gəm əktoh gəɓan əmbata.

(Tet)

(Tet)

⁹ Ərnok tay aza gabba lukut nani aɗɗumon an nazzan abe ɓa. Əzbər nan agəɗək va na sekene, məzəbbah sən tay ɓa. Yawe awla əzəmsahã nawa; awla va məzuzel naw adawɓaya.

(Yod)

(Yod)

¹⁰ Məzuzel nan atələk van aket zəgeɗ nan en na sləma pakə. Gesiŋ, awlek ɗiy-ɗar ətoŋgoŋ addəv gəlamatuya, məs kəɗi sit wən nan na adaddoŋ addəv əkkal na mahenziŋ nok ɓa naka.

(Kaf)

(Kaf)

¹¹ Ɗiy nan pak tay ənɗəsaŋgə, tay əkayaŋ zəga nawzəma. Aziyinik zəgeɗ net en na sləma pak ka zəga nawzəma, vi zilmeyit dəmbəlgəni. Yawe, azi horok awla va nəkkpaŋ zəga narba wili.

(Lamed)

(Lamed)

¹² Mənokum mətoŋgoŋ tivetive pakəŋ na, zev aŋ agəɗək ɗah azokum sa? Məzi horokum, mula: an əzəmsahã tay va nawəŋka, va an Yawe aki akaw pay adə gədəvə nanəŋka.

(Mem)

(Mem)

¹³ Sə disiŋ aslən offo addəvit sleŋsleŋɗe nawã. Enslinik bizwil abawa azlbuwək mədiŋgbile. Mbagu təki akaw seŋseŋgi, pay pak gbəgba'a.

(Nun)

(Nun)

¹⁴ Tay haran ɗəhərra ammba mambray nawã, aslakataŋgək addəv vani, apeŋgeŋgik awlawa. Daya Addakawəka, appawək avet ɗiy məs nəɓap na əziw abet ɓa.

(Samek)

(Samek)

¹⁵ Daya arɓehetik gambereɗ nalpa sə nawda pakə. Abu'uk ɗiy akawa, vi kaŋkin gewleɗ nawa. Yawe Ambrosltək waŋ goruk ŋgbuɓɓo na Yuda, a mozgoy nawɗot megezlembirke.

(Ayin)

(Ayin)

¹⁶ Aka wən net zəgeɗiski nədawhəma. Sin araw gekgeki. Vi ɗəf nawɓətguwa gəm nawmbəlgu faraɗay səzawa. Kirtu azaŋka, vi məzuzel naw adayək kiwa.

(Pe)

(Pe)

¹⁷ Siyon van təlla samə, ɗəf tay nawɓətgən ɓa. Yawe aslənək əttapan Yakob. Məzuzel nan tahəŋ kiyən suləkə. Yerusalem akkpaŋgək dagərgiya aweleŋti.

(Sade)

(Sade)

¹⁸ Yawe yi aka təstəsə, vi nəggbakək man aka an aɗi naɗɗa. Ɗiy pakə, kamə məprəma, mula əzəmsahã nawã. Gorɗeŋge naw dit gewleɗ naw addoŋguk aka balam.

(Kof)

(Kof)

¹⁹ Niyek ɗiy en dəŋgəlwəni, ya ambəɗawənka. Məsdəlveŋge dit ɗiy məsɓet naw amtaŋgək a walaŋgəla-metiŋ, aka adawkayaŋ zəga nawzəm net dəmbəlaŋgəni.

(Resh)

(Resh)

²⁰ Awla, Yawe, va nəsaw addəv əzəmsahã, makraw tay hoɗhoɗ aka wən nani. Makraw arayka! Vi nəkgbakək ma! Sə kəlappaka, masalam azetik kirni. Eŋgili, va ana əmtada.

(Shin)

(Shin)

²¹ Aprəm wənək əŋɗəsa: Ɗəf tay nawɓətgu ɓa. Məzuzelɗe naw pak aprəmənək əzəmsahã nawa. Annekeninək ziti vi istə kəɗɗa. Kəgapgənək pay məs kəɗi ka dəssoŋgən va ina.

(Taw)

(Taw)

²² Mambray net pak dəde aboko, agəɗ dənɗaŋ va kəgəɗ də in aka əɓoŋ naw temtemi. Vi ənɗəs naw adayka, makraw tay əssawa.