2Timote 4 - Bible en Guidar

¹ In tat əkkomok aba Maŋgəlva də aba Kristu Yesu məs dədatawwən aket ɗiy mederet dit mimtiti gəm də iya na ərba nani gəm əzəm məlĩ nani.

² Arban wən na Maŋgəlva pay pakə, wasan sit lewi də asan sit na lew ɓa pakə. Arban sit mbərayən neti, aheyẽti, asəɓsiti, də əɓəs addəv əyaka.

³ Vi pay wade məs aɓapən na ətaf əyak an salala ɓa, sləmet wahhereti. Ya wakkeletin mərbaŋzəga va aza əŋgla na gəɓa ziti.

⁴ Wakkpaŋganən sləmet səka gegesiŋ, kakkpaŋgaŋ azet mambeɗi.

⁵ Ya nok na asok də maɗɗula aza zəga pakə. Aɓəs əzəm sahã, aɗɗa wəza narban Alabara Neneke, aɗɗa wəza nok lewlewi.

Əssa na Pol ( 4:6-18 )

⁶ Naw na, vi mbel naw aggbo'oŋguk səkayə, pay nadda naw agapka.

⁷ Nəgayək əgay moggoni, nəgrakək ənza nawa, nərmak ətafa.

⁸ Kakaŋ na mətərkiya na təstəs tay zaɓɓa viwa, məs Daya mətawwən an təstəs adapsu pay nani, suwi kaka ɓa, sit ɗiy en məs dəŋglunən əzza nan pakə'e yi.

Va Pol asani

⁹ Asok zuk əzza ərəhu go'u.

¹⁰ Demas appawəka, vi aŋgluwək ənziya an kakaŋka, ambatək a Tesaloniki, Kreskes tamə ambatək a Galat, Titus ambatək a Dalmatiya.

¹¹ Luka iyi də in takərgəni. Agəm Markus Kəzzoŋgən matakə, vi watər su wəray diyɗa də wəza.

¹² Nəslənək Tikikus a Efesus.

¹³ An kazok na, kəki suwəgən lukut məsilip naw na səmyã, məs nəpəl a Torowas ana Karpus da gəm ɗerewelɗe, daysa na en na gəba.

¹⁴ Mənzla Alekzaŋdər agəɗ suwək zəga mbərayən sawɓa, Daya wamndan sən va aza wəza nani.

¹⁵ Nok pak aga zuk səzani, vi agay əraygən əpel namə.

¹⁶ Pay maddaabəŋ nəhãy ammba zu na, ɗəf tay dəbbah su ɓa. Ɗiy pak appawənka, də vas zlaŋ na, adawsan sit ka mbərayən ɓa.

¹⁷ Ya Daya tay də iyna, avayək gbogboŋgo, vi nəpelgən wən nan gərakə, ɗiy-ɗar dəprəməngən baymeti. Ndəni dəkõhgu səma ɓoolu.

¹⁸ Daya wakõhgu səza wəza mbərayən pakə, wakõhgu vi kawku addəv məlĩ nan a disiŋ. Gagdak nani va sayit ɗiy amə pakə. Amin.

Əgrakən ( 4:19-22 ) Əsɗa an bayma faɗə

¹⁹ Asɗat Piriskilla də Akilas gəm gəla na Onesiforus.

²⁰ Erastus tay a Korintus. Nəppanək Torofimus a Miletus gbəgba'a.

²¹ Asok zuk əzzok tak təlapaya. Ewbulus də Pudes gəm Linus gəm Klodiya dit milmiŋgiɗəm pak asɗokənko.

²² Daya dəsan də əmpəs noko, mbəlembəle na Maŋgəlva dəsan də munokum.