2Timote 3 - Bible en Guidar

Əvoŋɗe naba əgraka

¹ Asən wənəŋka, addivit əvoŋɗe naba əgrak na, pay temtem net tatwãhɗe waɗɗaŋgə.

² Vi ɗiy wassoŋ məŋgluwən ziti, məŋglaŋ deleɗi, mulanən ziti, məgagdakanən ziti. Warahnən Maŋgəlva, aɓe'eŋ siti na migilit ɓa, awfeteŋ ɓa. Agagdakanən na zəga an salala ɓa.

³ Əŋgla tay azet ɓa, awlaŋ sahã ɓa, muɗeketin ɗiyi, armanən zit ɓa, məsdarawɗe, məzelin zəga moggoni.

⁴ Məzəmaŋ kiyit ɗiyi, mədaŋgədəva, məɓaygənən kiyti, məŋglaŋ əŋgla na gəɓa zit dayki Maŋgəlva.

⁵ Ulet na va məgeslne sənən Maŋgəlva, ya tahəŋ əzelenən gagdak nani. Azar səzet ɗiy en veski.

⁶ Vi səretiski, tahəŋ meɓɓet dədawtoŋgoŋ addivit gəleɗe kadawmbəɗet gil middekti, məs mambray aketi, məs məsərəkgit də əsim an temtemi.

⁷ Pay pak gil vet tahəŋ əkayaŋgə, ya aɓap na əgapaŋ aza əsən gegesiŋ kpak ɓa.

⁸ Va mãy Yannes də Yamberes aziwweŋ sənən Moyis. Vaski yi'e ɗiyis adawziwweŋ sənən gegesiŋ. Ɗiy məs maɗɗulet dərayəŋ, əsən net aka ətaf dəziw ɓa.

⁹ Ya arəhaŋ na əmbataŋ abe ɓa, vi dərwa net warbə ta' abet ɗiy pakə, va net ɗiy sula nek arbə.

An temtem məɗi wən nan bayma faɗə

¹⁰ Ya nok na, kəgəmək təlu addəv əyaka, ədawa, əɗɗumo, ətafa, əɓəsa, əŋgla, əsok zə ɗəfa,

¹¹ əsərma, əzəmsahã, məs dəteheŋ akaw a Antiyos, a Ikoniya, a Listira, əsərma muwani məsərni maw ɓa di! Ya də as pak Daya kõhguwəka.

¹² Lah na, ɗiy en dəŋgla ənziya də əgeslne sən Maŋgəlva addəv Kristu Yesu pak na, kawsərni meti.

¹³ Ya ɗiy mbəreyti gəm muwaŋ wəna, wambataŋ ɓetteŋɗeŋ abe abe, wazetin ɗiyi, wazanən kiyti.

¹⁴ Ya nok na aziw ɓəlɓəl aka zəga məs kəyakə gəm an kətaf gesiŋgesiŋ, dawsənən na, səza naw kəyagan di.

¹⁵ Təŋ səka muzliya nok ləŋgə, kəsinik Əverɗe en Salala en nakkpaŋgok məsmaɗɗula nawkuk aka əkõh də ətafa məs dəsan addəv Kristu Yesu.

¹⁶ Əver pak də Əmpəs na Maŋgəlva yi, tay də ətər addəv əyaka, addəv ərban an məzlzlaɓ akani, addəv əziwgin an dərayə, addəv əɓay an naddəv təstəsə.

¹⁷ Vi ɗəf na Maŋgəlva dəsangən hərrək lewlew məsla zən vi wəza moggon pakə.