2Timote 2 - Bible en Guidar

Məzəlpa na Yesu Kristu an gesiŋ

¹ Anoko wətuwa, asok ɓəlɓəl addəv mbəlembəle məs dəsan addəv Kristu Yesu.

² An kəprəm sə maw keret miziweɗe diyɗaŋka. Appan avet ɗiy en gesiŋ məs nawɓap əyagan sitin ɗiy meɓɓet tamə.

³ Aɓəs hara əzəm sahã noko, va məzəlpa na Yesu Kristu an gesiŋ.

⁴ Ɗəf tay məzəɗɗa wəza na məzəlpa nawgəgrəŋgan kiyən dit zəgeɗ nanziya egge ɓa, vi kanneken zə daya nan məs dətoŋgən aka wəza.

⁵ Vaska'e ɗəf məzəzlba kawrəh zəga. Arah na zəga na van an dəzban mahenziŋ nan məɗiyən ɓa ɓa.

⁶ Məzənse tay əzəmsahã diyɗa. Adahək dəzəmgən zəga an dəsəɓ sə guli nan daabəŋ.

⁷ Aɗɗumon an məs nənah suko, Daya wapsuk əsən naprəm gabba zəga pakə.

⁸ Aɗɗumon wən na Yesu Kristu dəsil səret ɗiy mimtiti, səza mahəlfa na Davit iyi, va aza Alabara Nenek məs nədarba,

⁹ məs nədawzəm sahã aka wən nan hã minaw dit ngiyamɗe va ɗəf mbərayni, ya əpel na Maŋgəlva minani dit ngiyamɗe ɓa.

¹⁰ Sən aski nədawɓəs zəga pak viyit ɗiy məwelti, vi net pak dərəhaŋgən əkõh məs dəsan addəv Kristu Yesu də gagdak an faɗə.

¹¹ Əpeləŋ aslək nawtafa: An məmtək dəndəni waməsam madaram dəndəni;

¹² an məsokuk zəmə, waməzəm məlĩ dəndəni; an məzelenike, nan pak wazelemə;

¹³ an təstəs mənan ɓa, nan wasan təstəsə. Vi aɓap na kawzelen ki zən ɓa.

Əsəɓa gəm əssaka ( 2:14—4:5 ) Məgəɗ wəza an gərakə

¹⁴ Aɗɗumon wənəska, asəɓ sit ɗiy na pay aba Maŋgəlva na, adaŋzlaŋ ma aka əpel ɓa, tay an adawtər abbər əreygit məzəprəmini.

¹⁵ Asok zuk ərban zuk aba Maŋgəlva va ɗəf an gərak məgəɗ wəza məs wil adanən ɓa, mətaw tive sarara sən əpel na gegesiŋ.

¹⁶ Azar səza əpel məraygən wən na Maŋgəlva, vi məɗɗaŋ vaska waddoŋ abe abe də əzelen Maŋgəlva.

¹⁷ Əpel net agilik va geŋgir məzuzəm təkiya. Himeneyus də Filetus tahəŋ areti.

¹⁸ Net dəwəl sən gegesiŋ na, agəmənək tive mbərayən dawnəh na əsilye səka əmta agəɗək səkayə, tahəŋ əraygən ətaf net ɗiy meɓɓeti.

¹⁹ Də as pak gabban məs Maŋgəlva aɗi tay ziw ɓəlɓələ, məver əpeləŋ akani: Daya asinik ɗiy nani. Gəm əmpa na: Məzuya iya na Daya pak dəzar səza mambraya.

²⁰ Addəv gəla metiŋgin na, zəgeɗ məɗɗet də meleŋge gəm də təbəz babarəŋ kaka ɓa, tahəŋ məs məɗɗet na wəlaŋga gəm na dəlva'e, meɓɓeti na sləmaŋ, meɓɓet tamə na sləmaŋ ɓa.

²¹ An ɗəf abburuk zən səzet zəgeɗiski, wasan ka zəga na sləma, wasan mubburun gəm nawtər wəray sən Afəni, ta' ammba wəza moggon pakə.

²² Anzok səza zəga nawsim na mbəl gawla; dərəŋ na, akayan təstəsə, ətafa, əŋgla gəm zazay dit ɗiy məzuyanən iya na Daya də makret barə.

²³ Kədawnger də əpel na əndəɓ gəm na dərwa ɓa, kəsənək na əgay adawanəni.

²⁴ Ya dədah ɗəf məgəɗ wəza na Daya dəgaygən ɓa. Dəsan ɗəf məŋgluwən azet ɗiy pakə, məɓap ərban zəga sit ɗiyi, məɓəs wəna.

²⁵ Adahək dərbangən zəga sit ɗiy məzupeleŋ akan mbərayən də maɗɗula. Kuzuŋ Maŋgəlva wabbah sit nawɗi marava gəm nawsən gegesiŋ gərakə,

²⁶ maɗɗulet dədegini, dəgilyoŋgən səddəv mazzaɗ na Diyabəl məs dərme ka dəɗɗanəngən əŋgla nani.