2Timote 1 - Bible en Guidar

Ətoŋ Addəvən ( 1:1-2 ) Əsɗa

¹ Pol maslən na Kristu Yesu də əŋgla na Maŋgəlva va aza iynama na zeŋgile məs dəsan addəv Kristu Yesu.

² Sən Timote wətu na makrawa. Mbəlembəle də ulasahã, də zazay na Maŋgəlva Afən Daya nam Yesu Kristu dəsan akoko.

Əkkama gəm əsəɓa ( 1:3—2:13 ) Soko gəm əsəɓ naɗɗa moggoni

³ In tat əɗɗa soko sən Maŋgəlva məs nədawɗi kiyən va net dəhiŋgiɗu də makraw barə, an in tat ətoŋguk addəv əkkam naw dəfəɗ də kapay pak məza əbew ɓa.

⁴ An in tat əɗɗumet sin noko, maw əzzan sirsir aka uluko, vi nəknahgən də ənneke.

⁵ In tat əɗɗumon ətaf nok məs tay də matakataka ɓa, məs atuk Loyis dət mok Unike arəhaŋ daabəŋ. Nəsənək gesiŋ na nok pak tay azoko.

⁶ Ndəni kan nədaɗɗum suko, azi zuk aza əvəl məs Maŋgəlva apsuko, məs kərah pay nəɗi vaw akoko.

⁷ Vi Əmpəs na geslne Maŋgəlva apsəmək ɓa, Əmpəs na əɓapa na əŋgla gəm na ətak zə ɗəfi.

⁸ Wil adawdukun dawpel wən na Daya nam ɓa, awaniɓa dawpel akaw in məfərsəna vinəŋ ɓa. Ya dərəŋ na azəm sahã də in aka batam Alabara Neneke də əppan zuk aka əɓap na Maŋgəlva.

⁹ Ndən məs dəkõhgəmə, dəyəm də iya salala məza aza wəza nam ɓa, ya aza an aynə gəm mbəlembəle nani. Mbəlembəle məs məpsəm addəv Kristu Yesu far na sete,

¹⁰ arbək kakaŋ də əzza na məzukõhgəm Kristu Yesu. Ndəni dəzan əmta, dəwiɗgən zeŋgile gəm əssa faɗ də Alabara Nenek,

¹¹ məs məɗiyu mətəlma, maslən gəm mərbəzəga metiŋ aka wən na.

¹² Vini nədawzəm sahãŋka. Ya wil aduwən na viyən ɓa, vi nəsənək ɗəf an nəɗi ətaf naw akani, nəsənək gesiŋ na tay də əɓap nawga zəga an məvay hã gap pay nawtaw wəna.

¹³ Zəga narban suk tive, ndəni əpel salala məs kəprəm səmaw addəv ətafa gəm əŋgla addəv Kristu Yesu.

¹⁴ Arma zəga moggon məs məppan sukəŋ də əbbah na Zeŋgile Salala məs dəsan a makramə.

¹⁵ Kəsənka, ɗiy na Asiya pak appawənka, səret na mãy Figelus də Hermogenes.

¹⁶ Kəta Daya dəɗɗa moggon nan aka gəla na Onesiforus, vi asɓawən təl ɓaɓayə. Wil dədanən vi nəsaw aket ngiyamɗe ɓa.

¹⁷ Adan agap a Rom na, akayawək zən soksoku, hã ndən gas ərəhwa.

¹⁸ Kəta Daya dəɗɗa dərahgən ulasahã na Daya akan pay nani. A Efesus agəɗ suwək wəza moggoni, nok kəsənək lewlewi.