2Tesaloniki 3 - Bible en Guidar

Əzga' sit məkristuɗe aka wən na ədawa ( 3:1-15 ) Məkkam vimə

¹ An dəmbər na, milmiŋgiɗwa, məkkam vimə, vi əpel na Daya dətraygən go'u, ɗiy dəgagdakanəngən va agəɗ anokumda'e.

² Gəm vi məkõhgən səvet məsdarawɗe gəm ɗiy mbəreyti. Vi pakəŋ məs də ətaf ɓa.

³ Ya Daya moggoni. Wasɓokum gəm wagukum faraɗa səza Məsdaraw.

⁴ Məsənkumuk lewlew addəv Daya, vi zəgeɗ məs məver sukum aketi, anet kədaɗɗaŋgə gəm wakəɗɗenini.

⁵ Daya dəɗi makrokum aka əŋgla na Maŋgəlva gəm aka əɓəs na Kristu.

Ətər wəray naɗɗa wəza

⁶ Milmiŋgiɗwa mənam tat əɗi sukum wən nan də iya na Daya nam Yesu Kristu, kədawsapaŋ dit milmiŋgiɗkum mətampəlɗe ɓa, məs azbanən wən məs arahaŋ səzaməŋ ɓaŋ ɓa.

⁷ Nokum vanə, kəsənənək va kədawgəmən təlmə, vi məsam va mətampəlɗe anokumda ɓa.

⁸ Məzəm ɗah way na ɗəf na mekeleŋ ɓa. Dəfəɗ də kapay pak məgəɗək wəza də tatwãh gəm iya vi mədawsam gəres aka ɗəf səmbokum ɓa.

⁹ Mənam tat də gagdak naɗɗan vas ɓayi ɓa ɓa, ya məsam vas na vi məsamgən zəga narba abokum, kəgəməngən təlmə.

¹⁰ Vi aka məsam anokumda na, aŋki məs məɗi sukum wən nani: An ɗəf awŋgəm əɗɗa wəza ɓa, adawzəm ɓa'e.

¹¹ Vi məprəmək na ɗiy meɓɓet tahəŋ sə walaŋkum mətampəlɗe. Aɗɗaŋ wəza ɓa, ya tahəŋ ətoŋ addəv wən məza wən neti ɓa.

¹² Sən zeŋvit ɗiy neti, mənam tat əɗi sit wən nani gəm əsəɓ sit də iya na Daya Yesu Kristu, dəɗɗaŋ wəza də maɗɗula vi dərahaŋgən way nawzəm net na kiyti.

¹³ Ya nokum na milmiŋgiɗwa, kədawyaŋ dəɗɗa moggon ɓa.

¹⁴ An ɗəf dəɓe' sən əpel nam naddəv letərəŋ ɓa, məsəŋlani, kədawsapaŋ dəndən ɓa, vi wil dədanəngəni.

¹⁵ Kədawlanən va məzuzel nokum ɓa, ya məsəɓ sən va məlmukum.

Əgrakən ( 3:16-18 ) Əzaɓa gəm əsɗa

¹⁶ Daya Afən zazay zək nan dəpsukum zazay pay pakə, də tive temtem pakə. Daya dəsan də munokum pakə.

¹⁷ Əsɗa na, də vaw in Pol iyi ndəni gəlavaw aket letərɗe naw pakə, vas nədawverin.

¹⁸ Mbəlembəle na Daya nam Yesu Kristu dəsan dəndukum pakə.