2Samiyel 9 - Bible en Guidar

Davit tay ətaf Mefiboset ananda

¹ Yaŋ Davit amna: «Kaŋ ɗəf neŋgil nana Sawlu da tay dəpəl madaran əmpa sa? Kəta nəgəɗ səngən moggon ammba Yonatan.»

² Gawla neŋgil ana Sawlu da tay adawyaŋ na, Siba; yaŋ məyan sən Davit, məlĩ aɓsən na: «Istə Siba sa?» Amna: «Intə, gawla noko.»

³ Məlĩ amna: «Hara ɗəf tay taka dəpəl neŋgil ana Sawlu da, nəgəɗ səngən moggon na Maŋgəlva ɓa sa?» Siba aɓsən məlĩ na: «Wətən Yonatan tayi; tələn sulagən pak məɗəmən.»

⁴ Məlĩ aɓsən na: «Aŋga yi di?» Siba anah sən məlĩ na: «Tay eŋgil ana Makir wətən Ammiyel da, a Lodebar.»

⁵ Məlĩ Davit aslənək ɗəf əkayan səna Makir wətən Ammiyel da a Lodebar.

⁶ Yaŋ Mefiboset dəhən Sawlu, wətən Yonatan, agap aza Davit, ndən kiyən tək afuŋ uppu'õ. Davit amna: «Mefiboset!» Yaŋ azlan na: «Gawla nok yaŋka.»

⁷ Davit aɓsən na: «Kəgeslne' ɓa, maw aka wəgəɗ suk moggon ammba wən na afuk Yonatan. Wanəmndeget suk gulyeŋge na dəhuk Sawlu pakə, is sən kiyuk anawda kədawzəm ɗayɗayə.»

⁸ Appu'ko, amna: «Gawla nok magap hara kəwəlgən aza kəra məmtən va iynəŋ di?»

⁹ Məlĩ ayak Siba, gawla na Sawlu, aɓsən na: «Zəgeɗ na Sawlu lahəŋ dit en neŋgil ananda pak nəpsinik wətən daya noko.

¹⁰ Kinsi səngəni, isi, kirtuko gəm məɗɗaŋ wəza noko, kəkiygən ka dəsangən ka zəga nawzəm na wətən daya noko, dəzəmgəni. Mefiboset wətən daya nok dəzəmgən də in pay pakə.» Kirtin Siba mezeŋgleket tahəŋ kəlaw kiyit sle'i, məɗɗaŋ wəza nan kaklaw sula.

¹¹ Siba aɓsən məlĩ na: «Anəɗɗa va daya naw məlĩ aɗi wən nan sən balam nan pakə. Lahəŋ van na Mefiboset anawda adawzəm va wətən məlyã.»

¹² Mefiboset tay də wətən muzliya taka, iya nan na Mika. Ɗiy neŋgil ana Siba da pak məɗɗaŋ wəza na Mefiboset əŋgə.

¹³ A Yerusalem Mefiboset asan də gəla, vi ana məlĩ da adawzəm pay pakə, tələn sulagən pak aɗəmaŋka.