2Samiyel 8 - Bible en Guidar

Əska wəla na Davit aket meggeŋgiɗni

¹ Dərɓaga asna, Davit askak wəlet mə Filistiɗe, avoŋgənək kiyit abani, amõhunək wawar səmmba vet mə Filistiɗe.

² Arbə sitik mə Mo'abɗe. Avoŋgitik sliriɓ afuŋ, awɗeketik gbimgbim də helege nawsla zəga, səddəv hoku pak na, ndən bay sula mbək taka madarani. Mə Mo'abɗe akkpaŋgaŋgək ka belemɗe nawfaɗaŋ nzalaka sən Davit.

³ Davit adəmsənək Hadadezer, wətən Rehob məlĩ na Soba, pay Hadadezer adawgay kamnda əmõh ki məlpa na Efratə.

⁴ Davit amõhuk məpeŋgeŋ pilseŋge gabal də səkat buhul gəm ɗiy səret məzəlpaŋ də tilit gabal kaklaw sula ka məfərsəneɗ səvani; Davit atawək zlozloŋgboŋgit pilseŋge pakə, mawteɗ nawgay appaŋ sənənək səkat hara.

⁵ Mə Aramɗe azzoŋguk sə Damas kabbah sənən Hadadezer məlĩ na Soba, Davit abayək ɗiy səret mə Aramɗe zel gabal kaklaw sula kiyən sula.

⁶ Davit aɗiyək prefeɗe aket mə Aram na Damas. Mə Aramɗe akkpaŋgaŋgək belemɗe na Davit, əkiyaŋ sənən nzalaka. Yawe apsənək əska wəla sən Davit a təki al pakə.

⁷ Davit amõhĩk gulomɗe na meleŋge net məzəlpaŋ na Hadadezer, akiyik a Yerusalem.

⁸ Məlĩ Davit andek təbzeŋge pepreŋɗe diyɗa səddəv Betah gəm Berotay walaŋgəleɗe na Hadadezer.

⁹ Toy, məlĩ na Hamat, aprəm na, Davit arbə sitik məzəlpaŋ na Hadadezer.

¹⁰ Toy aslənək Yoram wətən dit zəgeɗ na təbəz net deleɗi, zəgeɗ na meleŋge gəm na təbəz pepreŋ ammba van aza məlĩ Davit kasɗani gəm kawfet akan vi agay də Hadadezer adəmsəni, vi Hadadezer van məzuseɓ na Toy yi.

¹¹ Məlĩ Davit apsinik Yawe, va apsən təbəz net deleɗ də an na meleŋge aki sə kəlazet ɗiy-ɗar məskawəlet pakə,

¹² sə Aram, sə Mo'ab, sə net mə Ammonɗe da, sə net mə Filistiɗe da, sə net mə Amalekɗe da dit zəgeɗ məmõhĩt səva Hadadezer wətən Rehob, məlĩ na Soba.

¹³ Sləma Davit agilik səza amil səka əska wəlet mə Aramɗe, a walaŋ na bətuwa. Ɗiy gabal kəlaw kiyit dodopoɗo abayə.

¹⁴ Yaŋ aɗi deyeɗe na bərzləŋna-kivadələv a Edom; addəv Edom pakgəni aɗi deyeɗe nabərzləŋna-kivadələva, mə Edomɗe baymet akkpaŋgaŋgək məɗɗaŋ wəza na Davit. A təki Davit ambat pak Yawe tay əpsən əska wəla.

Iya net məɗɗaŋ wəza na Davit

¹⁵ Davit azəmək məlĩ aka Israyel baymani, Davit tay əɗɗa zəga də tiven gəm təstəs sit ɗiy nan pakə.

¹⁶ Yo'ab, wətət Seruya yi, daya net məzəlpaŋgə; Yosafat wətən Ahilud, ndəni mərəm wən na məlyã;

¹⁷ Sadok wətən Ahitub, Ahimelek, wətən Abiyatar, məsdəlveŋge, Seraya tam məzuvere;

¹⁸ Benaya, wətən Yoyada, ndəni aket mə Keretɗe dit mə Peletɗe; kirtin Davit tam məsdəlveŋge.