2Samiyel 7 - Bible en Guidar

An Maŋgəlva aɗɗum nawgəɗ sən Davit gəm mazlalwãni

¹ Adan məlĩ asan eŋgil ananda gəm səza Yawe aɓsən əffet səzet məzuzelɗe nan dəssoŋ kiyən karkarə,

² Məlĩ anah sən məskəleŋ Natan na: «Kamə, awle in addəv gəla net muguguleɗ, akoti na Maŋgəlva dərəŋ na, a gizlirke na gabaga.»

³ Natan azlan sən məlĩ na: «An kəɗɗum a mokrok naɗɗa pak dok aɗɗa, Yawe tay də isi.»

⁴ Yaŋ dəfəɗ nan dəpaska, əpel na Yawe ade sən Natan, dawnəh na:

⁵ «Doko, kənah səngən Davit gawla nawa: Yaŋ an Yawe anahə: “Istə narkə su gəla nawsaw addəvən sa”?

⁶ Vi nəsaw ɗah addəv gəla səza nəgilgit mə Israyelɗe sə Eziptə hã gap pay dəpaŋ ɓa. In tat əbbala təki nassa naw na gizlirke yi.

⁷ A təki nədaw a weleŋgit mə Israyelɗe pak na, wən tay nəpel sən taka na mahəlfa na Israyel ɗah məs nəɗi sən wən nan dəteɗgin ɗiy naw mə Israyelɗe dawnəh na: “Vimi kərkaŋ suwən gəla net muguguleɗ ɓa di sa?”

⁸ Ya kakaŋ na, vaŋ kədanah sən gawla naw Davit: An Yawe Məzuɓappak na disiŋ anah yaŋka, səma wətaɗ nəgəmuko, səmet gilewi, ka kəsokgən aket ɗiy naw na Israyel.

⁹ Nəsawək də is a təki kəmbat pakə: nəzetik məzuzelɗe nok səbok pakə, wanəgilgin sləmok va ɗiy gugriɗ en naka dəlvafuŋ.

¹⁰ Wanəɗi təki sit ɗiy naw mə Israyelɗe, wanəɗiya, wasan a gəlani. Ageslne' na əmpa ɓa. Ɗiy mbəreyit azbanən na əsər man va lahəŋ ɓa.

¹¹ Gala pay nəɗi mətawaŋwən aket ɗiy naw mə Israyelɗe, nəpsukuk əffet səvet məzuzelɗe nok pakə. Yawe anah sukuk na, Yawe wagəɗ suk gəla.

¹² An pay nok aknahka, wakəzbet efiŋgiɗko, wanəsilgin uwa nok dərɓogok an nawgilyen səddəvko, wanəsɓan məlĩ nani.

¹³ Ndəni narkə su Gəla aka iya nawa, naw wanəsɓan mazaŋga na məlĩ nan ka faɗə.

¹⁴ Wanəsaw ka afəni, wasan ka wətuwa. An araygənka, wanəzga' sən də vet ɗiy, də zleŋge na vet ɗiy nədargani.

¹⁵ Nəzargən na moggon naw səkan va nəzargən moggon naw səka Sawlu məs nərɓah səbokəŋɓa.

¹⁶ Gəla nok də məlĩ nok wassoŋ ndərəsl hã faɗə, mazaŋga na məlĩ nok wasan ɓəlɓəl hã faɗə.»

¹⁷ Va əpel də hənhənəski pak Natan apel sən Davit.

Wəkkam na Davit

¹⁸ Məlĩ Davit pay ɗew aba Yawe, yaŋ amna: «Intə nawa di Yawe Maŋgəlva, gəla naw mi agap hara kəgapgu gbaŋkəŋ di?

¹⁹ As pak gəsi ama horoko Yawe Maŋgəlva: Far lahəŋka, kəpelik wən na gəla na balam noko'e. As dəslə aza ədaw na ɗəfa, Yawe Maŋgəlva.

²⁰ Mi Davit adawɓap əpel suk aka as əmpa di? Nok kəsənək balam noko, Yawe Maŋgəlva.

²¹ Aka əpel noko, va mokrok aŋgəl kəɗɗa zəga metiŋginəŋ pakə, karban sən balam noko.

²² Vini kəsok matuŋguko, Yawe Maŋgəlva! Vi ɗəf tay va is ɓa. Maŋgəlva maɓɓan tay abburuk va məprəm də sləmam pakəŋ ɓa.

²³ May nawaŋ va mə Israyelɗe ɗiy nok di? Ɗiy meɓɓet tahəŋ aka dələv va ɗiy məs kəbit səvet mə Eziptiɗe də səvet meŋgilveɗ net ka ɗiy nok də əgagdakan iya neti gəm də əɗɗe zəgeɗ gugriɗ viti may zəgeɗ naggət aket vi dələv nokəŋ sa?

²⁴ Kəɗiyik mə Israyelɗe ɗiy nok ka ɗiy nok hã faɗə, Yawe, kəsokuk Maŋgəlva neti.

²⁵ Kakaŋ na, Yawe Maŋgəlva, əpel kəpel aka balam nok də gəla nanəŋ na, arma ka faɗə, aɗɗa va kəɗɗum naɗɗa.

²⁶ Kəta iya nok də gagdakgən hã faɗ ka ɗiy dənahaŋgən na: “Yawe Məzuɓappak na disiŋgi, Maŋgəlva na Israyel.” Gəla na balam nok Davit wasan ɓəlɓəl aboko.

²⁷ Vi is Yawe Məzuɓappak na disiŋ, Maŋgəlva na Israyel tə kənah sən gawla nok a sləman na: “Wanərkə suk gəla.” Ndəni gawla nok asan əkkam abokəŋka.

²⁸ Kakaŋ na, Yawe Maŋgəlva, istə Maŋgəlva, əpel nok gesiŋgi, kəpelik wən moggon sən balam noko!

²⁹ Yaŋ kakaŋ na, kətaf əɗɗa əzaɓ aka gəla na gawla nok dəsangən hã faɗ aboko, vi Yawe Maŋgəlva istə kəpel na, də wəzaɓ noki yi gəla na balam nok adawzaɓ faɗə!»