2Samiyel 6 - Bible en Guidar

Davit agəmək wən nawki akoti na Daya a Yerusalem

¹ Davit akkeletik məzəlpaŋ en tektek na Israyel pak əmpa, aɗɗaŋgək gabal kaklaw hoku.

² Yaŋ Davit asil ambat dit ɗiy nan pak a Ba'ala na Yuda, kawgəm akoti na Maŋgəlva sədaka, məs ayaŋ na: «Akoti na Yawe» net məzəlpaŋ na disiŋ, məs dəsan aket kerubaɗe.

³ Aslanənək akoti na Maŋgəlva aka mawta net wasliɗe meleketeni, aslanənək səŋgil ana Abinadab da dəsan aka mossorgo. Uzza də Ahiyo, kirtin Abinadab, məzukanən mawta net wasliɗe meleketen vani.

⁴ Agəmənənək akoti na Maŋgəlva səŋgil ana Abinadab da naka mossorgo, Ahiyo məzudaw aba akoti.

⁵ Davit dit ɗiy na Israyel dəwənnet tahəŋ əskəlaŋ aba Yawe dit əsmayɗe temtem diyɗa, dit zəgeɗ nasmay məɗɗet dit wəleŋɗe lelewɗe va gazaŋvəlɗe, gəzləŋtəndəŋɗe də əbay dəgəleɗi, gaŋgaɗe gəm ndayɗe ammbeti.

⁶ Ndəɗaŋ pay a kelle na Nakon, yaŋ Uzza atəl van karma akoti na Maŋgəlva. Ndən kãw ərmani, vi wasliɗe aŋglaŋ əzganəni.

⁷ Yaŋ gədəv Yawe adə aka Uzza, Maŋgəlva bay əbayən eske'e ləŋ aka goryom nani. Ndən zam eske aza akoti na Maŋgəlva.

⁸ Gədəv Davit adəka, vi awla Yawe aɗɗak təki hoŋ abay Uzza. Miya təki nan na, Peres-Uzza, adawyanən təki nan hã dəpaŋka.

⁹ Davit ageslne' sənək Yawe dəpaska, amna: «Mbarmbar akoti na Yawe adazzan anawda kandi?»

¹⁰ Davit dəŋgəm əka akoti na Yawe a walaŋgəla na Davit ɓa, Davit akkpaŋganək eŋgil ana Obed-Edom da, mə Gat.

¹¹ Akoti na Yawe asanək ana Obed-Edom mə Gat da gap təla hoku, Yawe akiyək əzaɓ aka gəla na Obed-Edom dəwənnani.

Əgap na akoti na Maŋgəlva a Yerusalem

¹² Məprəman səni məlĩ Davit na, Yawe akiyək əzaɓ aka gəla na Obed-Edom də zəga nan pakə, vi akoti na Maŋgəlva. Yaŋ Davit ambat agəm akoti na Maŋgəlva aki səna Obed-Edom da, a walaŋgəla na Davit də wənneke.

¹³ Adan məzukanən akoti na Yawe, agəmənən tilit ndap ndap sləre ləŋgə, Davit ataw wəla medgeɗge gəm wət wasli məkərni.

¹⁴ Davit askələk zən soksok aba Yawe, gabaga na lukut na daya net məsdəlveŋge na helege na ngərayã Davit aynə egzen kaka'ə.

¹⁵ Davit dit ɗiy na Israyel, akiyənək akoti na Yawe a Yerusalem, də wəɗɗəla gəm ɓaɓəlmet gozloreɗi.

¹⁶ Pay akoti na Yawe agap a walaŋgəla na Daviti, Mikal wətən Sawlu təwəl afuŋ də təkifoŋgo naza gəla, məlĩ Davit tay əskəl pərvək pərvək aba Yawe. Yaŋ təzelen addəv makrata.

¹⁷ Akiynənək akoti na Yawe, aɗiynən a gizlirke an Davit aher səni. Sissiŋ Davit adə əvəl nawzla kurmbuɗuku gəm əzaɓ-Maŋgəlva nawrah zazaya aba Yawe.

¹⁸ Səza Davit agrak əda əvəl nawzla kurmbuɗuku də əzaɓ-Maŋgəlva nawrah zazaya, aɗɗak wəzaɓ aket ɗiy də iya na Yawe Məzuɓappak na disiŋ.

¹⁹ Awɗakək zəga nawzəm sən vanday net ɗiy na Israyel pakgiti; ɗəf mizilin dət guluk pak arahaŋgək haran net moŋgosok moŋgosoku, gəpa məbaya net kirtin gogozlo gəm net kirtin megezlembirke məktimti. Dərɓagan na, naway pak alək eŋgil ananda.

²⁰ Davit adek ananda kasɗet ɗiy nani. Vasna, Mikal wətən Sawlu vit ələmsən Davit, təmna: «Mbari məlĩ na Israyel agagdakan zən dəpaŋka! Yaŋ aggbuk zəga səzan a maheret gil belemɗe net belemɗe nan va ɗəf ɗarə.»

²¹ Davit azlan sət Mikal na: «Aba Yawe naw məs dəwelu day ki afuk gəm day kigəla nani, aɗiyu ka məlĩ aket ɗiy na Yawe, aka Israyel; aba Yawe nədasmayã.

²² Wanəvoŋgən kiyu day ki aska, wanəɓe'gən zu dəvawdəvawa, ya a ma heret belemɗe kənahəŋ na wanərah gagdaka.»

²³ Mikal, wətən Sawlu, tərah uwa ɓa, gap əmta nata.