2Samiyel 5 - Bible en Guidar

Əzəm məlĩ na Davit aka Israyel dəwənnani ( 5:1—24:25 ) Əzvaɗe maddaabəŋ 5:1—10:19 Davit məlĩ na Israyel

¹ Mahəlfaɗe na Israyel pak azzoŋ aza Davit a Hebron, aɓsənən dawnəh na: «Mənam yakəŋkə, mbel nok na gogo.

² Far lahəŋ gala Sawlu asan məlĩ nam na, istə kədadaw abet mə Israyelɗe. Yaŋ Yawe anah sukuk na: “Istə kədawteɗ ɗiy naw na Israyel, istə nawsok daya aket ɗiy na Israyel.”»

³ Ɗiy məsɓet na Israyel pak azzoŋguk ərəh məlĩ a Hebron. Məlĩ Davit aziwginik wənmiyna dənɗaŋ aba Yawe a Hebron, aɗiyənək Davit ka məlĩ na Israyel.

⁴ Davit tay də wəzva kaklaw hoku pay agəm məlyã, azəmək məlĩ wəzva kaklaw poɗo.

⁵ Wəzva buhul də təla sləre azəm məlĩ a Hebron aka Yuda, a Yerusalem, əzva kaklaw hoku kiyən hoku azəm məlĩ aka Israyel bayman gəm Yuda.

Davit amohũk Yerusalem

⁶ Məlĩ dit ɗiy nan addoŋguk a Yerusalem aket mə Yebusɗe, ndəɗaŋgə dəssoŋ aka dələv vani, anahaŋ sənən Davit, dawnəh na: «Kətoŋ na aŋ ɓa, deŋgerɗe dit vədalɗe kaka' warɓohokuni.» Aŋglaŋ ənahaŋ na: «Davit atoŋ na aŋ ɓay kpakə.»

⁷ Yaŋ Davit amõh walaŋgəla-metiŋ mətərwəsl kiyən na Siyon, marba walaŋgəla na Davit.

⁸ Davit anah dəpas na: «An ɗəf man aka wəbey mə Yebusɗe na, dətoŋ dəka batemit iŋkile dəgapgən azeti. Davit azeletik deŋgerɗe dit vədalɗes man taŋtaŋgə!» Vini adawnahaŋ na: «Daŋgarɗe dit vədalɗe atoŋgoŋ na addəv gəla na Yawe ɓa.»

⁹ Davit asanək a walaŋgəla mətərwəsləni, alvan na, marba walaŋgəla-metiŋ na Davit. Sissiŋ Davit arkə zlava kiyən tərwəslə, təŋ səza Milo əmbat aza gəla nani.

¹⁰ Gagdak na Davit aɓayək abe abe, Daya Maŋgəlva Məzuɓappak na disiŋ tay dəndəni.

¹¹ Huram, məlĩ na Tir aslənək maslənɗe aza Davit, dit muguguleɗ, gəm məntaraŋ wəleŋɗe dit məslmaŋ gərmeŋge, arkaŋ gəla sən Davit.

¹² Davit asənək na Yawe tay əsɓan ka məlĩ aka Israyel, gəm tay əɓaygən məlĩ nan ammbet ɗiy nan mə Israyelɗe.

Kirtin Davit en muwet a Yerusalem

¹³ Davit agəmək gəreŋgiɗin gəm adahək gil meɓɓet əmpa a Yerusalem dərɓaga əzza nan sə Hebron. Awaŋgək kirin mezeŋgleket dit muguluŋgit sən Davit əmpa.

¹⁴ En awə a Yerusalem yeŋki: Sammuwa, Sobab, Natan gəm Salomoŋ,

¹⁵ Yibhar, Elisuwa, Nefeg, Yafiya,

¹⁶ Elisama, Elyada, gəm Elifelet.

Əska wəla na Davit aket mə Filistiɗe

¹⁷ Mə Filistiɗe aprəmən na, məɗini Davit ka məlĩ na Israyel, mə Filistiɗe dəwənnet ambataŋgək əkayan Davit. Davit aprəməka ambatək a təki mətərwəslni.

¹⁸ Mə Filistiɗe agulunək walaŋ net mə Rafayɗe.

¹⁹ Davit sosõhgən Yawe dawnəh na: «Nəmbat əgay dit mə Filistiɗeŋ sa? Wakipsiw ammba vaw sa?» Yawe aɓsən Davit na: «Apeŋgi, wanipsuk avoko.»

²⁰ Davit ambatək a Ba'al-Perasim, adaki Davit arbisiti. Yaŋ amna: «Yawe aŋgarək waleŋgit məzuzelɗe naw səbaw va təki məs iŋkile arɗaŋgə.» Vini məya iya na təki vanəs na Ba'al-Perasim, (Afən) əɓliw təkiya.

²¹ Appetinik tuyeŋge net adaka; may Davit dit ɗiy nan ekeninke.

²² Mə Filistiɗe agulunək walaŋ net mə Rafayɗe əmpa.

²³ Davit sosõhgən Yawe əmpa; yas azlan sən na: «Kədawaksit kəlabet ɓa! Akkpaŋ dərɓegeti, kədegən azet abet zaɗiyeɗi.

²⁴ Pay kəprəm ɓaɓəlma təl ɗəf aket zaɗiyeɗi, vasna kəgəmgən zuko, asna Yawe dəgil abok kawbay dibirgidik net mə Filistiɗe.»

²⁵ Davit agəɗək vas va Yawe aɗi sən wən nani. Abeyik mə Filistiɗe, təŋ sə Geba hã gap nawtoŋ a Gezer.