2Samiyel 4 - Bible en Guidar

Ba'ana də Rekab abaynən Isboset

¹ Wətən Sawlu aprəm na Abner amtək a Hebron; zən pak zamzamə, mə Israyelɗe pak kiyit vẽhẽ.

² Zel tahəŋ sula ɗiy gugriɗ net məzəlpaŋ ana wətən Sawlu da. Iya na taka net na Ba'ana, maɓɓan tam Rekab; kirtin Rimmon, zev Benyamin na Berot. Vi məŋɗani Berot ka təki na Benyamin.

³ Ɗiy na Berot nek anzoŋ a Gittayim, assoŋ də gəla adak hã pay dəpaŋka.

⁴ Yonatan wətən Sawlu tay də wətən taka tələn sulegit aɗəmaŋka. Tay də əzva sle' pay alabara namta net may Sawlu də Yonatan ade sə Yizrel; ɗak məzəzgələn mat aka wəslan kanzata, dawgəm zət nak na, ndən kõh səvat bət afuŋ, kpaŋ maŋgalɓaya vaska. Iya nan na, Mefiboset.

⁵ May Rekab də Ba'ana, kirtin Rimmon na Berot, azzoŋ ana Isboset da; agapaŋ aka tataŋ pay sla'sla'ə, nan tay ɗuffo əffet aka zəga nawvoŋgo.

⁶ Atoŋgoŋ eŋgil də haykəmari aketi; ampanən zlif aza gədəvni. Rekab də Ba'ana məlmən ɓakaŋgə.

⁷ Adan atoŋgoŋ eŋgili, tay ɗuffo əffet aka zəga nawvoŋ nan egziŋ ananda, yaŋ ampanəni, abaynən zamə. Atawən kiyən ndəɗaŋ ɓakə. Agəmən tive na Araba, kim aka wədawa.

⁸ Akiynən ki Isboset sən Davit a Hebron, anahaŋ sənən məlĩ na: «Ki Isboset wətən Sawlu məzuzel nok an dəkayan zeŋgilok nak yaŋka. Dəpaŋ na, Yawe ampələk ki daya məlĩ naw aket may Sawlu dit kirtini.»

⁹ Davit azlan sit may Rekab də məlmən Ba'ana kirtin Rimmon mə Berot, aɓsit na: «Yawe madarani, ndən dəkõhgən zeŋgilew səddəv wəray pakə!

¹⁰ Ɗəf dəki su wən nan dawnəh na: Sawlu yaŋ amtəka. Ɗəfəs azan na, wən nenek aki suwa, nərmak nəbayək a Siklag. Nan azan na wən nenek aki suwa.

¹¹ Sasak ɗiy məsdarawɗe dəbaynən ɗəf təstəs ɗuffo aka zəga nawvoŋ eŋgil ananda sa? Kakaŋ nəssohẽt na mbel nan avokum gəm kawzokum mbo' səka dələv ɓa sa?»

¹² Davit aɗi wən nan sit məzəlpaŋ nani, abeynini. Sədərɓagan mətaw vet də təlti, məlewit go'o də bobok na Hebron. Agəmnən ki Isboset andəknən a magamas na Abner a Hebron.