2Samiyel 3 - Bible en Guidar

¹ Wəgay anziyək a weleŋgit ɗiy na Sawlu dit en na Davit. Davit tay əsɓan əssa nan abe abe, net ɗiy na Sawlu tay əddakaŋ abe abe.

Kirtin Davit en muwet a Hebron

² Davit awək kirin mezeŋgleket a Hebron. Tizi nani Amnon, awa dət Ahino'am na Yizrel;

³ Masulani, Kile'ab awa dət Abigayel ga Nabal na Karmel; Absalom mahoko'ti, awa dət Ma'aka wətən Talmay, məlĩ na Gesur;

⁴ Adoniya mopoɗeti, wətət mə Hagit, mesle'eti, Sefatya, wətət Abital;

⁵ Yitreyam masləre'eti, wətət Egla, ga məlĩ Davit. Eskiŋ kirtin Davit en awə a Hebron.

Wəgay a walaŋ Abner də Isboset

⁶ Aka əgay adaɗɗa a weleŋgit ɗiy na Davit dit en na Sawlu, Abner ampək ɓəɓəl addəv gəla na Sawlu.

⁷ Sawlu tay dət gəran lahəŋ adawyaŋ na, Rispa wətət Ayya. Pay mbərən Isboset anah sən Abner na: «Vimi kətoŋ azat gəra əbba di?»

⁸ Aka batam wənəska, gədəv Abner adək diyɗa aka Isboset, yaŋ amna: «Kəra na Yuda nan kakaŋ sa? Dəpaŋ, in tat əɗɗa moggon aka gəla na Sawlu afuko, azet milmiŋgiɗni gəm azet beyneŋgiɗni. Nəppok kəbətgən ava Davit ɓa. Yaŋ kədawkay su heslepe dəpaŋ də wən nat gulku!

⁹ Maŋgəlva dəgəɗ su an naɗɗa in Abner, an nəɗɗa an Yawe asway sən Davit,

¹⁰ nawzargən məlĩ səddəv gəla na Sawlu, kawɗi mazaŋga na Davit aka Israyel də Yuda, təŋ sə Dan gap a Ber-seba pakəŋ ɓa.»

¹¹ Isboset dəɓap əman sən wən taka sən Abner ɓa, vi tay əgeslne' səni.

Abner tay əsap aza Davit

¹² Abner, aslənək maslənɗe aza Davit a gəlani, dawnəh na: «Dələv na naway di? Asna: Aziwgin səm wənmiyna, nətəl sukuk vaw kawsepet ɗiy na Israyel ammba vok tuɓuku.»

¹³ Amna: «Lewi yi. Naw anəziwgin wənmiyna də isi, ya kan na, zəga taka nədaŋgla avoko: kədazzok abaw aŋ məza kəkiyət Mikal wətən Sawlu dazzok ɓa ɓa.»

¹⁴ Davit slən maslənɗe aza Isboset wətən Sawlu, dawnəh na: «Apsuwət guluk naw Mikal, məs nəkay də ma gimnit mə Filistiɗe səkat kəŋkə.»

¹⁵ Yaŋ Isboset aslən əkdəhət səna Paltiyel, wətən Layis da.

¹⁶ Zələt azbatək də wəhəm ammbata, azbatək gap a Bahurim. Abner aɓsən na: Doko, amili, ndən buryoku.

¹⁷ Abner azgək meŋ dit ɗiy məsɓet na Israyel; dawnəh na: «Farfari kəŋglaŋ Davit dəsangən ka məlĩ akokum.

¹⁸ Ya kakaŋ pay nan dəgəɗə! Vi Yawe apelik aka wən na Davit na: Də va gawla naw Davit, nədawbit ɗiy naw mə Israyelɗe səvet mə Filistiɗe, səvet mezuwzelɗe net pakə.»

¹⁹ Abner, aprəman sitik mə Benyaminɗe a sləmeti. Dərɓagan ambat a Hebron, vi kawnah sən Davit sən kiyən na, gəla na Israyel də an na Benyamin pak atafənək wən nani.

²⁰ Abner pay dit zel kaklaw sula, aza Davit a Hebron. Davit adək way sən Abner dit ɗiy en nammbani.

²¹ Abner aɓsən Davit na: «Wanəsil əmbat kakkelet mə Israyelɗe dəwənnet aza daya naw məlyã. Anəziwgin wənmiyna də isi, kəzəmgən məlĩ aka dələv van gboŋ va kəŋgələ.» Davit apəl sənək tive sən Abner, asil ambat zayə.

Yo'ab abayək Abner

²² Məzəlpaŋ na Davit gəm Yo'ab yeŋ əzzoŋ sə təki əgaya, zəgeɗ məmõhĩt diyɗa akiyaŋgə. Abner tay də Davit a Hebron ɓa, vi appanək əmbata, alək zayə.

²³ Səza Yo'ab agap dit məzəlpaŋ nani, ɗəf ade assak səni, amna: Abner wətən Ner, adek ərəh məlyã, appanək əmbata, alək zayə.

²⁴ Yo'ab toŋ aza məlyã, yaŋ amna: «Mi kəgəɗəŋ di? Abner adek azoko, ya vimi kəppan ambat di?

²⁵ Kəsənək Abner, wətən Ner! Ade na vi kawmbəɗoki yi, kakkessen wəgilye nok də wətoŋ nok, gəm kawsən an kədaɗɗay yi.»

²⁶ Yo'ab vit səza Davit, ndən slən maslənɗe ammba Abner. Amilginən sə ma bobok na Sira, Davit dəsən ɓa.

²⁷ Adan Abner amndan a Hebron, Yo'ab kar əgdahan kəleŋgil na maddamba na walaŋgəla-metiŋ, va kawseske' səni. Ndən zlif əmpan aza gədəvən adaka, ndən zamə; abay na, kampəlki Asayel məlməni.

²⁸ Səza Davit aprəm wən nan dərɓaga agəɗək səkay na, amna: «In dit ɗiy naddəv məlĩ naw bartata mənan aba Yawe hã faɗə, vi mənam tat addəv əmta na Abner wətən Ner ɓa.

²⁹ Wən nan dəkkpaŋ aka Yo'ab gəm aka gəla na afən pakə! Mbel diymaŋ səmmbet ɗiy nama həlfaska, kokolo dəsani, zel dəkkpaŋgaŋ mərmaŋ paɗam va gili, meɓɓet dəmtaŋ ama masalam, wəzəm dəkkpap səmeti!»

³⁰ Yo'ab də Abisay məlmən abaynən Abner na, vi abay Asayel məlmit a təki əgay a Gabawən.

³¹ Davit anah sən Yo'ab dit ɗiy məs dəndən pak na: «Məŋgeret lukutɗe nokum, məgul lukutɗe na sakə, məhəm kigəbay Abner.» Məlĩ Davit sən kiyən tay əzban ɓeɓele na kigəbay vani.

³² Yas andəkənək Abner a Hebron. Məlĩ azganək zən də wəhəm a magamas, vanday net ɗiy pak ahəmaŋka.

³³ Məlĩ agəmək wəla gəlyanalvan Abner, amna: Abner, va əmta na dərwa adamta kəta sa?

³⁴ Vok məɓrukni ɓa, tuluk miynan dit ngəyamɗe na təbəz pepreŋ sula ɓa. Yaŋ kəskot zam va ɗəf məbayaŋ gəbay aggbataŋ akan abaynəni. Ɗiy pak azbanənək əhəma.

³⁵ Ɗiy pak azzoŋguk kapsən əzəm sən Davit, tak pay tay egge tagay, Davit aswayka, amna: «Maŋgəlva dəgəɗ su an naɗɗa pak an nəzəmək waya, awaniɓa, zəgeɗ meɓɓet məza pay dəbət ɓa ɓa!»

³⁶ Ɗiy pak asənnənka, moggoni areti; va məlĩ adaɗɗa pak moggoni a maheret ɗiy pakə.

³⁷ Ɗiy pak asənənka, Israyel pak asənək dəpas na, məlĩ yi dəbay Abner, wətən Ner ɓa.

³⁸ Məlĩ anah sit gewleɗ nan na: «Kəsənən na, daya, ɗəf metiŋ na Israyel dəmtə dəpaŋ ɓa sa?

³⁹ Də nəsaw məlĩ dəpaŋ zlaŋgə, in tat əttəman zu limbir-limbiri; ɗiyiŋ kirtət Seruya iŋki, kiyit ɓəli daykiywa. Yawe dəmndagan sən daraw na məsdarawə.»