2Samiyel 24 - Bible en Guidar

Davit tay əver ɗiy na Israyel

¹ Gədəv Yawe azbanək əda aka Israyel, asilgənək Davit aketi, dawnəh na: Dok aŋɗet mə Israyelɗe dit mə Yudeɗi.

² Məlĩ aɓsən Yo'ab, daya net məzəlpaŋ məs dəndən na: «Kamə abbalan mahəlfa na Israyel gboŋgu, sə Dan hã a Ber-Seba, məver ɗiy, vi nəsəngən əŋɗa neti.»

³ Yo'ab aɓsən məlĩ na: «Kəta Yawe Maŋgəlva nok dəwet ɗiy va ndit va ndit təl səkatə, hara daya naw məlĩ dulegəni! Ya vimi daya naw məlĩ annek də wən vaskəs lah di?»

⁴ Əpel na məlĩ askak wəla Yo'ab dit deyeɗe net məzəlpaŋgə, Yo'ab vit dit deyeɗe net məzəlpaŋ nak səba məlyã kadda əver ɗiy na Israyel.

⁵ Ndəɗaŋ dəgar ki Yurden, sek dibirgidik net a Arower, dəka dəzəŋ na walaŋgəla-metiŋ na waleŋgit məlpeŋge na Gad, gəm kəla Yazer.

⁶ Ndəɗaŋ pay a Galad gəm Bagərəm naka dələv net mə Hitɗe a Kades, agapaŋ a Dan-Ya'an, gəm tərwəsl ki Sidon.

⁷ Ndəɗaŋ toŋ a walaŋgəla-metiŋ na korgu na Tir, addəvit walaŋgəleɗe gugriɗ net mə Hittiɗe dit en net mə Kana'anɗe pakə, ndəɗaŋ vit də dohoŋ na Yuda a Ber-Seba.

⁸ Abbalaŋgək aka dələv van pakə, amndoŋ a Yerusalem, addəv təla vaytak də əvoŋ kaklaw sula.

⁹ Yo'ab apsənək əŋɗa na ɗəf titir sən məlyã: Məzəlpaŋ na Israyel tahəŋ gabal səkat dədopoɗo, en dədawɓapaŋ əgay də masalam, en na Yuda tam tahəŋ gabal səkat sle'i.

Maŋgəlva tay əzga' sən Davit aka heslepe nani

¹⁰ Makra Davit ɓuh səza aŋɗet ɗiyi, yaŋ Davit aɓsən Yawe na: «Nəgəɗək mambray diyɗa də an nəgəɗə. Ya kakaŋ na Yawe, kamə avvuyoŋ heslepe na balam noko, vi va dərwa nəgəɗ faɗ faɗə.»

¹¹ Davit asil də mompumo, əpel na Yawe ade sənək məskəleŋ Gad, məzula na Davit, amna:

¹² «Dok anah sən Davit na: An Yawe apel yaŋka: Zəgeɗ hoku nədawɗi suko, awel taka səreti, nəɗɗa sukgəni.»

¹³ Gad alək aza Davit, aboton səni, aɓsən na: «Dələv nok dəzəvgən buhul də may kəŋgəl sa, təla hoku, məzuzelɗe nok ərɓohokun is ənzok sit kəŋgəl sa, awaniɓa, əvoŋ hoku gəbaymərma dədegən ərroɓ ɗiy naka dələv nok kəŋgələ? Aɗɗumoni, awel an nawgəɗ suko, nəman səngən wən nan sən ɗəf an dəslənwa.»

¹⁴ Davit aɓsən Gad na: «Geslne armuwək diyɗa! Dəɗah məbət addəv va Yawe ki avet ɗiyi, vi nan awla sasãh diyɗa.»

¹⁵ Yawe aslənək gəbaymərma aket ɗiy na Israyel, təŋ dəmpummo ləŋ hã gap va pay aɗiyə. Təŋ sə Dan hã a Ber-Seba, ɗiy gabal kaklaw buhul dəmtaŋgə.

¹⁶ Adan maslay atəl van kəla Yerusalem, aslak zən nawzani, ma Yawe agəɗək nzok dawki əraya. Aɓsən maslay məzuzet ɗiy nak na: «Məki kana, avoŋgən voko!» Pay nan na, maslay na Yawe tay go'o də kelle na mə Yebus adawyaŋ na Arawna.

¹⁷ Davit apel sən Yawe, adan awla maslay məbey ɗiyi, Amna: «Intə nəgəɗ mambraya. Intə nəraygəni; ɗiy naw miy aɗɗaŋ di? Kamə azlawar nok dəsan akaw də gəla na əbba!»

Davit tay ərka gəlamatuya sən Yawe

¹⁸ Gad tek aza Davit dəpaska, yaŋ anah səni: «Dok arkə sən matuya sən Yawe aka kelle na Arawna mə Yebus.»

¹⁹ Davit tek aka əpel na Gad va Yawe aɗi sən wən nani.

²⁰ Arawna təm awla na məlĩ dit ɗiy gugriɗ nan əzzoŋ akani. Arawna vit appu' aba məlyã.

²¹ Arawna amna: «Vimi daya naw məlĩ ade ana balam nanda di?» Davit amna: «Maw aka wəlbəh kelle sə voko. Vi karkə sən matuya sən Yawe adaka. Vasna gəbay naket ɗiyiŋ dəziwgəni.»

²² Arawna aɓsən Davit na: «Daya naw məlĩ dəgəm va makran aŋgəl naɗɗa əvəl nawzla kurmbuɗuku. Wasli yaŋ naɗɗa əvəl nawzla kurmbuɗuku, wəleŋɗe nakdəh mawta də an naklak awlet wasliɗe wassoŋ ka seseme.

²³ As pak Arawna apsənək məlĩ ka na məlĩ pakə. Arawna aɓsən məlĩ na: Kəta Yawe Maŋgəlva nok dətaf suko.»

²⁴ Məlĩ aɓsən Arawna na: «Owwo! Dəlbəh nədalbəhən sə vok va əvəl nani. Naw nəɓapna əɗɗa əvəl nawzla kurmbuɗuk sən Yawe Maŋgəlva naw də zəga na mekeleŋ ɓa!» Davit albəhək kelle dit wasliɗe aka təbəz babar kaklaw sle'i.

²⁵ Davit arkak matuya sən Yawe adaka, aɗɗak əvəl nawzla kurmbuɗuku gəm əzaɓ-Maŋgəlva nawrəh zazaya. Yawe aprəmək wəkkam nani, wəray aptuwək man səka dələv na Israyel.