2Samiyel 23 - Bible en Guidar

Əpel na Davit an bayma faɗə

¹ Əpelɗe na Davit en bayma faɗ yeŋki: Əɗiyma na Davit wətən Yesse, əɗiyma na məs makrani, gəm məɗi kiyən diyɗa, mesiya na Maŋgəlva na Yakob, məs ɗiy na Israyel adannekeŋ də gəlya nani.

² Əmpəs na Yawe apelik də mawa, aɗiyək əpel nan aka hərzlumwa.

³ Maŋgəlva na Israyel dəpel suwa, milɓe na Israyel dəpeli: «Tay əzəm məlĩ aket ɗiy təstəsə, də geslne na Maŋgəlva adawzəm məlyã.

⁴ Va təki kerker na ba pummo gala əgilye na pay məza slaybuwən ɓa: Dərɓaga təki pasak na əzi na buna, kevile tay əgilyen səfuŋ.»

⁵ Vaski gəla naw aza Maŋgəlva ɓa sa? Vi wənmiyna an faɗ avayə, məzaɓan pakə, aɗi lewlew gusu. Əska wəla naw də an nəŋgəl pak tay əɗɗet ɓa sa?

⁶ Məzawtəraŋ wəray ɓa, va gedirge adazgetini. Də va ɗəf mekeleŋ adarmetin ɓa sa?

⁷ Ɗəf nawrəŋgit na, dəkay təbəz gəm də wəlaŋ tulhõ, kawzlet akoffoy ɗukɗuk a gəlet essiŋgi.

Məzəlpaŋ na Davit

⁸ Iya net məzəlpaŋ na Davit en korsomoyɗe yaŋka: Yoseb-Basebet «məzuziw a gəlani» mə Takomoni, daya net məzəlpaŋ hoku; ndəni adawyaŋ na Adino mə Esni, ndəni dəbey ɗiy səkat dədopoɗo aka mataka.

⁹ Sə dərɓagan na, Ele'azar wətən Dodo, wətən ɗəf na Aho'a. Taka naret məzəlpaŋ korsomoyɗe hoku, dəzbanən Davit pay awaksitin mə Filistiɗe dəkkalaŋ adak nawgaya, gala məzəlpaŋ na Israyel mbirit eddereŋgi.

¹⁰ Ya nan ndən le'i, abey mə Filistiɗe, hã van sam aka masalam nan kpurrok kpurok appar ɓa. Yawe apsitik əska wəla metiŋgin dəpaska, məzəlpaŋ amndoŋ ammban vi kaggbuk zəga net ɗiy mimtit kaka'ə.

¹¹ Sə dərɓagani, Samma wətən Age mə Harar ade. Pay mə Filistiɗe akkalaŋ a Lehi, guli tay adak də hĩyna net zel diyɗa addəvən. Məzəlpaŋ na Israyel anzoŋ sitin mə Filistiɗe.

¹² Ndən ziw addak guli naka, le'gən əgaya, arbəsit mə Filistiɗe, yaŋ Yawe apsən əska wəla metiŋgini.

¹³ Hoku səret məzəlpaŋ kaklaw hoku, azzoŋ aza Davit pay nakkalan zəga na mabardaw, a bətəŋ na Adullam. Məzəlpaŋ net mə Filistiɗe aɗiynənək dibirgidik net aka walaŋ net mə Rafayɗe.

¹⁴ Davit tay a təki nawɗam an moggoni, mbaraka gəla ngaɓa net mə Filistiɗe tay a Bet-Lehem.

¹⁵ Meme kãw ərma Davit, amna: «Naway nawki su iŋkile nawsa naddəv vov net iŋkile a maddamba na Bet-Lehem ndak di?»

¹⁶ Yaŋ korsomoyɗe hoku nek atoŋgoŋ gõk a dibirgidik net mə Filistiɗe, ambaɗaŋ iŋkile sə vov na Bet-Lehem məs na maddamba naka, mah akiytini, apsinin Davit. Dəŋgəm əset ɓa; ametik aka dəlvafuŋ sən Yawe.

¹⁷ Amna: «Dədah nawset ɓa Yawe, məstakaŋ va mbel net ɗiy dəddoŋ əmbeɗtin də wəzan zeŋgilet ɓa sa?» Ndən ɓoŋ dawseti. Vaski korsomoyɗe hokiŋ aɗɗaŋgə.

¹⁸ Abisay, məlmən Yo'ab, wətət Seruya, daya net ɗiy hoku neki, ndəni dəskan tulhõ nan aket ɗiy səkat hoku, dəbeye, sləman agilik va net ɗiy hokiŋki.

¹⁹ Məgagdakani daykiyit ɗiy hokiŋki. Akkpaŋgək ka daya neti, dəgap təlit ɗiy hoku vet ɓa hara.

²⁰ Benaya, wətən ɗəf gambara sə Kabseyel, wətən Yoyada, agəɗək wəza diyɗa. Ndəni dəbey osloronɗe sula na Mo'ab pakə; ndəni diprik dəbay ɓoolu sə vov net iŋkile, gala pay net ɓeɓrezlerizze.

²¹ Ndəni yi dəbay ɗəf na Eziptə məzukaɓa, mə Eziptə van tay də tulhõ avani: Yaŋ ambat azan də zleŋge, ndən mõh əmõh tulhõ na mə Eziptə nak səvani, abay də tulhõ nan dəvan dəvani.

²² Zəgeɗ en Benaya wətən Yoyada agəɗis dəgilgin sləman va net ɗiy hoku məzəlpaŋ korsomoyɗe neki.

²³ Məɗini kiyən daykiyit ɗiy en kaklaw hoku neki ya dəgap təlit ɗiy hoku nek ɓa hara. Davit aɗiyək ka məga nani.

²⁴ Asayel, məlmən Yo'ab, tay eret ɗiy kaklaw hoku neki, vaska'e Elhanan, wətən Dodo na Bet-Lehem,

²⁵ Samma mə Harod, Elika mə Harod,

²⁶ Heles mə Pelti, Ira wətən Ikkes na Tekowa,

²⁷ Abiyezer mə Anatot, Mebunay mə Husa,

²⁸ Salmon mə Aho'a, Mahray mə Netofa,

²⁹ Heleb wətən Ba'ana, mə Netofa, Ittay, wətən Ribay mə Gibeya, aka va na Benyamin,

³⁰ Benaya mə Piryaton, Hidday, naket məlpeŋge na Ga'as,

³¹ Abi-Albon mə Bet-Araba, Azmawet, mə Bahurim,

³² Elyahba mə sa'albon. Kirtin Yaseni: Yonatan,

³³ Samma mə Harar, Ahiyam, wətən Sarar mə Harar,

³⁴ Elifelet, wətən Ahasbay mə Ma'aka, Eliyam, wətən Ahitofel mə Gilo,

³⁵ Hesray mə Karmel, Pa'aray mə Arbi,

³⁶ Yige'al, wətən Natan mə Soba, Bani, mə Gad,

³⁷ Selek, mə Ammon, Nahray, mə Berot, məndə gulom na Yo'ab, wətət Seruya,

³⁸ Ira, mə Yitir, Gareb mə Yitir

³⁹ Uri, mə Hitti. Sapgit pak kaklaw hoku kiyit buhulu.