2Samiyel 22 - Bible en Guidar

Gəlya na Davit

¹ Davit pel sən Yawe də əpel naddəv gəlyaŋka, gala Yawe akõhgən səvet məzuzelɗe nan pak gəm səva sawlu.

² Yaŋ amna: Yawe yi milɓe nawa, zlava nawa gəm məkõhguwa.

³ Maŋgəlva milɓe nawɗam naw adaki, baray nawi, gulom naska wəla nawi yi. Təki nawɗam nawa, ndəni məkõhgu səvet məsgagayɗe.

⁴ Nəyak Yawe! Yas akõhgu səvet məzuzelɗe nawa, soko nani.

⁵ Vovolumɗe namta atuwəɗwənka, lolohẽɗ mbəreyit ageslne' guwənka.

⁶ Helegeɗ na təki nanziya namta atəwəɗwənka, bizwilɗe namta tahəŋ mənslinik abawa.

⁷ Addəv tatwãh nawa, nəyak Yawe, yaŋ nəya Maŋgəlva nawa. Aprəmək wəlaw səddəv gəla nani, əhəm naw agapək a sləmani.

⁸ Yaŋ dəlvafuŋ aɓələ, akkeri; gabba disiŋ akkerke; aɓlaŋgək vi gədəvən adə.

⁹ Enene agilyoŋgək sə məŋkənni, offo məzuzla əgilyan səmani, slay offo ngiɗngiɗ əzzan səzani.

¹⁰ Akrosək disiŋ, ndən priki, slaybuwən ɗəkɗək ammba təlni.

¹¹ Ndən kərək aka keruba, ndən veŋgi, rəp ərban zən aka persleke səmyã.

¹² Guzli yi təki nawɗam nani, guɗukɗe nan na, wəkkal net iŋkile ndiɗim ndiɗimi, gəm slaybuwən ɗəkɗəkə.

¹³ Va slay offo holɓoɓu, təki kerker tay abani.

¹⁴ Yawe ahãyək sə disiŋ, Məsəɗəɗə arbanək wəlani.

¹⁵ Ndən pa' əhwẽt herɗe, ndən təraygiti, aɗɗak əwiɗ na buwən təki pak ŋgərãy-ŋgərãyə.

¹⁶ Iŋkile na pehe arslaŋka, gabba dələv arbək də wəhãy na Yawe də əmpəs dəgil sə məŋkənni.

¹⁷ Sə disiŋ, atəl van əslawa, agdəhu səret iŋkile metiŋgiti,

¹⁸ ndən əkõhgu səva məzuzel naw kəkərtəhã, gəm səvet məzuseɓɗe naw gbogboŋɗe daykiywa.

¹⁹ Pay nawray nawa, ndəɗaŋ əwakaŋ səwəni, Yawe yi məsək suwa.

²⁰ Amõhwəka, ndən vitguwa; vi aŋgluwəka.

²¹ Yawe agəɗ suwək va aza salala nawa, amndan suwək va aza bartata na vawa,

²² Vi nərmak tive na Yawe, nəgəɗ mbərayən aka Maŋgəlva naw ɓa.

²³ Tiveɗnanziya nan pak abawəŋgə, nadder səket wəsəɓɗe nan ɓa.

²⁴ Təstəs-gərak nəsaw dəndəni, nəgak zu səza heslepe pakə.

²⁵ Yaŋ Yawe agəɗ su va aza salala nawa, va əssa təstəs naw ama harani.

²⁶ Də ɗəf an moggoni, is tat əɗɗa moggoni; də məɓe' sən mahenziŋ də təstəs-gərakə, is tat əɗɗa təstəs-gərakə.

²⁷ Də ɗəf salala, salala kənani; də ɗəf an slokorslokoru, is tat ərban na slokorro kənani.

²⁸ Is kədawkõhgit məssehẽŋɗe, is tat əmbəsl horok aket məzukaɓaŋgə.

²⁹ Yawe, istə lalam nawa, Yawe tay əkekeɓe' guzli nawa.

³⁰ Vi də isi yi nədanzaw əwak sən dula, də Maŋgəlva nawa, wanəzlah ki zlava.

³¹ Tive na Maŋgəlva təstəs-gərakə, əpel na Yawe arbək ta'ə, baray net məɗamaŋ azani yi pakə.

³² Naway Maŋgəlva an Yawe yi ɓa di? Naway milɓe an Maŋgəlva nami ɓa di?

³³ Maŋgəlva yi təki nawɗam naw an gədakə, tay əntar tive an gərakə.

³⁴ Tay əppeten təlu va net muneŋge, Tay iziwgu aket mossorgoɗe gugriɗe.

³⁵ Tay iyagaw nawgaya, gəm vaw danslin bəle na təbəz pepreŋge.

³⁶ Is tat əpsu baray naska wəla noko, ulasahã noki dəɓayguwa.

³⁷ Is tat əkkafan təlu ammbawa, hara təlu agənesl ɓa.

³⁸ In tat ərɓehet məzuzelɗe nawa, in mbo' əzeti, namndaw məza nəgrek ɓa ɓa.

³⁹ Nəgrekik kãkãhə, nəŋzletke, asilyoŋ na ɓa, askotoŋguk ammba təlwa;

⁴⁰ Is tat əvay gbogboŋ nalpa, is tat əvoŋgən kiyit məzusilyoŋ akaw ammba təlwa.

⁴¹ Kərɓehet suwək məzuzelɗe nawa, nəzetik məzuzelɗe nawa.

⁴² Tahəŋ əhəmaŋ əkay əbbaha, məzəbbah tay ɓa; tahəŋ əhəmaŋ sənən Yawe, dəzlan sit lah ɓa.

⁴³ Wanətakeɗ va burɗuk na dəlvafuŋ, va ndərɓa naka tive nədaŋkineti, nədapəɗoteti.

⁴⁴ Kəkõhguwək səza ərmama net ɗiy nawa, kəɗiwək aket ɗiy-ɗarə. Ɗiy məza nəsin ɓa, dədaɗɗaŋ səwən wəza;

⁴⁵ molhõyẽɗ əgagdakawəni, an nəpelke, tay əprəmwəni;

⁴⁶ Molhõyẽɗ tahəŋ əddakaŋgə, agilyoŋ sə təki nawɗam net də əkkere.

⁴⁷ Yawe madarani! Soko sən milɓe nawa! Gagdak dəsan sən Maŋgəlva milɓe naw gəm məkõhguwa!

⁴⁸ Maŋgəlva məzəmpəl kiywa dədawvoŋgən kiyit ɗiy ammba təlwa.

⁴⁹ Is tat əmõhu səvet məzuzelɗe nawa, səvet məzusilyoŋ akawa, gəm is tat əkõhgu səvet məsgagayɗe.

⁵⁰ Vini Yawe, wanəɗi kiyuk aweleŋgit ɗiy-ɗarə! Wanəyə gəlya aka iya noko.

⁵¹ Tay əpsən əska wəla metiŋgin sən məlĩ nani, tay əɗɗa moggon aza mesiya nani, sən Davit də zeŋvin hã faɗə.