2Samiyel 21 - Bible en Guidar

Əzvaɗe madidirɓe ( 21:1—24:25 ) Mə Gabawənɗe də mazlalwã Sawlu

¹ May agəɗək diyɗa aka məlĩ na Davit, əzva hoku ammba zəni. Davit assohõnək Yawe, yaŋ Yawe amna: «Aka batam Sawlu də gəla nan məbay gəbayəŋki, vi abeyik mə Gabawənɗe.»

² Məlĩ ayek mə Gabawənɗe anah siti. Mə Gabawənɗe səret mə Israyelɗeŋ ɓa, naret mə Amorɗe dəppaŋ nekiŋ; mə Israyelɗe aswayaŋ sitinke. Sawlu də wəŋgla aŋglu Israyel də Yuda kiyən boŋgəŋ pak na, akayək əzeti.

³ Davit aɓsit mə Gabawənɗe na: «Miy nədaɗɗa vikum kan ka nəzaɓangən mambray an dəgəɗ akokuməŋ vi kəɓuh sitingin ma sit ɗiy na Yawe di?»

⁴ Mə Gabawənɗe aɓsənən na: «Wən na təbəz babar də meleŋgey tay aka walaŋgəm də Sawlu də gəla nan ɓa. Mam tay aka əbay ɗəf a Israyel ɓa.» Yas amsak ənah na: «Ya miy kənahaŋ nəgəɗ sukumgən di?»

⁵ Aɓsənən məlĩ na: «Ɗəf dədagrakmə gəm diynan wən nawzam kakãh səka dələv na Israyel ka ɗəf adappa təttaka dayday kəta ɓaŋka,

⁶ məpsim zel buhul səmmbet kirtini, məlewgin aba Yawe a Gibeya, walaŋgəla na Sawlu, muwele na Yawe.» Məlĩ anah sit na: «Wanipsukum.»

⁷ Məlĩ Davit appanək Mefiboset wətən Yonatan na Sawlu vi əsway də iya na Yawe na weleŋgit may Davit də Yonatan, wətən Sawlu.

⁸ Məlĩ andek kirtət Rispa wətən Ayya mezeŋgleket sula tuwə sən Sawlu, may Armoni də Mefiboset gəm kirtət Mikal wətən Sawlu mezeŋgleket sle' tuwə sən Adiriyel, wətən Barzillay na Mehola.

⁹ Apsitik avet mə Gabawənɗe, alewnin aka gərəm aba Yawe. Buhulgit pak amtaŋ məstaka. Məlewtis na, addəv əvoŋɗe maddaabəŋ nawtaw haykəmari pepreŋgi.

¹⁰ Rispa, wətən Ayya, təgəm sak na mafɗaga təpak sən kiyta aka milɓe təŋ səza ətaw haykəmari pepreŋ hã gap mənzi buwən kpimi. Təppet sit biŋgeɗ na disiŋ də kapay ɓa, may sit zəgeɗ mokroket də dəfəɗ ɓa.

¹¹ Mənah səni Davit, an Rispa wətən Ayya gəra Sawlu təgəɗə.

¹² Davit ambat ənde sleŋsleŋɗe net may Sawlu də Yonatan wətən səvet migil Yabes na Galad məs dəhẽlnin sə Bet-Seyan, a təki mə Filistiɗe alewnin adak pay abaynən Sawlu a Gilbo'a.

¹³ Ake sleŋsleŋɗe net may Sawlu də Yonatan wətəni, akkeletin sleŋsleŋɗe net ɗiy məlewit neki.

¹⁴ Məndikti sleŋsleŋɗe net may Sawlu də Yonatan wətən nak aka va na Benyamin a Sela addəv magamas na Kis, afəni. Aɗɗanənək an məlĩ aɗi sit wən nan pakə. Dərɓagan na, Maŋgəlva azaɓanək dəlva.

Wəgay dit mə Filistiɗe

¹⁵ Wəgay agəɗək a weleŋgit mə Filistiɗe dit mə Israyelɗe əmpa. Davit dit ɗiy nan aprikeŋ əwak sitin mə Filistiɗe. Davit ayəka.

¹⁶ Yisbi na Nob, zev Harafa, tay də tulhõ nan na təbəz pepreŋge, gagdak nan wagəɗ day ki kilo hoku, aynanək masalam meleketen agzeni. Amna kawbay Davit.

¹⁷ Abisay, wətət Seruya adek əsək səni, abayək mə Filisti nak zamə. Məzəlpaŋ na Davit aswayaŋ sənənka, aɓɗaŋ na: Kədawgilyok də mənam a təki nawgay əmpa ɓa, vi məlĩ adawza sə Israyel ɓa.

¹⁸ Dərɓaga aska, əgay agəɗək dit mə Filistiɗe a Gob əmpa; daski Sibbekay na Husa abay Saf, taka naddəv zev Harafa.

¹⁹ Əgay agəɗək dit mə Filistiɗe a Gob əmpa, Elhanan wətən Ya'are-Oregim na Bet-Lehem, abay Golyat na Gat məs wəlaŋ tulhõ nan va wəlaŋ saŋga.

²⁰ Əgay agəɗək a Gat əmpa. Ɗəf tay məɓayən kirtin van də tələn pak sləre sləre, sap pak kaklaw sula kiyit poɗo; nan pak zev Harafa yi.

²¹ Arəmək mama azet mə Israyelɗe, yaŋ Yonatan wətən Simeya məlmən Davit abaya.

²² Poɗes pak zev Harafa a Gat əŋgə, Davit dit ɗiy nan dəbeynini.