2Samiyel 20 - Bible en Guidar

Seba tay ətem aka Davit

¹ Ɗəf tay adaka məndəɓa iya nan na Seba, wətən Bikri mə Benyamin. Affon gozloro dawnəh na: «Wən nam tay də Davit ɓa, zəga tay dəsapam də wətən Yesse ɓa! Ɗiy na Israyel, ɗəf pak dəgəm tive neŋgil ananda.»

² Mə Israyelɗe appanənək Davit, kazban Seba, wətən Bikri. Ɗiy na Yuda assoŋguk də məlĩ net sə Yurden hã gap a Yerusalem.

³ Davit pay eŋgil ananda a Yerusalem, məlĩ agimik gəreŋgiɗin kəlaw apəl nawga gəla neki. Aɗiyik addəv gəla məgan moggoni. Azaɓanək zəga nawzəm net pakə, awvoŋ dənɗaŋ əmpa ɓa. Məmpani met hã gap pay namta net va gil na gəbaya.

Əmta na Amasa

⁴ Məlĩ aɓsən Amasa na: «Aye su məzəlpaŋ na Yuda, addəv Əvoŋ hoku. Is sən kiyuk kəsokgən aŋka.»

⁵ Amasa ambatək kawye ɗiy na Yuda, ndən sən kiyən dəgap va pay məɗi sən nak ɓa.

⁶ Yaŋ Davit anah sən Abisay na: «Seba wətən Bikri əŋ nawgeslne' səni day ki Absalom. Dok dit gewleɗ na daya noko, azbani vi adawrəh walaŋgəleɗe gugriɗ kawɗam sə maharam ɓa.»

⁷ Ngaɓa net məzəlpaŋ na Yo'ab agilyoŋguk ammban gəm mə Keretɗe, mə Peletɗe dit məs mekret kãh pakə, agilyoŋguk sə Yerusalem, kazban Seba wətən Bikri.

⁸ Tahəŋ go'o də gərəm beppe na Gabawən. Amasa pay abeti, Yo'ab agulik lukutɗe nawgay nani, maslapa dərma masalam nan də gəlan tay deŋge egzeni. Dawgilyen na, masalam bətə.

⁹ Yo'ab aɓsən Amasa na: «Mbar kədawgay di məlmuwa?» Ndən eŋgeme Amasa də van dəzəŋ kãw va kaklak van awlan kəta.

¹⁰ Amasa dəzgə sləma aka masalam nava Yo'ab ɓa. Yaŋ ambok aza gədəvni. Herɗen lokotok afuŋ, məza əmndan haran kpẽh ɓa, ndən zamə. May Yo'ab də Abisay məlmən, azbanənək Seba wətən Bikri.

Ətem na Seba abayək mani

¹¹ Taka səret gewleɗ na Yo'ab asanək aza kigəbay Amasa, amna: «Ɗəf dənnek də Yo'ab gəm ɗəf na Davit pak na, dəzban Yo'ab!»

¹² Yaŋ Amasa aputkul aket mbel nan addak tive, məzəlpa nak awla na, ɗiy məzəzzoŋ pak iziweŋgi. Yaŋ azargən Amasa səka tive a maksaf adaka, ndən firik lukut akani, adan awla ɗiy en dəgapaŋ go'o azan pak tay əziweŋgi.

¹³ Səza məzargən səka tive, ɗiy pak agəmənək tive ammba Yo'ab, kawgəm magabba Seba wətən Bikri.

¹⁴ Abbeletik mahəlfaɗe na Israyel pakə, agapək a walaŋgəla-metiŋ na Abel-Bet-Ma'aka; mə Beritɗe tam akkalaŋ sap əgəm magabbani.

¹⁵ Ndəɗaŋ pay asərngəslnən walaŋgəla-metiŋ na Abel-Bet-Ma'aka, akkotnənək dələv hã gap addak zlava mərkan na walaŋgəla-metiŋ, ɗiy en dəssoŋ də Yo'ab pak atəŋgənək əbuzluŋgur gabba zlava na walaŋgəla-metiŋ dəɓəslgəni.

¹⁶ Guluk məs maɗɗulat təgil sə walaŋgəla-metiŋ, təŋgəsl vaŋvəla: «Məprəma, məprəmɗa! Kamə mənah sən Yo'ab na: “Dəzar gba aŋka, wən tay nəŋgəl nawnah səni.”»

¹⁷ Azar azata, guluk nak təmna: «Istə Yo'ab sa?» Aɓsət na: «Intə!» Yas tənah sən na: Aprəm əpel nat balamək noko, yaŋ amna: «In tat əprəmko.»

¹⁸ Yaŋ təpel təmna: «Net ɗiy nam lahəŋ adawnahaŋ na, “assohõn Abel-Bet-Ma'aka, wən wabaymani!”

¹⁹ Intə məŋgəl zazaya gəm mədaw təstəs day a Israyel. Kədaŋgla əbay walaŋgəla an kiwən na Israyel. Vimi kədaŋgla əzan zəga na Yawe di?»

²⁰ Yo'ab amna: «Tay vas ɓa! Nəɗɗum naɓzluwən ɓa may nawraygən ɓa!

²¹ Owwo wən nan vaski ɓa. Wən na ɗəf naka va na walaŋ gərəm na Efrayim dəkiywa, ana Seba wətən Bikri, məs dətem aka məlĩ Daviti. Məpsu anan kaka'ə, wanəppan walaŋgəla.» Guluk nak təɓsən Yo'ab na: «Waməzgan suk kiyən ki zlava.»

²² Guluk təmbat azet ɗiy nata, tənah sit də maɗɗula. Yaŋ mətaw ki Seba wətən Bikri, məzgan sən Yo'ab. Yo'ab affon gozloro; məzəlpaŋ nan hirr ləŋ appanən walaŋgəla-metiŋ addoŋ anetda. Yo'ab sən kiyin amil a Yerusalem aza məlyã.

Iya net məɗɗaŋ wəza na Davit

²³ Yo'ab dəsan daya net məzəlpaŋ na Israyel pakə; Benaya wətən Yoyada yi tam aket mə Keretɗe dit mə Peletɗe.

²⁴ Adorami daya na wəza na balam pakə; Yosafat, wətən Ahilud, ndəni mərəm zəgeɗ məverit na məlyã;

²⁵ Sewa yi, məzuvere; may Sadok də Abiyatar əŋgə, məsdəlveŋge.

²⁶ Ira ɗəf na Yayir nan tam məsdələv na Daviti.